Read tshwa Mitiro 4 Bible Online

Mitiro 4 - tshwa bible

Mitiro 4

¹Kota lezi va nga wa ha kanela ka vanhu, a vapristi ni nduna ya tempeli ni vaSadusi va lota kabye,

²na va zangarile hilezi va nga gonzisa vanhu, vaba hungu hi kuvuka ka vafileko ha Jesu. [68]

³Va lo va khoma, va va khotsela paxweni kala manziko, hakuva gi wa pelile.

⁴Kanilezi a vanyingi va lava va ngazwa a mhaka va lo kholwa; ni tsengo wa vavanuna wu wa hi kusuhani ka 5,000.

⁵Ku te hi manziko wa kona, a vafumeli vabye, ni masingalakati, ni vatsali va lo tsombana ta Jerusalema;

⁶na Anasi a mupristi wa hombe i wa hi kona, na Kayafasi, na Johani, na Alekzandre, ni vontlhe lava va nga hi maxaka ya mupristi wa hombe. [69]

⁷Laha na va yimisile a vapostoli xikari kabye, va lo va wutisa, vaku: Mu mahile lezi hi ntamu muni, kutani hi gihi vito ke? [70]

⁸Zonake Pedro, na a tele hi Moya wa ku Basa, aku ngalo kabye: Nwina vafumeli va vanhu, na nwina masingalakati, [71]

⁹lezi hi hloliwako nyamutlha hi kota ya ntiro wo saseka lowu wu mahelweko munhu a nga hi xilema, niku munhu loyi i hanyisisilwe kuyini;

¹⁰ngha zi tiveka ka nwina nwentlhe, ni ka vanhu vontlhe va ka Israeli, lezaku loyi munhu a yimileko mahlweni ka nwina, i hanyisilwe hi vito ga Jesu Kristu wa le Nazareta, loyi nwina mu nga mu belela, loyi Nungungulu a nga mu vuxa hi ka vafileko. [72]

¹¹Hi yena a nga ribye gi nga aliwa hi nwina vaaki, legi gi nga mahiwa a hloko ya magumo. [73]

¹²A ku kona kuhanyiswa hi ka munwani; hakuva a ku na vito ginwani lahasi ka tilo, legi gi nyikilweko xikari ka vanhu, legi hi nga hanyiswako ha gona. [74]

¹³Laha na va wonile a kutiya ka Pedro na Johani, na va tiva lezaku mbanhu va nga gonzangiko, va nga vanhu ntsena, va lo hlamala; zonake va lo va tiva, lezaku va wa hi zinwe na Jesu. [75]

¹⁴Ni loku va wona a munhu loyi a hanyisilweko na a yimile zinwe navo, va wa nga hi na nchumu xa ku kaneta,

¹⁵va va laya ku huma handle ka hubye. Va lo wutisana xikari kabye,

¹⁶vaku: Hi ta maha yini hi vanhu lava ke? Hakuva za su dlunya ka vontlhe lava va akileko le Jerusalema, lezaku xihlamaliso xa hombe xi mahilweko hi vona; hina a hi na ku xi kaneta. [76]

¹⁷Kanilezi lezaku a mhaka leyi yi nga nonohisi yi hangalaka xikari ka vanhu, a hi va tsimbeteni, lezaku va nga ha wulawuli ka munhu ni munwe hi vito legi.

¹⁸Va lo va vitana, va va layisisa a ku kala va nga ha wulawuli hambu ku gonzisa hi vito ga Jesu.

¹⁹Kanilezi Pedro na Johani, va lo va hlamula, vaku: Kutani zi sasekile mahlweni ka Nungungulu a ku ingisa nwina ku hunza ku ingisa Nungungulu, lamulani ha nwece; [77]

²⁰hakuva a hi zi koti ku miyela ni lezi hi zi wonileko, ni lezi hi zi zwileko. [78]

²¹Zonake loku va va honokele, va lo va tsika; a va kumangi nchumu xa ku va tsayisa ha xona, hi kota ya vanhu; hakuva vanhu vontlhe va lo dumisa Nungungulu hi lezi zi mahilweko. [79]

²²Hakuva a munhu loyi a nga hanyisilwe hi xirewukiso lexo, i wa hi ni 40 wa malembe ma hlamusa.

²³Laha na va va tlhatlhile, va lo tlhelela ka va ka kabye, va ya hlawutela zontlhe lezi a vapristi va hombe ni masingalakati va nga zi wulile kabye. [80]

²⁴Vona na va zi zwile, va lo tlakusa magezu yabye ka Nungungulu hi mbilu yinwe, vaku ngalo: Hosi, wena loyi u nga maha a tilo ni misava ni bimbi, ni zontlhe lezi zi nga ka zona; [81]

²⁵wena loyi u nga wula hi Moya wa ku Basa, hi nomu wa nanza ga wena Davida a koko wa hina, uku: A vamatiko va lo maha pfilupfilu hikuyini, Ni vanhu va alakanyela a zilo zi nga nyawuliko ke? [82]

²⁶A tihosi ta misava ti vukile, Ni tihosana ti wa tsombene khatiginwe, Ti vukela Hosi ni ku vukela a Totilweko wakwe.

²⁷Hakuva kunene vaHerodi na Pontiu Pilatu, zinwe ni vamatiko ni vanhu va ka Israeli, va wa tsombene a mutini lowu, kasi ku vukela Jesu, a Nanza ga wena gi basileko, loyi wena u mu totileko, [83]

²⁸kasi va maha lexi u nga xi yimisile hi kale hi canja ga wena ni khungo ga wena, a kuva xi maheka. [84]

²⁹Makunu, Hosi, cuwuka a kuhonoka kabye, u nyika malanza ya wena a ku kanela a mhaka ya wena hi kutiya kontlhe, [85]

³⁰na u kari u nawuluta a canja ga wena kasi ku hanyisa; lezaku a ziwoniso ni zirewukiso zi fela ku mahiwa hi vito ga Jesu, a Nanza ga wena gi basileko. [86]

³¹Laha na va khongele, a wutshamu legi va nga tlhangene ka gona gi lo tsekatsekiswa, vona vontlhe va tatiswa hi Moya wa ku Basa, va kanela a mhaka ya Nungungulu hi kutiya. [87]

³²Hi linyingi la vona lava va kholilweko va wa hi va mbilu yinwe ni muhefemulo munwe; ku wa nga hi kona ni munwe a ngaku ngalo, a zilo a nga nazo za yena yece; kanilezi va lo hlengela zilo zontlhelele. [88]

³³A vapostoli va lo kustumunya hi ntamu wa hombe hi kuvuka ka Hosi Jesu; ni tipswalo ta hombe ti wa hi hehla ka vona vontlhe. [89]

³⁴Ku wa nga hi kona a vumalako xikari ka vona; hakuva vontlhe lava va nga hi ni zipetso, kutani tiyindlu, va lo zi xavisa, va neha a mali ya lezi zi xabyisilweko, [90]

³⁵va yi veka mikonzweni ya vapostoli; zonake ku lo avelwa ka munwe ni munwani kota zi lavekako ka yena. [91]

³⁶Josefa, loyi a nga chuliwa hi vapostoli ku ngalo hi Barnabasi, lezo hi ku ngalo, Mukhongoteli, loyi a nga hi muLevi, a pswalelweko le Kupero,

³⁷na a hi ni simu i lo gi xavisa, a neha a mali, a ta yi veka mikonzweni ya vapostoli. [92]