Read tshwa Va le Roma 2 Bible Online

Va le Roma 2 - tshwa bible

Va le Roma 2

¹Hikwalaho wena munhu a ku na ku ti phendla, hambu u hi mani wena u lamulako vanwani; hakuva loku u lamula munwani wa ti kona wutsumbu, hakuva wena loyi u lamulako wa maha zalezo zilo.

²Hakuva ha zi tiva lezaku Nungungulu wa lamula hi zinene lava va mahako a zilo za kunghahi. [22]

³Wena munhu u lamulako lava va mahako a zilo zo kota lezo; na wenawu u kari u zi maha, wa alakanya lezaku u ta pona a kulamula ka Nungungulu ke? [23]

⁴Kutani u kanyisa a kutala ka wunene gakwe ni kuhunisela ni kutimisela kakwe ke? A ku zi tivi lezaku a wunene ga Nungungulu gi lava ku ku kokela kuhunzulukeni ke? [24]

⁵Hi kunonoha ka mbilu ya wena leyi yi nga hunzulukiko u ti vekela zanga a sikwini ga zanga, laha ku ta nga wonekeliswa a kulamula ku lulamileko ka Nungungulu, [25]

⁶loyi a ta nga tlhelisela munwe ni munwani kotisa mitiro yakwe. [26]

⁷I ta nyika wutomi ga pinzukelwa ka vona lava va lavako a wukosi ni kudzunziwa ni kungaboli, na va timisela mitirweni yo saseka. [27]

⁸Kanilezi lava va kanetako va nga ingisi zinene, va ingisa kungalulami, va ta welwa hi zanga ni khulo. [28]

⁹A kukarateka ni hlomulo zi tava hehla ka muhefemulo wa munhu loye a tirako za kubiha, a ka muJuda kusangula, ni ka muGreki kambe. [29]

¹⁰Kanilezi munwe ni munwani loye a mahako kusasa i tava ni wukosi ni kudzunziwa ni kurula, a ka muJuda kusangula, ni ka muGreki kambe. [30]

¹¹Hakuva Nungungulu a nga na xihlawulela. [31]

¹²Hakuva vontlhe lava va onhileko na va nga hi na nayo, va tafa na va nga ni na nayo; ni vontlhe lava va onhileko na va hi lahasi ka nayo, va ta lamulwa hi nayo.

¹³Hakuva a hi vazwi va nayo va nga lulamile mahlweni ka Nungungulu, kanilezi hi vamahi va nayo va ta nga hlayelwa kululama. [32]

¹⁴Hakuva a vamatiko lava va nga hiko na nayo, loku va maha a zilayelo za nayo hi mahanyela, vona na va nga hi na nayo, vova nayo vona wutsumbu xikari kabye;

¹⁵hakuva va kombisa lezaku a mitiro ya nayo yi tsalilwe timbilwini tabye, a livalo labye li va mahela wukustumunyu, ni maalakanyo yabye ma va kona kutani ku va tlhatlha.

¹⁶Zi tava tano hi siku lego Nungungulu a ta nga lamula a zigungu za vanhu ha Jesu Kristu, kotisa lezi yi wulako a ivangeli leyi nzi yi kanelako. [33]

¹⁷Wena u na nga ni vito gaku u muJuda, u tsumba nayo, u ti tlakusa hi Nungungulu; [34]

¹⁸u tiva kuranza kakwe, ni ku pima a zilo zi sasekileko, kota lezi u gonzisilweko hi navo, [35]

¹⁹u ti tsumba lezaku u mukoki wa zikhumu, ni kuwonekela ka lava va nga munyameni,

²⁰ni mululeki wa zipumbu, ni mugonzisi wa vanana, kota lezi u nga ni xiyimo xa wutivi ni xa zinene lomu nayweni, [36]

²¹makunu wena loyi u gonzisako munwani, a ku ti gonzisi wutsumbu ke? Wena loyi u kanelako lezaku ku nga yibyiwi, wa yiva ke? [37]

²²Wena loyi u wulako uku ngalo, munhu a nga bhayi, wa bhaya wena ke? Wena loyi u nyenyako zifananiso, wa phanga titempeli ke? [38]

²³Wena loyi u ti tlakusako hi nayo, wa wisa tingana Nungungulu hi ku hambukisa a nayo ke?

²⁴Ku tsalilwe ku ngalo: A vito ga Nungungulu ga rukatelwa xikari ka vamatiko hi kota ya nwina. [39]

²⁵Hakunene a wukwera ga vuna loku u hlayisa nayo; kanilezi loku u hi muhambunyeti wa nayo, a wutshiva ga wena gi mahile wukhuna. [40]

²⁶Hikwalaho loku a khuna gi hlayisa a ziyimiso za nayo, a wukhuna gakwe gi nga ta hlayiwa kota wutshiva ke? [41]

²⁷Loyi a nga khuna hi kupswalwa, loku yena a hlayisa nayo, a nga ta ku kona wena loyi u hambunyetako nayo, hambu lezi u nga ni nayo wu tsalilweko, ni wukwera ke? [42]

²⁸Hakuva a muJuda wa zinene, a hi yena a nga yena hi lahandle ntsena; hambu ni wutshiva a hi legi ga nyama. [43]

²⁹Kanilezi a muJuda wa zinene, hi loyi a nga yena lomu mbilwini; a wutshiva hi legi gi nga ga mbilu, legi gi mahiwako moyeni, na ku nga hi kota ya kutsala; yena a nga khesiwi hi vanhu, kanilezi hi Nungungulu. [44]