Read tshwa Mitiro 9 Bible Online

Mitiro 9 - tshwa bible

Mitiro 9

¹Kanilezi Saule na a ha kukutela a ku dzukisa ni ku daya a vapizani va Hosi, i loya ka mupristi wa hombe, [181]

²a ya mu kombela a mapapilo ya kuya ha wona masinagogeni ya le Damasku, lezaku loku a kuma lava va lanzako leyi Ndlela, a vavanuna kutani vavasati, a fela ku va yisa Jerusalema na va bohilwe.

³Laha a nga wa famba, a tshinela Damasku, hi xitshuketi xa zalezo i lo ranzelwa hi kuwonekela ka le tilweni. [182]

⁴I lowa hasi, azwa a gezu gi ngaku ka yena: Saule, Saule, hi yini u nzi xanisako ke? [183]

⁵Yena aku ngalo: Hi wena mani Hosi ke? A Hosi yiku: Hi mina Jesu loyi u mu xanisako.

⁶Kanilezi suka, u enghena mutini, u ta byeliwa kona lezi u faneleko ku zi maha. [184]

⁷A vavanuna lava va nga mu pangalata, va lo yima vaku kaye, vazwa a gezu kanilezi a va wonangi munhu. [185]

⁸Saule i lo vuka hi lahasi; kanilezi laha a nga vulule mahlo a nga wonangi nchumu; va lo mu koka hi canja, va mu enghenisa Damasku.

⁹I lo tshama masiku manharu na a nga zi koti ku wona, a ngagi, hambu ni kunwa.

¹⁰Le Damasku ku wa hi kona a mupizani a tibyako Ananiasi. A Hosi yiku ngalo ka yena hi muwoniso: Ananiasi. Yena aku: Nzi laha, Hosi.

¹¹A Hosi yiku ngalo kakwe: Vuka, uya phangweni legi gi vitwako, Go Lulama, u ya lava le ndlwini ya Juda a munhu loyi a vitwako Saule wa le Tarsusi; hakuva wa khongela. [186]

¹²Hi muwoniso i wonile munhu a tibyako Ananiasi, a enghena a mu tlhateka mandla, lezaku a tlhela a wona.

¹³Kanilezi Ananiasi i lo hlamula, aku: Hosi, nzi zwile hi vanyingi hi munhu loyi, hi kubiha kontlhe loku a ku maheleko a vakubasa va wena le Jerusalema;

¹⁴ni kwalaha i na ni ntamu a wu kumileko ka vapristi va hombe, a ku ta boha vontlhe lava va khongelako hi vito ga wena. [187]

¹⁵Kanilezi a Hosi yiku ngalo ka yena: Famba, hakuva loyi hi xibya xi hlawulilweko xa mina, a ku yisa a vito ga mina ka vamatiko ni ka tihosi, ni ka vanana va ka Israeli; [188]

¹⁶hakuva nzi ta mu komba zontlhe lezi a ta nga xaniseka ha zona hi kota ya vito ga mina. [189]

¹⁷Ananiasi i lo famba, a ya enghena ndlwini, na a mu tlhateka mandla, aku ngalo: Saule, makabye, Hosi Jesu, loyi a nga woneka ka wena a ndleleni leyi u ngata ha yona, i nzi rumile lezaku u tlhela u wona, ni lezaku u tatiswa hi Moya wa ku Basa. [190]

¹⁸Khalekhale ku lowa hi le mahlweni yakwe zo kota magwaru, a tlhela a wona; i lo vuka a bapatizwa.

¹⁹Zonake i loga zakuga, a kuma ntamu. Yena i lo tshama masiku yo talana zinwe ni vapizani lava va nga hi le Damasku.

²⁰Zalezo i loba hungu hi Jesu lomu masinagogeni, lezaku i Nʼwana wa Nungungulu.

²¹Vontlhe lava va nga muzwa va lo hlamala, vaku: Xana a hi yena loyi a nga xanisa le Jerusalema lava va khongelako hi vito legi ke? I tile seno kasi a fela ku ta va yisa mahlweni ka vapristi va hombe na va bohilwe.

