Read tshwa Mitiro 5 Bible Online

Mitiro 5 - tshwa bible

Mitiro 5

¹Kanilezi a munhu wo kari loyi a vitwako Ananiasi, ni sati wakwe Safira, i lo xavisa a simu,

²a pambula a xipanze xa mali a khweketa, i wa zi tiva ni sati wakwe; a neha xipanze xo kari a xi veka mikonzweni ya vapostoli. [93]

³Kanilezi Pedro aku ngalo: Ananiasi, hikuyini Satani a tatisileko a mbilu ya wena, lezaku u hemba wunwa ka Moya wa ku Basa, ni ku khweketa a xipanze xa mali ya simu ke? [94]

⁴A simu na gi nga se ku xavisiwa, gi wa nga hi ga wena ke? Anzhako na gi xabyisilwe a mali yi wa nga hi ya wena ke? Hikuyini u alakanyileko ku maha xilo xa kunghahi? A ku hembangi ka vanhu, kanilezi ka Nungungulu.

⁵Laha Ananiasi na a zwile magezu lawa i lowa hasi afa; vontlhe lava va nga zizwa va lo chava nguvu.

⁶Ni majaha ma lo suka ma mu petsela, ma mu humesa lahandle a ku ya mu lahla. [95]

⁷Loku ku hunzile tihora tinharu a sati wakwe i lo enghena, na a nga zi tivi lezi zi mahekileko.

⁸Pedro aku ngalo kakwe: Mu xavisile a simu hi mali leyi ke? Yena aku ngalo: Ina, hi yona leyi.

⁹Pedro aku ngalo kakwe: Hikuyini mu vumeleneko a ku ringa a Moya wa Hosi ke? Wangabye, a mikonzo ya lava va lahlileko a nuna wa wena yi laha nyangweni, na wena va ta ku rwala lahandle. [96]

¹⁰Khalakale i lowa mikonzweni yakwe, afa. A majaha ma lo enghena ma ta mu kuma na a file; ma lo mu humesa lahandle, ma ya mu lahla nkele munwe ni nuna wakwe.

¹¹A kuchava ka hombe ku lota hehla ka handla gontlhe, ni hehla ka vontlhe lava va nga zizwa lezi zilo.

¹²Ku lo mahiwa a ziwoniso ni zirewukiso zinyingi xikari ka vanhu hi mandla ya vapostoli. A makholwa wontihe ma lo tsombana le ligumbagumbeni la Solomoni, na va hi va mbilu yinwe. [97]

¹³Xikari ka vanwani ku wa nga hi kona ni munhu a nga tiya ku ti tlhanganyisa na vona; kanilezi a vanhu va lo va dzunza nguvu. [98]

¹⁴Lava va nga kholwa ka Hosi va lo engetelwa nguvu, a wunyingi ga vavanuna ni vavasati;

¹⁵laha ka kuva va humesela a vababyako va va yisa maphangweni, va ya va etlelisa masangweni ni zitandeni, lezaku loku Pedro a hunza, a nzhuti wakwe wu fela ku sirela munwani wa vona. [99]

¹⁶Kambe a vaaki va le mitini leyi yi renzelekeleko Jerusalema va lota na va neha a vababyi, ni lava va nga karatwa hi mimoya ya kubiha; va ta hanyiswa vontlhelele. [100]

¹⁷Kanilezi a zilo lezi zi lo vuxa a mupristi wa hombe, ni vontlhe va nga hi zinwe naye, va nga hi vaSadusi, va tatiswa hi mona, [101]

¹⁸va khoma a vapostoli, va va khotsela paxweni. [102]

¹⁹Kanilezi a ngelosi ya Hosi yi lo vulula a tivati ta paxo ni wusiku, yi va humesa, yiku: [103]

²⁰Fambani, mu ya yima tempeleni, mu byela vanhu a timhaka tontlhe ta Wutomi legi. [104]

²¹Laha va nga zi zwile, va lo enghena tempeleni ni mixo, va gonzisa kona. Kanilezi a mupristi wa hombe, ni lava va nga hi naye, va lota va ta tsombanyisa a hubye ni masingalakati wontihe ya vana va ka Israeli, zonake va lo rumela paxweni a ku ya teka vapostoli. [105]

²²Kanilezi laha a malanza ma nga chikela paxweni, a ma va kumangi; ma lo wuya, ma ta hlawutela,

²³maku: A yindlu ya paxo hi yi kumile na yi valilwe khwatsi, a varinzeli na va yimile laha tinyangweni; kanilezi laha hi nga vulula a hi kumangi munhu lomo nzeni.

