Read tshwa Va le Roma 13 Bible Online

Va le Roma 13 - tshwa bible

Va le Roma 13

¹Ngha na munwe ni munwani a ingisa a mufumo; hakuva a ku na mufumo wu nga yimiswangiko hi Nungungulu; a wuhosi legi gi nga kona gi yimisilwe hi Nungungulu. [226]

²Hikwalaho loyi a alako mufumo, i vukela a kulaya ka Nungungulu; ni lava va ku vukelako va ta koniwa.

³Hakuva a vafumeli a va chabyiwi hi munhu loyi a mahako kusaseka, sine loyi a mahako kubiha. Xana wa ranza a kuva u nga chavi mufumo ke? Maha lezi zo saseka, na wena u ta dzunziwa ha wona. [227]

⁴Hakuva a mufumeli i nanza ga Nungungulu a ku ku mahela zo saseka. Kanilezi loku u maha lezi zi bihileko, chava; hakuva mufumeli a nga khomi supado mahala; hakuva yena i nanza ga Nungungulu, a muphoteli wa zanga ka loyi a mahako kubiha.

⁵Hikwalaho zi lavekile a kuva mu ingisa, na ku nga hi kota ya ku chava zanga ntsena, kanilezi kambe hi kota ya livalo. [228]

⁶Hi xigelo lexi mu humesa mikhupo; hakuva a vafumeli malanza ya Nungungulu, ma pinyamileko ntirweni lowu.

⁷Nyikani ka vontlhe lezi zi va faneleko: a khupo ka loyi a faneleko ku khupelwa; a nzhuvo ka loyi a faneleko ku lubyiwa; mu chava loyi a faneleko ku chabyiwa, mu dzunza loyi a faneleko ku dzunziwa. [229]

⁸Ngha mu nga hi na nanzu ka munhu, sine ku ranzana ntsena; hakuva loyi a ranzako a munhu-kulobye i tatisa nayo. [230]

⁹Hakuva a milayo leyi yi nge ngalo: U nga bhayi, U nga dayi, U nga yivi, U nga naveli, hambu ni wihi nayo munwani, yontlhe yi tlhanganyisilwe mhakeni leyi yaku: U ta ranza a waakelane kota lezi u ti ranzako wutsumbu. [231]

¹⁰A liranzo a li mahi za kubiha ka waakelane wakwe; hikwalaho a liranzo hi kutatisa ka nayo.

¹¹Mahani zontlhe lezi, hakuva ma zi tiva lezaku xikhati xa ku vuka wurongweni; hakuva i nyamutlha lezi a kuhanyiswa ku le kusuhi na hina a ku hunza a xikhatini lexo hi nga sangula ku kholwa. [232]

¹²A wusiku gi hunzile, ni kuca ku tshinele; hikwalaho a hi tsikeni a mitiro ya munyama, hi hloma a matlhari ya kuwonekela. [233]

¹³A hi fambeni hi fanelo, khwatsi hi laha hlikanhini; na ku nga hi wudakwa ni kupopiwa, ni wuoswi, ni manyala, ni kuholovisana, ni wukhuxu. [234]

¹⁴Kanilezi ambalani a Hosi Jesu Kristu, mu nga alakanyeli a nyama, a kuva mu lanza a kunavela ka yona. [235]