²²Kanilezi Saule i lo enzeleka hi ntamu, a hlula a vaJuda lava va nga hi le Damasku, a va kombisa lezaku Jesu hi Kristu. [191]

²³Laha na ku hunzile a masiku yo tala, a vaJuda va lo tsema khungo kasi ku mu daya, [192]

²⁴kanilezi a khungo gabye gi lo tiveka ka Saule. Vona va lo rinzela tinyangweni ta muti a mumu ni wusiku, lezaku va fela ku mu daya;

²⁵kanilezi a vapizani vakwe va lo mu teka ni wusiku, va mu relelisa hi xirunzu laha khurisini. [193]

²⁶Laha a nga chikele le Jerusalema i lo ringa ku ti tlhanganisa ni vapizani; kanilezi vontlhe va lo mu chava, va nga kholwi lezaku mupizani. [194]

²⁷Kanilezi Barnabasi i lo mu teka, a mu yisa ka vapostoli, a hlawutela ka vona hi ku yi wona kakwe a Hosi laha ndleleni, leyi yi nga wulawula naye; ni lezi a nga kanela hi ntamu hi vito ga Jesu le Damasku,

²⁸Zonake Saule i lo tshama navo Jerusalema, a enghena ni ku huma,

²⁹a kanela hi kutiya vitweni ga Hosi. Yena i lo wulawula ni ku kanetisana ni vaJuda va xiGreki; kanilezi vona va lo lava ku mu daya.

³⁰Laha a vamakabye va nga zi tivile, va lo mu yisa Kesaria, va mu rumela Tarsusi.

³¹Lezo a handla gi wa hi ni kurula a Judia gontlhe, ni le Galilea, ni le Samaria; gi lo akiswa gi famba kuchaveni ka Hosi ni kutangalisweni ka Moya wa ku Basa. [195]

³²Kota lezi Pedro a nga fambafamba matlhelweni wontihe, i lo chikela ni ka lavo vobasa va nga wa akile le Lida.

³³A kuma kona a munhu a vitwako Eneasi, loyi a nga wa etlele sangweni a ntlhanu wa malembe ni manharu, hakuva i wa file reve ga tlhelo.

³⁴Pedro aku ngalo kakwe: Eneasi, Jesu Kristu wa ku hanyisa: vuka, u songa a sango ga wena. Zalezo i lo vuka. [196]

³⁵Vontlhe lava va nga wa akile le Lida, ni le Xaroni, laha va nga mu wona va lo hunzulukela ka Hosi.

³⁶Le mutini wa Jopa ku wa hi ni mupizani wa xisati a vitwako Tabita, lezo hi ku ngalo Dorkasi, loyi a nga tele hi mitiro yo saseka, ni ku nyika zinyikiwo ka zisiwana. [197]

³⁷Hi ka lawo masiku i lo babya, afa. Laha va nga mu hlazile, va lo mu veka ndlwini ya le xitezi.

³⁸Kota lezi Lida ku nga hi kusuhani ni le Jopa, a vapizani na va zwile lezaku Pedro i kona laho, va lo rumela a vavanuna vambiri, va ya mu kombela vaku: U nga hlweli kuta ka hina.

³⁹Pedro i lo suka a famba navo. Laha a nga chikele va lo mu yisa ndlwini ya le xitezi; zonake a tinoni tontlhe ti lota kakwe na ti rila, ti mu komba a mabhaji ni tinguwo lezi a nga zi rungile Dorkasi laha a nga ha hi navo.

⁴⁰Kanilezi Pedro i lo va humesa vontlhe, a khizama a khongela; zonake na a hunzulukele xirumbini, i te ngalo: Tabita, vuka! Yena i lo hafula mahlo, ni laha a nga wona Pedro, i lo vuka a tshama. [198]

⁴¹Yena i lo mu khoma hi canja, a mu yimisa; zonake i lo vitana a vobasa ni tinoni, a mu yimisa mahlweni kabye, na a hanya.

⁴²A mhaka leyi yi lo tiveka le Jopa gontlhe, ni vanyingi va lo kholwa ka Hosi.

⁴³Anzhako ka lezo Pedro i lo tshama masiku yo tala le Jopa, a kaya ka Simoni a nga hi mufuki wa madzowo. [199]