Read tshwa Va le Roma 3 Bible Online

Va le Roma 3 - tshwa bible

Va le Roma 3

¹Xini lexi a muJuda a hunzako vanwani ha xona ke? kutani i bhinzu muni hi ku enghena wukwera ke?

²Ina, va bhinzula hi matlhelo wontihe. Hi kusangula hilezi va nga yimiswa a kuva vahlayisi va timhaka ta Nungungulu. [45]

³Hakuva zi na ni yini loku vanwani va vona va nga kholwangi ke? A kungakholwi kabye ku ta maha kutsumbeka ka Nungungulu ku nga tiri nchumu ke? [46]

⁴Kokwihi! Ngha Nungungulu a kumiwa na a lulamile, hambu loku vanhu vontlhe va kumiwa na va hi vahembi; kota lezi ku tsalilweko ku ngalo: Kasi u fela ku kumeka na u lulamile timhakeni ta wena, U hlula loku uya kulamulweni. [47]

⁵Kanilezi loku a kungalulami ka hina ku kombisa a nongameto ya Nungungulu, hi taku yini ke? Kasi Nungungulu a nga lulamangi loku a tsayisa hi zanga ke? (Nza wulawula kota vanhu.) [48]

⁶Kokwihi! Hakuva loku zi hi nghaho Nungungulu i ta lamulisa kuyini misava ke? [49]

⁷Hakuva loku a wunwa ga mina gi wonekelisa a zinene za Nungungulu gi mu kulisa, hi yini nza ha lamulwako kota muonhi ke?

⁸Hikuyini hi nga wuliko hiku: A hi maheni kubiha kasi ku fela ku huma kusaseka? (kota lezi vanwani va hi hlevako vaku hi wula zona hina). A kukoniwa ka vakunghahi ku va ringene. [50]

⁹Zo yini makunu ke? Hina vaJuda ha va hunza ke? Kokwihi! Hi sina hi wulile lezaku a vaJuda ni vaGreki hi wumbiri gabye va lahasi ka kuonha. [51]

¹⁰Kota lezi ku tsalilweko ku ngalo: A nga kona a lulamileko, ne hambu ni munwe; [52]

¹¹A nga kona loyi a zi pimako, A nga kona loyi a lavako Nungungulu.

¹²Vontlhe va hambukile tlhelweni, vontlhe va mahile va nga nyawuliko; A nga kona loyi a mahako kusaseka, ge hambu ni munwe.

¹³A nkolo wabye xilahla xi vululekileko; Va khohlisa hi tirimi tabye; A wuxungu ga tinyoka gi lomu nzeni ka milomu yabye. [53]

¹⁴A nomu wabye wu tele hi tinzhukano ni kubava. [54]

¹⁵A mikonzo yabye yi na ni mazambo a kuya halata nkhata. [55]

¹⁶A kuhahlulwa ni kukarateka zi le tindleleni tabye.

¹⁷A ndlela ya kurula a va yi tivi.

¹⁸A ku kona kuchava Nungungulu mahlweni yabye. [56]

¹⁹Makunu ha zi tiva lezaku zontlhe lezi a nayo wu zi wulako, wa wula zona ka lava va nga lahasi ka nayo; lezaku kasi ku valiwa milomu yontlhe, ni misava yontlhe yiva ni nanzu mahlweni ka Nungungulu. [57]

²⁰Hakuva a ku na nyama yi ta nga hlayelwa kululama mahlweni kakwe hi mitiro ya nayo; hakuva a nayo wa tivisa hi kuonha. [58]

²¹Kanilezi makunu ku wonekelisilwe a kululama ka Nungungulu a handle ka nayo, na ku kustumunyelwe hi nayo ni vaprofeti, [59]

²²ku nga kululama ka Nungungulu ku tako hi kukholwa ka Jesu Kristu a ka vontlhe va kholwako. A ku na kuhambana, [60]

²³hakuva vontlhe va onhile, va vumala a kuhatima ka Nungungulu. [61]

²⁴Na va nga hi na fanelo va hlayelwa kululama hi kota ya tipswalo takwe, hi kota ya kutirulwa loku ku nga ka Kristu Jesu; [62]

²⁵loyi Nungungulu a nga mu yimisa a kuva nzhiho hi nkhata wakwe, wu amukelwako hi kukholwa. Lezi zi kombisa a kululama ka Nungungulu, hakuva kuhuniseleni kakwe i wa tsikile a zionho zi nga mahiwa kale; [63]

²⁶lezaku a kululama kakwe ku wonekeliswa xikhatini xa makunu, kasi a kumeka na a lulamile, ni lezaku a hlayela kululama loyi a kholwako ka Jesu.

²⁷Makunu ku kwihi a kutikulisa ka hina ke? Ku susilwe! Ku susilwe hi nayo muni? Hi nayo wa mitiro ke? Ahihi, ku susilwe hi nayo wa kukholwa. [64]

²⁸Hakuva ha tiyisa lezaku munhu i hlayelwa kululama a handle ka mitiro ya nayo. [65]

²⁹Xana Nungungulu i Nungungulu wa vaJuda voce ke? A hi Nungungulu wa vamatiko kambe ke? Ina, ngwa vamatiko kambe,

³⁰kota lezi a nga Nungungulu munwe, loyi a ta nga hlayela kululama a zitshiva hi kota ya kukholwa, ni lavava makhuna hi kona kukholwa.

³¹Makunu hi fuvisa a nayo wu nga hi nchumu hi kukholwa ke? Kokwihi! ho tiyisa a nayo.