Read tshwa Mitiro 25 Bible Online

Mitiro 25 - tshwa bible

Mitiro 25

¹Makunu Festu na a chikele tikweni lego, i lo tshama Kesaria masiku manharu, zonake i lo kanziha aya Jerusalema.

²A vapristi va hombe ni manghanakana ya vaJuda va lo ta kecara Paule mahlweni kakwe; [439]

³va kombela a kuva a va mahela wuxinji, a mu rumela Jerusalema, na va xuva ku mu xiyelela va mu daya ndleleni. [440]

⁴Kanilezi Festu i lo hlamula lezaku Paule i gongelwe le Kesaria, na yena aku i ta yawu kona lokuloku.

⁵A ku ngalo: Lava va nga ni malungelo xikari ka nwina, a va relele zinwe na mina, va ya mu kecara loku wu hi kona nanzu ka munhu loye. [441]

⁶Laha a nga xwile xikari kabye a ntlhanu wa masiku ni manharu kutani khume, i lo relela aya Kesaria; hi manziko wa kona i lo tshama xitshanwini xa kulamula, a laya a kuva Paule a tiswa.

⁷Laha a nga chikele, a vaJuda laya va nga relele hi le Jerusalema va lo yima va mu ranzela, va mu rwexa milanzu yo tala yo binza, leyi va nga tsanzeka a ku yi tiyisa. [442]

⁸Paule i lo ti hlamulela, aku ngalo: A nzi onhangi nchumu hi nayo wa vaJuda, hambu ka tempeli, ge ni ka Kesari. [443]

⁹Kanilezi Festu na a lava ku khesiwa hi vaJuda, i lo mu wutisa, aku: Wa zi ranza kuya Jerusalema, u ya lamulwa kona mahlweni ka mina hi timhaka leti ke? [444]

¹⁰Paule i lo hlamula, aku: Mina nzi yimile mahlweni ka xitshamu xa kulamula xa Kesari, hi laha nzi fanelweko hi ku lamulwa kona; a nzi onhangi nchumu ka vaJuda, kota lezi wena u zi tivako khwatsi.

¹¹Ahemba-lezoke, loku nzi gohile, nzi maha xilo xi faneleko kufa, a nzi ali kufa; kanilezi loku ku nga hi na zinene timhakeni leti va nzi ranisako ha tona, a ku na munhu a ta nga nzi nyikela kabye. Nzi ta yisa a mhaka ya mina ka Kesari. [445]

¹²Zonake Festu laha a nga xuxile ni hubye, i lo hlamula, aku: Wena u yisile mhaka ka Kesari, u taya ka Kesari.

¹³Makunu na ku hunzile masiku yo kari, hosi Agripa na Bernike, va lota Kesaria, a ku ta losetela Festu.

¹⁴Kota lezi va nga wa tshamile laho a masiku yo tala, Festu i lo hlawutela hosi a mhaka ya Paule, aku: Ku na ni munhu laha a nga siyiwa makhotsweni hi Felisi,

¹⁵loyi a vapristi va hombe ni masingalakati ya vaJuda va nga mu kecara ka mina, laha nzi nga hi le Jerusalema, va kombela lezaku ngha a koneka.

¹⁶Nzi lo hlamula nziku, a hi mukhuwo wa vaRoma ku tsayisa munhu loyi a kecariwako, na a nga se ku wonana ni lava va mu kecarako, a kuma xikhati xa ku ti hlamulela ka mhaka leyi a kecariwako ha yona.

¹⁷Hikwalaho laha va nga chikele seno, nzi lo hatlisa nzi tshama hubyeni hi siku go gamela, nzi laya a ku va a tiswa munhu loye.

¹⁸Kanilezi laha a vakecari vakwe va nga yimile, a va mu kecarangi hi mitiro yo biha kota lezi nzi nga wa alakanya;

¹⁹va lo mu ranisa ntsena hi timhaka tinwani ta kukhozela kabye, ni hi munhu loyi a fileko, a nga Jesu a vito gakwe, loyi Paule a tiyisako aku wa hanya. [446]

²⁰Mina na nzi kohlwa lezaku nzi ta hlolisisa kuyini a timhaka leti, nzi lo mu wutisa loku a vumela a kuya Jerusalema a ya lamulwa kona hi mhaka leyi.

²¹Kanilezi laha Paule a nga kombele ku gongiwa, kasi ku ya tsanzelwa ka hosi ya hombe, nzi lo laya lezaku a gongiwe kala nzi mu rumela ka Kesari.

²²Agripa aku ngalo ka Festu: Minawu nzi wa ta ranza a kuzwa loye munhu. Yena aku: U ta muzwa manziko. [447]

²³Hikwalaho na gi cile, Agripa na Bernike va lota hi wukosi ga hombe, va ta enghena hubyeni zinwe ni tinduna ta hombe, ni vahombe va muti; Festu i lo laya lezaku Paule a tiswa.

²⁴Festu aku ngalo: Hosi Agripa, na nwina madota nwentlhe mu nga na hina laha, ma mu wona loyi munhu, loyi xidlemo xontlhe xa vaJuda xi nga mu kecara ka mina le Jerusalema ni kwalaha kambe, va kanyuluka lezaku a nga ha faneli hi kuva a hanya. [448]

²⁵Kanilezi mina nzi lo kuma lezaku a nga mahangi nchumu xi faneleko kufa, kanilezi kota lezi a nga yisa mhaka yakwe ka hosi ya hombe, nzi xuvile ku mu rumela kona. [449]

²⁶Kanilezi a nzi na mhaka yi tiyileko ya kuva nzi tsalela hosi ha yena: hikwalaho nzi mu tisile mahlweni ka nwina, nguvu mahlweni ka wena hosi Agripa, lezaku nzi fela ku zi tiva lezi nzi ta nga tsala anzhako ka kuva nwina mu mu hlolile.

²⁷Hakuva nza alakanya lezaku a zi faneli ku rumela peresu, loku ku nga kombiswi a milanzu leyi yi kecariwako ha yona.