Read tshwa Va le Roma 12 Bible Online

Va le Roma 12 - tshwa bible

Va le Roma 12

¹Hikwalaho vamakabye, nza mu khongotela hi wuxinji ga Nungungulu, lezaku mu nyikela a mimiri ya nwina, yiva a muphahlelo wu hanyako, wo basa, lowu wu xalalisako Nungungulu, ku nga kukhozela ka nwina ku faneleko. [211]

²Ngha mu nga pimanyisi a tiko ga nguva leyi; kanilezi ngha mu hunzuluswa hi ku mahiwa luswa a kupima ka nwina, kasi mu fela ku hlola mu tiva lezi zi nga kuranza ka Nungungulu, loku ko saseka, ku amukelekako, ni ku mbheleleko. [212]

³Hi kota ya tipswalo leti nzi nyikilweko tona, nza laya munwe ni munwani a nga xikari ka nwina, lezaku a nga dzuki a ti alakanyela hi ku hunza fanelo; kanilezi a alakanya hi ku ti koramisa, hi ku ecanyisa ni lipimo la kukholwa leli Nungungulu a aveleko munwe ni munwani. [213]

⁴Hakuva kotisa lezi hi nga ni ziro zinyingi mirini munwe, ni ziro zontlhe a zi hlengeli ntiro munwe,

⁵hizalezo na hinawu lava hi nga vanyingi, hi miri munwe ka Kristu, munwe ni munwani xiro xa vanwani. [214]

⁶Kota lezi hi nga ni zinyikiwo zi hambeneko hi kota ya tipswalo leti hi nyikilweko tona, a hi tireni ha zona, kutani kuprofeta, a hi profeteni kota lipimo la kukholwa ka hina; [215]

⁷loku munhu a nyikilwe a ntiro, ngha a chela kota ha wona; ni loyi a gonzisako, a chele kota hi kugonzisa kakwe; [216]

⁸kutani loyi a khongotelako, a ti nyikele kukhongoteleni kakwe; ni loyi a nyikako, a nyike hi matsenya; loyi a angamelako, a mahe lezo hi kupangama; ni loyi a mahako mitiro ya wuxinji, a zi mahe na xalele. [217]

⁹Ngha liranzo li nga hi na kuxengetela. Vengani lezi za kubiha; mu namarela ka lezi zo saseka. [218]

¹⁰Ranzanani hi liranzo la wumakabye; loyi ni loyi a dzunza munwani ku hunza wutsumbu.

¹¹Mu nga lolohi kupinyameni ka nwina; vurani moyeni, mu tirela a Hosi. [219]

¹²Tsakani kutsumbeni ka nwina, mu timisela kukaratekeni, mu simamisa mu tiyile kukhongeleni. [220]

¹³Vunetelani a vobasa kuvumaleni kabye; mu amukela vapfhumba hi kutsaka. [221]

¹⁴Va katekiseni lava va mu xanisako; katekisani, mu nga rukateli. [222]

¹⁵Tsakani zinwe ni lava va tsakako, mu rila ni lava va rilako.

¹⁶Ngha mu hi ni mbilu yinwe munwe ni munwani; mu nga naveli a zilo zi tlakukileko, kanilezi hlengelani ni lava va koramileko. Mu nga ti alakanyeli muku mu tlharihile.

¹⁷Mu nga tlheliseli a munhu kubiha hi kubiha. Chelani kota hi zilo zi nene mahlweni ka vanhu vontlhe.

¹⁸Loku zi maheka, ni loku nwina mu zi kota, tshamani hi kurula ni vanhu vontlhe.

¹⁹Mu nga ti photeli varanzekako, kanilezi tlhalukelani a zanga ya Nungungulu; hakuva ku tsalilwe ku ngalo; A kuphota ka mina, mina nzi ta tlhelisela, ku wula Hosi. [223]

²⁰Kanilezi loku a nala wa wena azwa ndlala, mu phamele zakuga; loku azwa tora, muhe zakunwa; hakuva hi ku maha lezo u ta wungeletela a makhala ma vurako hlokweni yakwe. [224]

²¹U nga hlulwi hi kubiha, kanilezi hlula a kubiha hi ku maha zo saseka. [225]