²⁴Laha a mufumeli wa tempeli ni vapristi va hombe na va ti zwile leti timhaka, va lo kanganyiseka ha tona, lezaku zi ta gumesisa kuyini. [106]

²⁵Zonake ku lota munwe a ta va byela, aku: A vavanuna lava mu nga va enghenisa paxweni, va yimile tempeleni va gonzisa vanhu.

²⁶A nduna yi loya zinwe ni malanza a ku ya va neha; kanilezi va wa nga va susumetangi hi ntamu, hakuva va lo chava vanhu, vaku va nga gandliwa hi maribye. [107]

²⁷Loku va wuyile navo, va lo va yimisa mahlweni ka hubye. A mupristi wa hombe i lo va wutisa,

²⁸aku: Hi lo mu layisisa nguvu lezaku mu nga gonzisi hi vito legi; hambu zi hi tano, mu tatisile Jerusalema hi kugonzisa ka nwina, mu xuva ku neha a nkhata wa loyi munhu hehla ka hina. [108]

²⁹Pedro ni vapostoli va lo hlamula vaku ngalo: Hi fanele ku ingisa Nungungulu ku hunza ku ingisa vanhu. [109]

³⁰A Nungungulu wa vakoko va hina i vuxile Jesu, loyi nwina mu nga mu daya mu mu hayeka sinyeni. [110]

³¹Kanilezi Nungungulu i lo mu tlakusa hi canja gakwe ga xinene, a kuva Hosi ni Muhanyisi, kasi ku nyika kuhunzuluka ka Israeli, ni kutsetselelwa ka zionho. [111]

³²Hina hi vakustumunyu va timhaka leti, zinghaho ni Moya wa ku Basa lowu Nungungulu a wu nyikileko ka vona lava va mu ingisako. [112]

³³Kanilezi vona laha na va zi zwile, va lo zangara, va kanakanela ku va daya.

³⁴Kanilezi a muFarisi a vitwako Gamalieli, a mugonzisi wa nayo, a nga dzunziwa hi vanhu vontlhe, i lo suka a yima hubyeni, a laya lezaku a vapostoli a va nga humeswa xikhatanyana. [113]

³⁵Aku ngalo ka hubye: Nwina madota ya ka Israeli, ti woneleni hi ku kumbuka lava vanhu, lezi mu lavako ku va maha zona.

³⁶Hakuva a kalanyana ku lo huma Teudasi, loyi a ngaku i munhu wa hombe; loye a 400 wa vavanuna va nga namarela kakwe; kanilezi i lo dawa, ni vontlhe va nga kholwa ka yena va lo hangalaka, va nga ha hi nchumu.

³⁷Anzhako ka yena ku lo huma Judasi wa le Galilea a xikhatini xa xitsalela, a kucetela vanhu a kuva va hluwuka; yenawu i lofa, ni vontlhe lava va nga mu ingisa va lo hangalaka. [114]

³⁸Makunu nzi ngalo ka nwina: Tsikani lava vanhu, mu va tlhatlha; hakuva loku legi khungo ni lowu ntiro wu hi wa vanhu, wu ta hangalaka; [115]

³⁹kanilezi loku wu hi wa Nungungulu, mu nga ta zi kota ku va hlula; mu nga dzuka mu kumiwa mu kari muiwa na Nungungulu. [116]

⁴⁰Vona va lo mu ingisa. Laha na va vitanile a vapostoli, va lo vaba, va va laya lezaku va nga ha kaneti hi vito ga Jesu, va va tsika va famba. [117]

⁴¹A vapostoli va lo suka hi laha hubyeni, na va tsaka hilezi va hlayelweko lava va faneleko a ku xaniseka hi kota ya vito ga Jesu. [118]

⁴²A va tsikangi a ku kanela wontihe masiku lomu tempeleni ni le kaya, va gonzisa hi Jesu lezaku hi Kristu.