Read tshwa Va le Roma 4 Bible Online

Va le Roma 4 - tshwa bible

Va le Roma 4

¹Hi taku yini hi Abrahama, a koko wa hina hi ka nyama?

²Hakuva loku Abrahama a hlayelwe kululama hi kota ya mitiro, i nazo zo ti kulisa ha zona, kanilezi na ku nga hi mahlweni ka Nungungulu.

³Hakuva a Mitsalo yi yini ke? Abrahama i lo kholwa ka Nungungulu, ku lo hlayelwa ka yena lezaku kululama kakwe. [66]

⁴Makunu ka loyi a tirako a hakhelo a wu hlayiwi a ku khwatsi ngwa tipswalo, kanilezi khwatsi hi ku rihiwa. [67]

⁵Kasi loyi a nga tiriko, kanilezi a kholwa ka loyi a hlayelako muonhi kululama, a kukholwa kakwe ku hlayelwa lezaku kululama. [68]

⁶Na Davida i wula hi makatekwa ya munhu loyi Nungungulu a mu hlayelako kululama a handle ka mitiro, aku: [69]

⁷Va katekile lava a kubiha kabye ku tsetselelweko, Lava a zionho zabye zi fenengetilweko. [70]

⁸I katekile a munhu loyi a Hosi yi nga mu hlayeliko kuonha.

⁹A kukateka loku ku wuliwa ka zitshiva ntsena ke, kutani ni ka lava va makhuna ke? Hakuva hi ngalo: Ka Abrahama a kukholwa kakwe ku lo hlayelwa lezaku kululama.

¹⁰Makunu ku lo hlayelwa kakwe xikhati muni? Hi laha a nga hi xitshiva, kutani hi laha a nga ha hi khuna ke? Ku wa nga hi laha a nga hi xitshiva, kanilezi na a ha hi khuna.

¹¹I lo amukela a xikombiso xa ku enghena wukwera, xi maha xifungo xa kululama ka kukholwa loku a nga hi nako na a nga seva xitshiva. Lezaku kasi a fela ku maha raru wa vontlhe va kholwako, hambu loku va hi makhuna, kasi a kululama ku fela ku hlayelwa ka vona. [71]

¹²Lezaku a maha raru wa zitshiva, na ku nga hi ku enghena wukwera ntsena, kanilezi na va lanzela a ndlela ya kukholwa loku a dadani wa hina Abrahama a nga hi nako na a ha hi khuna.

¹³Hakuva a xitsumbiso lexi xi nga mahiwa ka Abrahama ni pswalo wakwe, lezaku i tava mugi wa tshomba ya misava, a xi mahiwangi ka yena hi nayo, kanilezi hi kota ya kululama ka kukholwa. [72]

¹⁴Hakuva loku lava va nga va nayo va hi zigatshomba, a kukholwa ku mahilwe a xilo xa mahala, ni xitsumbiso a xi vuni nchumu. [73]

¹⁵Hakuva a nayo wu vanga zanga, kanilezi laha ku nga hava nayo, a ku kona ni ku hambunyeta nayo.

¹⁶Hi lezaku ku kumiwa hi kukholwa, kasi ku fela ku nyikiwa hi kota ya tipswalo; lezaku a xitsumbiso xi fela ku tiya ka pswalo wakwe wontihe, na ku nga hi ka lava ntsena va nga ni nayo, kanilezi ni ka lava va kholwako ku kota Abrahama, loyi a nga dadani wa hina hontlhe. [74]

¹⁷Kota lezi ku tsalilweko ku ngalo: Nzi ku mahile a raru wa tixaka tinyingi. I maha lezo mahlweni ka Nungungulu loyi a nga kholwa kakwe, loyi a hanyisako lava va fileko, a wulawulako hi zilo zi nga hiko kona, a ku khwatsi hi loku zi hi kona. [75]

¹⁸Hambu lezi ku nga hi hava kutsumba, yena i lo kholwa na a hi ni kutsumba, lezaku i ta maha a raru wa matiko manyingi; khwatsi hi lezi a nga wa byelilwe ku ngalo: Wu tava lezo a pswalo wa wena. [76]

¹⁹Yena a nga vangi na gome kukholweni, laha a nga cuwuka a miri wakwe lowu wu nga ku khwatsi wu file (hakuva i wa hi ni zana ga malembe), ni kona kufa ka marumbu ya Sara. [77]

²⁰Ina ni xitsumbiso xa Nungungulu, a nga kanakanangi ha xona hi kungakholwi, kanilezi i lo tiyiswa kukholweni na a dumisa Nungungulu.

²¹Na a zi tivisisile khwatsi lezaku lezi Nungungulu a zi tsumbisileko i na ni ntamu a ku zi maha.

²²Hikwalaho ku lo hlayelwa ka yena lezaku kululama.

²³Makunu loku zi tsalilwe lezaku i hlayelwe kululama, a zi tsalelwangi yena yece, [78]

²⁴kanilezi ku lo tsaliwa hi kota ya hina kambe, lava ku ta nga hlayelwa ka hina, hina, lava hi kholwako ka yena loyi a nga vuxa Jesu a Hosi ya hina hi ka vafileko, [79]

²⁵loyi a nga nyikelwa hi kota ya zihambuko za hina, a vuxiwa, kasi hi fela ku hlayelwa kululama. [80]