Read tshwa Mitiro 8 Bible Online

Mitiro 8 - tshwa bible

Mitiro 8

¹Na yena Saule i lo vumela ka kufa ka Stefani. Hi lego siku ku lo vuka a kuxaniswa ka hombe ko vukela handla legi gi nga hi Jerusalema; vontlhe va lo hangalaswa matikweni ya Judia ni le Samaria, ku sala a vapostoli ntsena. [164]

²A vanhu va kholwako va lo mu lahla Stefani, va maha xirilo xa hombe ha yena. [165]

³Kanilezi Saule i lo hlasela a handla, a enghena tindlwini, a rorovisa a vavanuna ni vavasati, a va valela paxweni. [166]

⁴Zonake lava va nga hangalakile va lo fambafamba va kanela ivangeli. [167]

⁵Filipu i lo relela aya mutini wa le Samaria, a yaba hungu ka vona ha Kristu. [168]

⁶A zidlemo zi lo ingisa hi mbilu yinwe lezi zi nga kanelwa hi Filipu, laha zi nga zwile ni ku wona a ziwoniso lezi a nga zi maha.

⁷Hakuva a mimoya ya kubiha yi lo suka ka vanyingi lava va enghenilweko hi yona, yiba huwa hi gezu ga hombe; ni vanyingi lava va nga hi ni wubabyi gofa reve ga tlhelo, ni zilema, va lo hanyiswa. [169]

⁸Zonake ku wa hi ni kutsaka ka hombe mutini lowo.

⁹Kanilezi ku wa hi kona a munhu wo kari lomu mutini, a nga hi Simoni a vito gakwe, loyi a nga hi mungoma, a hlamalisa a vanhu va Samaria, a ti wula lezaku yena i munhu wa hombe. [170]

¹⁰Vontlhe va lo mu ingisa, a vatsongwani ni vahombe, vaku: Loyi munhu i ntamu wa Nungungulu lowu wu vitwako Wa hombe.

¹¹Va wa mu ingisa hakuva i wa va hlamalisile a xikhati xa hombe hi wungoma gakwe.

¹²Kanilezi laha va nga kholilwe ka Filipu, loyi a nga kanela ivangeli ya mufumo wa Nungungulu, ni vito ga Jesu Kristu, a vavanuna ni vavasati va lo bapatizwa. [171]

¹³Na yena Simoni i lo kholwa; anzhako ka kuva na a bapatizilwe i lo simamisa na Filipu; a hlamala nguvu hi ku wona a ziwoniso ni zirewukiso lezi zi nga mahiwa hi yena.

¹⁴Laha a vapostoli lava va nga hi le Jerusalema na va zwile lezaku a tiko ga Samaria gi amukele a mhaka ya Nungungulu, va lo rumela kabye Pedro na Johani.

¹⁵Vona laha na va relele kona, va lo va khongelela, lezaku va fela ku amukela a Moya wa ku Basa;

¹⁶hakuva wu wa nga se ku relela ni ka munwe wabye; va wa bapatizilwe ntsena a vitweni ga Hosi Jesu Kristu. [172]

¹⁷Zonake va lo va tlhateka a mandla, va amukela Moya wa ku Basa.

¹⁸Laha Simoni a nga wona lezaku a Moya wa ku Basa wa nyikiwa hi kutlhatekwa ka mandla ya vapostoli, i lota kabye ni mali,

¹⁹a taku: Nzi nyikeniwo lowu ntamu, lezaku kani hi wihi nzi ta nga mu tlhateka mandla, a fela ku amukela a Moya wa ku Basa.

²⁰Kanilezi Pedro aku ngalo kakwe: A mali ya wena a yi lobyiswe zinwe na wena, lezi u alakanyileko a ku kuma a xinyikiwo xa Nungungulu hi mali. [173]

²¹Wena a ku na xipanze hambu ni xiavelo mhakeni leyi; hakuva a mbilu ya wena a yi lulamangi mahlweni ka Nungungulu. [174]

²²Hikwalaho hunzuluka kubiheni ka wena, u kombela ka Hosi, kutani u nga tsetselelwa a kualakanya ka mbilu ya wena.

²³Hakuva nza wona lezaku u tele hi nyongwa ya kubava, ni ku bohiwa hi kuonha. [175]

²⁴Simoni i lo hlamula, aku: Nzi khongeleleni ka Hosi, kasi nzi nga humelwi hi nchumu xa lezi mu zi wulawulileko.

²⁵Hikwalaho laha a vapostoli na va kustumunyile, va kanela a mhaka ya Hosi, va lo tlhelela Jerusalema na va kanela ivangeli mitini yinyingi ya vaSamaria.

²⁶Kanilezi a ngelosi ya Hosi yiku ngalo ka Filipu: Suka u famba le Dzongeni, hi ndlela leyi yi relelako hi le Jerusalema yiya le Gaza, leyi yi nga xiwula. [176]

²⁷Yena i lo suka a famba. Zonake i lo wona a munhu wa le Etiopia, a thenwa ni nduna ya hombe ya Kandake, a muzinza wa vaEtiopia, a nga hi muhlayisi wa tshomba yakwe yontlhe. I wa tile Jerusalema ku ta khozela, [177]

²⁸laha a nga tlhelela kaya, i lo tshama kareteni yakwe, a gonza bhuku ga muprofeti Isaya.

²⁹A Moya wuku ngalo ka Filipu: Famba, u tshinelela a kareta leyiya.

³⁰Filipu i lo tsutsuma, a muzwa na a kari a gonza a bhuku ga muprofeti Isaya, aku ngalo: Xana wa zi pima lezi u zi gonzako ke?

³¹Yena aku ngalo: Nzi nga zi pima hikuyini loku nzi nga hi na mutlhamuseli? I lo kombela Filipu ku khilela a tshama naye.

³²Makunu a wutshamu ga lomo mitsalweni legi a nga kari a gonza hi legi: I lo yiswa kutlhabyiweni kota yivu, Khwatsi hi yivana leyi yi miyelako mahlweni ka mukayi wa yona, Lezo a nga vululangi nomu wakwe. [178]

³³A kutikoramiseni kakwe a nga lamuliwangi hi nongameto; Himani a ta nga tshawutela a xizukulwana xakwe ke? Hakuva a wutomi gakwe gi susilwe misaveni.

³⁴A nduna yiku ngalo ka Filipu: Hi nga nzi byela, a muprofeti i wula lezo hi mani ke? Hi wutsumbu gakwe, kutani hi munwani ke?

³⁵Filipu i lo vulula nomu wakwe, a sangula hi lowu mutsalo, a mu gonzisa ivangeli ya Jesu. [179]

³⁶Kota lezi va nga ha longoloka ni ndlela, va lo chikela laha ku nga ni mati. A nduna yi te ngalo; A mati hi lawa; xana nzi beletelwa hi yini ku bapatizwa?

³⁷Filipu aku: Loku u kholwa hi mbilu ya wena yontlhe u nga vumelwa. Yiku: Nza kholwa lezaku Jesu Kristu i Nʼwana wa Nungungulu.

³⁸Yi lo laya a kuva a kareta yi yima; va lo enghena matini hi wumbiri gabye, Filipu ni nduna; i lo yi bapatiza.

³⁹Laha va nga humele matini, a Moya wa Hosi wu lo wutla Filipu; ni nduna a ya ha mu wonangi kambe, hakuva yi lo simama ndleleni ya yona na yi tsakile. [180]

⁴⁰Kanilezi Filipu i lo kumiwa le Azota; zonake i lo kanela ivangeli mitini yontlhe a kala a chikela Kesaria.