Read tshwa Mitiro 3 Bible Online

Mitiro 3 - tshwa bible

Mitiro 3

¹Pedro na Johani a va kari va kanziha vaya tempeleni hi xikhati xa kukhongela, xi nga hi 3 horas wa gambo:

²Ku wa rwelwe a munhu wo kari loyi a nga wa hi xilema hi le rumbyini ga nyine wakwe, loyi va nga mu veka a masiku ni masiku laha nyangweni yi vitwako Yo Saseka, kasi a kombela a zinyikiwo ka lava va nga enghena lomo tempeleni. [53]

³Laha a nga wona Pedro na Johani na va kari va enghena tempeleni, i lo kombela xinyikiwo ka vona.

⁴Pedro i lo mu cuwukisisa, zinwe na Johani, aku: Hi cuwuke.

⁵Yena i lo va cuwuka, na a tsumba ku amukela nchumu ka vona.

⁶Kanilezi Pedro aku ngalo: A nzi na siliva ni nzalama; kanilezi lezi nzi nga nazo, nza ku nyika zona: Hi vito ga Jesu Kristu wa le Nazareta, suka U famba. [54]

⁷Zonake i lo mu khoma hi canja ga xinene, a mu yimisa; khalekhale a mikonzo yakwe ni mahlakala yakwe zi lo tiyiswa.

⁸I lo tlula a yima, a sangula ku famba; zonake i lo enghena navo tempeleni, a tlula-tlula, a bonga Nungungulu. [55]

⁹Vanhu vontlhe va lo mu wona na a kari a famba, a bonga Nungungulu. [56]

¹⁰Laha va nga mu tiva lezaku hi yena a nga tshamela ku hiwa zinyikiwo laha nyangweni Yo Saseka ya tempeli, va lo hlamala ni ku riwuka hi kota ya lezi zi mahekileko kakwe.

¹¹Kota lezi a nga wa ha khomelela ka Pedro na Johani, a vanhu vontlhe va lo tsutsumela kabye a ligumbagumbeni leli li vitwako la Solomoni na va hlamala nguvu. [57]

¹²Laha Pedro a nga zi wona, aku ngalo ka vanhu: Nwina madota ya ka Israeli, hi yini mu hlamalako hi munhu loyi ke? Hi yini mu cuwukisisako hina, ku khwatsi hi mu mahile a famba hi ntamu ni kululama ka hina? [58]

¹³A Nungungulu wa Abrahama, ni wa Isaka, ni wa Jakobe, a Nungungulu wa vakoko va hina, i dumisile a Nanza gakwe Jesu; loyi nwina mu nga mu nyikela ka Pilatu, mu mu kaneta mahlweni kakwe, laha yena a nga lava ku mu tlhatlha. [59]

¹⁴Mu lo kaneta loyi wa Kubasa ni wa Kululama, mu kombela lezaku mu tlheliselwa a mudayi, [60]

¹⁵mu daya a Hosi ya wutomi; kanilezi Nungungulu i mu vuxile hi ka vafileko; hina hi vakustumunyu va lezo.

¹⁶Hi kukholwa vitweni gakwe, gona vito gakwe gi mu nyikile ntamu loyi munhu, loyi mu mu wonako, mu mu tiva; ina, a kukholwa ka Jesu ku mu hanyisile mahlweni ka nwina nwentlhe. [61]

¹⁷Makunu vamakabye, nza zi tiva lezaku mu zi mahile hi kungativi, kota lezi va nga zi maha ni varangeli va nwina. [62]

¹⁸Kanilezi Nungungulu i zi tatisile lezo, lezi a nga zi tivisile kale hi milomu ya vaprofeti vontlhe, lezaku, Kristu wakwe i ta xaniseka. [63]

¹⁹Hikwalaho ti soleni, mu hunzuluka, kasi a zionho za nwina zi fela ku vinyetelwa, kasi ku chikela a zikhati za kuhumutwa hi le ka Hosi;

²⁰lezaku yi hi rumela Kristu loyi a yimiselweko nwina, a nga yena Jesu;

²¹loyi a tilo gi faneleko ku mu amukela ku kala xikhatini xa kutlheliselwa ka zilo zontlhe, lexi Nungungulu a kanetako ha xona hi milomu ya vaprofeti vakwe vo basa, lava va nga hi kona hi kata ka matiko. [64]

²²Mosi i te ngalo: Hosi Nungungulu i ta mu vuxela a muprofeti xikari ka vamakabye va nwina, wo kotisa mina; mu ta mu ingisa ka zontlhe lezi a ta nga mu byela zona. [65]

²³Ni wihi munhu loyi a nga ingisiko a muprofeti loye, i ta lobyiswa aku bhi xikari ka tiko. [66]

²⁴Ina, ni vaprofeti vontlhe kusukela ka Samueli ni lava va mu tlhatamako, vontlhelele lava va nga wulawula va lo tivisa hi masiku lawa.

²⁵Nwina mu vana va vaprofeti, ni va xivumelwano lexi Nungungulu a nga xi maha ni vakoko va nwina, laha a ngaku ngalo ka Abrahama: Hi ka pswalo wa wena a tixaka tontlhe ta misava ti ta katekiswa. [67]

²⁶Nungungulu i sangulile hi nwina, a mu humesela a Nanza gakwe Jesu, a mu rumela a ku ta mu katekisa, hi ku mu hunzulukisa nwentlhelele, mu tsika a zionho za nwina.