Read tshwa Va le Roma 11 Bible Online

Va le Roma 11 - tshwa bible

Va le Roma 11

¹Hikwalaho nziku: Nungungulu i hoxile vanhu vakwe ke? Kokwihi! Hakuva na mina nzi muIsraeli, wa lixaka la Abrahama, wa nyimba ya ka Benjamini. [185]

²Nungungulu a nga hoxangi a vanhu vakwe lava a nga va tiva hi kale. Kutani mu kohlwa hi lezi mutsalo wu zi wulako ha Elija ke? Lezi a nga khongelisa zona a ranisa a va ka Israeli ka Nungungulu, aku: [186]

³Hosi, va dele a vaprofeti va wena, va khungumule a maalati ya wena; nzi sele nzoce, ni makunu va hlota a wutomi ga mina. [187]

⁴A hlamulo ya Nungungulu yi te yini kakwe ke? Yi ngalo: Nzi ti siyele a 7,000 wa vavanuna lava va nga khizamangiko mahlweni ka Baali.

⁵Hizalezo ni ka lexi xikhati, yi kona a misalela yi hlawulilweko hi tipswalo. [188]

⁶Kanilezi loku ziya hi tipswalo, a za hayi hi mitiro; hakuva loku zi hi tano a tipswalo a ta hi tipswalo. [189]

⁷Zi te yini ke? Lezi Israeli a nga zi lava a nga zi kumangi; lava va hlawulilweko va zi kumile, kanilezi vanwani va lo nonohiswa. [190]

⁸Kota lezi ku tsalilweko ku ngalo: Nungungulu i lo va nyika a moya wo khudzehela, ni mahlo yo kala ma nga woni, ni tindleve leti ti nga ingisiko; kala nyamutlha lezi hi zalezo. [191]

⁹Na Davida i ngalo: A meza yabye a yi hunzuke yi maha tlhamu ni ziyo, Ni kuva xikhunguvanyiso ni tsayiselelo ka vona. [192]

¹⁰A mahlo yabye a ma pfhupeliswe, lezaku va nga woni, U koramisa a hlana wabye xikhati xontlhe.

¹¹Zonake nzi ngalo: Xana va lo khunguvanyeka lezaku va wela magumo ke? Kokwihi! Kanilezi hi kuwa kabye a kuhanyiswa ku chikele ka vamatiko, kasi a vaIsraeli vava ni xiluse. [193]

¹²Makunu loku a kuwa kabye ku fumisile tiko, ni kulahlekelwa kabye ku hi kufuma ka vamatiko, zi nga ta hunzisa nguvu loku va hunzuluka vontlhe ke? [194]

¹³Kanilezi nzi wulawula ka nwina lava mu nga vamatiko. Kota lezi nzi nga mupostoli wa vamatiko, nzi dzunza a ntiro wa mina; [195]

¹⁴lezaku kutani nzi ta vuxa xiluse xikari ka vona lava va nga maxaka ya mina, nzi hanyisa vanwani va vona. [196]

¹⁵Hakuva loku a kuhoxiwa kabye ku hunzukile kuva a kutlhanganyiswa ka misava, xana a kuamukelwa kabye ku tava yini? ku tava kuhanya ka kuvuxiwa hi ka vafileko.

¹⁶Loku a xibaba xo sangula xi basile, yi basile ni mbila yontlhe; ni loku a mutsu wu basile, ma maha lezo ni maravi. [197]

¹⁷Kanilezi loku manwani maravi ma phatlulwe, na wena loyi u nga oliva wa lomu khwatini, na u tlhomilwe xikari ka wona, u hlengela nawo a mutsu Wa kunona wa sinya ya oliva, [198]

¹⁸u nga ti kukumukisi hehla ka maravi, kanilezi loku u ti kukumukisa, alakanya lezaku a hi wena u rweleko a mutsu, hi wona mutsu wu rwalako wena. [199]

¹⁹Zonake u taku ngalo: A maravi ma phatlulwe lezaku mina nzi fela ku tlhomiwa kona.

²⁰Kunenewe, ma phatlulwe hi kota ya kungakholwi kabye, na wena u yimile hi kukholwa ka wena. U nga ti kukumukisi, kanilezi chava. [200]

²¹Hakuva loku Nungungulu a nga tsikangi a maravi ya zimilwa, a nga ta ku tsika na wena.

²²Langutani a wunene ga Nungungulu ni mona wakwe: a mona ka lava va ngawa, kanilezi a wunene ga Nungungulu ka wena, loku u simamisa wuneneni gakwe; loku zi nge nghaho wenawu u ta tsemiwa. [201]

²³Na vonawu loku va tsika a kungakholwi kabye, va ta tlhomiwawu, hakuva Nungungulu i na ni ntamu a ku va tlhoma kona kambe. [202]

²⁴Lezi wena u nga tsemiwa lomu sinyeni leyi yi nga ya khwati hi mahanyela, u tlhomiwa lomu sinyeni yo saseka ya oliva na ku nga hi mahanyela; nguvunguvu lava va nga maravi ya zimilwa, va ta tlhomiwa lomu sinyeni yabye ya oliva.

²⁵Hakuva vamakabye, a nzi ranzi lezaku mu kohlwa hi fihlakalo lowu, mu nga dzuka mu alakanya lezaku mu tlharihile; lezaku a vaIsraeli va nonohisile a xipanze xa vona, va kala va enghena a vamatiko vontlhe; [203]

²⁶zonake a vaIsraeli vontlhe va ta hanyiswa, kota lezi ku tsalilweko, ku ngalo: Ku ta huma a Mutlhatlhisi hi le Zioni, I ta susa a zivi zontlhe ka Jakobe. [204]

²⁷Lexi xi tava xivumelwano xa mina zinwe navo, Laha nzi ta nga susa a zionho zabye. [205]

²⁸Hi tlhelo ga ivangeli mbalala va Nungungulu hi kota ya nwina; kanilezi hi tlhelo ga kuhlawulwa, varanziwa hi kota ya vakokwani. [206]

²⁹Hakuva a zinyikiwo ni kuvitana ka Nungungulu a zi na kuhunzuka. [207]

³⁰Hakuva kota lezi nwina mu wa nga ingisi Nungungulu a xikhatini xa kale, kanilezi makunu mu mahelwe wuxinji hi kota ya kungaingisi kabye,

³¹hizalezo na vonawu a va ingisangi, lezaku kasi hi wuxinji legi gi mahelweko nwina, na vonawu va fela ku mahelwa wuxinji.

³²Hakuva Nungungulu i nyikele vanhu vontlhe a kungaingiseni, lezaku a fela ku va mahela wuxinji yontlhe.

³³Mangabye a kueta ka kufuma ni kutlhariha ni wutivi ka Nungungulu! A kulamula kakwe a ku na ku pimiwa, ni tindlela takwe a ti na ku tibyiwa.

³⁴Hakuva himani a tivileko a kupima ka Hosi? kutani himani a nga yi nyika wusungukati ke? [208]

³⁵Kutani himani a rangileko ku yi nyika nchumu, lowu yi faneleko a ku wu tlhelisela ke? [209]

³⁶Hakuva zilo zontlhe zita hi ka yena, zi mahilwe hi yena, zi mahelwe yena. A wudzunzo a give ka yena kala kupinzuka. Amen. [210]