Read tshwa Mitiro 6 Bible Online

Mitiro 6 - tshwa bible

Mitiro 6

¹Ku te hi lawo masiku, laha a ntsengo wa vapizani wu nga anziswa, a vaJuda lava va nga wulawula xiGreki va lo kalala hi kota ya maHeberu, hakuva a tinoni tabye ti wa tsoniwa a kuavelwa ka masiku ni masiku. [119]

²A vakhume ni vambiri va lo vitana a xidlemo xa vapizani, vaku: A zi faneli lezaku hi tsika ku kanela a mhaka ya Nungungulu, hi khozela timezeni. [120]

³Hikwalaho vamakabye, hlawulani xikari ka nwina a ntlhanu wa vavanuna ni vambiri, lava va tsumbekileko, va teleko hi Moya ni kutlhariha, lava hi ta nga va yimisa ka ntiro lowo. [121]

⁴Kanilezi hina hi ta simamisa hi pinyamela kukhongeleni, ni ntirweni wa mhaka. [122]

⁵A khungo legi gi lo xalalisa a xidlemo xontlhe; zonake va lo hlawula Stefani, a munhu a teleko hi kukholwa ni Moya wa ku Basa, na Filipu, na Prokoro, na Nikanori, na Timoni, na Permenasi, na Nikolasi, a kholwa ga le Antiokia. [123]

⁶Lava va lo yimiswa mahlweni ka vapostoli; laha na va khongele, va lo tlhateka mandla hehla kabye. [124]

⁷A mhaka ya Nungungulu yi lo anza, ni ntsengo wa vapizani wu lo enzelekelana ha hombe le Jerusalema; ni vapristi vanyingi va lo kholwa. [125]

⁸Makunu Stefani loyi a nga tele hi tipswalo ni ntamu, i lo maha zirewukiso ni ziwoniso xikari ka vanhu.

⁹A vanwani va le sinagogeni gi vitwako Sinagoga ga vatlhatlhisilweko wukhumbini, ni va le Kirene, ni va le Alekzandria, ni va le Kilikia, ni va le Asia, va lo vuka va kanetana na Stefani.

¹⁰Va wa nga zi koti kulwa ni kutlhariha ni Moya lowu a nga wulawula ha wona. [126]

¹¹Zonake va lo kucetela a vanhu, lava va nga kungalo: Hina hi mu zwile ku wulawula tihlamba ha Mosi ni Nungungulu. [127]

¹²Va lo vuxa vanhu, ni masingalakati, ni vatsali, zonake va lo mu tela, va ta mu khoma, va mu yisa hubyeni.

¹³Va lo humesa a vakustumunyu va mawunwa, lava va ngaku ngalo: Loyi munhu a nga tsiki ku kanela a timhaka to vukela a wutshamu legi go basa, ni nayo;

¹⁴hakuva hi mu zwile a wula lezaku Jesu loyi wa le Nazareta i ta hahlula legi wutshamu, a hunzula a mikhuwo leyi hi nga nyikwa hi Mosi. [128]

¹⁵Vontlhe lava va nga tshamile hubyeni va lo mu cuwukisisa, va wona a nghohe yakwe yi fana ni nghohe ya ngelosi. [129]