Read tshwa Va le Roma 1 Bible Online

Va le Roma 1 - tshwa bible

Va le Roma 1

¹Paule, a nanza ga Jesu Kristu, nzi vitanilweko a kuva mupostoli, nzi bambanyiselwa ku kanela ivangeli ya Nungungulu, [1]

²leyi Nungungulu a nga yi tsumbisile a kaleloko hi vaprofeti vakwe lomu Mitsalweni yo basa; [2]

³yi nga ivangeli hi Nʼwana wakwe, loyi a nga belekiwa lixakeni la Davida hi tlhelo ga miri.

⁴A kombisiwa hi ntamu lezaku i Nʼwana wa Nungungulu hi Moya wa wubaswa, hi kuvuka kakwe hi ka vafileko. Hi yena Jesu Kristu a Hosi ya hina, [3]

⁵loyi nzi nga amukela hi yena a tipswalo ni wupostoli, lezaku a vitweni gakwe nzi yisa a vanhu va matiko wontihe a kuingiseni ka kukholwa. [4]

⁶A xikari ka vona nwinawu mu vitanilwe a kuva va ka Jesu Kristu.

⁷Mina Paule nza rungula nwina nwentlhe mu nga le Roma, nwina varanziwa va Nungungulu mu vitanilweko a kuva vobasa, nziku: A tipswalo ni kurula a zive na nwina, zi tako hi ka Nungungulu Dadani wa hina ni ka Hosi Jesu Kristu.

⁸A kusangula nza bonga Nungungulu wa mina ha Jesu Kristu hi kota ya nwina nwentlhe, hi lezi a kukholwa ka nwina ka zwakala misaveni yontlhe. [5]

⁹Hakuva Nungungulu loyi nzi mu tirelako hi moya wa mina ivangelini ya Nʼwana wakwe, i kustumunyu wa mina lezaku a nzi tsiki ku mu alakanya.

¹⁰Nza kombela xontlhe xikhati mikombelweni ya mina, lezaku nzi ngava ni thomo ga kuta ka nwina loku Nungungulu a zi ranza. [6]

¹¹Hakuva nza navela ku mu wona, kasi nza fela ku mu nyika a xinyikiwo xo kari xa ka moya, lezaku mu fela ku tiyiswa. [7]

¹²Hi lezaku, loku nzi hi xikari ka nwina nzi fela ku tsakiswa zinwe na nwina hi kukholwa loku ku nga kona ka hina hontlhe, a ka nwina ni ka mina.

¹³Hakuva nza ranza ku mu tivisa, vamakabye, lezaku nzi xuvile zikhati zinyingi a ku mu enzela, kasi nza kuma mihanzu xikari ka nwina kambe, khwatsi hi ka vanwani vamatiko, kanilezi nzi lo khameka kala ni lezi. [8]

¹⁴Nzi na ni nanzu ka vaGreki ni ka vanwani vamatiko, a ka vatlharihileko ni ka maphuphulu. [9]

¹⁵Hikwalaho mina nzi longile a ku kanela ivangeli ni ka nwina mu nga le Roma.

¹⁶Hakuva a nzi na tingana hi ivangeli, hakuva i ntamu wa ku hanyisa ni wihi loyi a kholwako; a ka muJuda kusangula, ni ka muGreki kambe. [10]

¹⁷Hakuva a kululama ka Nungungulu ku wonekelisilwe ka yona, ku huma kukholweni ku yisa kukholweni; khwatsi hi lezi ku tsalilweko ku ngalo: Loyi a lulamileko i ta hanya, hi kukholwa. [11]

¹⁸Hakuva a zanga ya Nungungulu ya wonekeliswa hi le tilweni hehla ka kontlhe a kungakholwi ni kungalulami ka vanhu, lava va thindekisako a zinene hi kungalulami kabye. [12]

¹⁹Hakuva lezi zi nga tibyiwako ha Nungungulu zi wonekelisilwe kupimeni kabye, hakuva Nungungulu i lo zi wonekelisa ka vona. [13]

²⁰Hakuva a matshamela yakwe ma nga wonekiko, wu nga ntamu wakwe wa pinzukelwa ni wunungungulu gakwe, ma wonekile maku dlunya kusukela kuvangiweni ka misava, hakuva ma tibyiwa hi mitiro yakwe. Hikwalaho a va na ku ti pendla. [14]

²¹Hakuva na va mu tivile Nungungulu, a va mu dumisangi kota Nungungulu, hambu ni ku mu bonga; kanilezi va lo hunzukela za hava kualakanyeni kabye, ni timbilu tabye leti ti nga vumala kutlhariha ti lo pfhupeliswa. [15]

²²Na va ti wula lezaku va tlharihile, va lo maha maphuphulu. [16]

²³Va lo hunzulusa a wukosi ga Nungungulu loyi a nga fiko, gi fanana ni xifananiso xa munhu a fako, ni xa zinyanyani, ni zihari za mune wa milenge, ni zikokakoka. [17]

²⁴Hikwalaho Nungungulu i lo va tsikeleta kunaveleni ka timbilu tabye; lezaku va ti nyenyezisa, va wisana tingana a mimiri yabye. [18]

²⁵Hakuva va lo tsika a zinene za Nungungulu va tsumba mawunwa, va lo khozela ni ku tirela a xivangwa, na ku nga hi Muvangi wa xona, loyi a khesiwako kala kupinzuka. Amen! [19]

²⁶Hi kota ya lezo Nungungulu i lo va nyikela kunaveleni ka kubiha: a vavasati vabye va lo hunzula a mahanyela ya mimiri yabye va maha za tingana. [20]

²⁷Hizalezo ni vavanuna, va lo tsika a mahanyela yo tiva vavasati, va vura hi ku navelana, a vavanuna va maha lezi za tingana ni vanwani vavanuna, va kuma mimirini yabye a tsayiselelo wu faneleko a kuhambuka kabye.

²⁸Kota lezi va nga ala ku mu tiva Nungungulu, Nungungulu i lo va nyikela kupimeni ku solekako, va maha zilo lezi zi nga faneliko. [21]

²⁹Va tele hi kungalulami kontlhe, ni kubiha, ni timbilu, ni matsoho; va tele hi makangwa, a kudaya, a kukanetisana, a kukanganyisa, a mona; a vahlevi,

³⁰a valumbeti, lava va vengekako ka Nungungulu, a vo kala xichawo, a vamatshanza, ni vatikukumukisako, a vasangulisi va zobiha, lava va nga ingisiko vapswali,

³¹a va nga hiko na kupima, a va nga tsumbekiko, lava va nga ranziko a va ka kabye, vo kala wuxinji;

³²lava vaku hambu va wu tiva a nayo wa Nungungulu, lezaku lava va mahako a zilo za kunghahi va fanelwe hi kufa, va zi maha, kambe va yimela lava va zi mahako.