Read tshwa Va le Roma 5 Bible Online

Va le Roma 5 - tshwa bible

Va le Roma 5

¹Hikwalaho na hi hlayelwe kululama hi kukholwa, hi na ni kurula ni Nungungulu hi Hosi ya hina Jesu Kristu; [81]

²Loyi hi kumileko ha yena a kuenghena ka hina tipswalweni leti hi nga ka tona; hi maha migiyo ya kutsaka na hi kari hi langutela a kungangamela ka Nungungulu. [82]

³Na ku nga hi lezi ntsena, kanilezi kambe hi na ni zigingi kukaratekeni ka hina, na hi tiva lezaku a kukarateka ku vanga kuhonisela; [83]

⁴ni kuhonisela ku vanga kutiya minzhingweni, ni kutiya minzhingweni ku vanga kutsumba.

⁵A kutsumba a ku wisi tingana, hakuva a liranzo la Nungungulu li chelilwe timbilwini ta hina hi Moya wa ku Basa lowu hi nyikilweko wona. [84]

⁶Hakuva na ha hi ni gome, Kristu i lo fela hi xikhati xi faneleko lava va nga chaviko Nungungulu.

⁷Hakuva za tsanza ka munhu ku fela loyi a lulamileko, kutani ku ngava kona munhu loyi a tiyako ku fela munhu nene.

⁸Kanilezi Nungungulu wa kombisa a kuhiranza kakwe hi lexi, lezaku na ha hi vaonhi Kristu i lo hi fela. [85]

⁹Nguvunguvu lezi makunu hi hlayelweko kululama hi kota ya nkhata wakwe, hi ta poniswa zangeni hi yena. [86]

¹⁰Hakuva loku hi tlhanganyisilwe na Nungungulu hi kota ya kufa ka Nʼwana wakwe, na hi wa ha hi valala, nguvunguvu lezi makunu hi tlhanganyisilweko hi ta hanyiswa hi wutomi gakwe. [87]

¹¹Na ku nga hi lezo ntsena, kanilezi kambe ha tsaka ka Nungungulu hi kota ya Hosi ya hina Jesu Kristu, loyi hi kumileko makunu a kutlhanganyiswa ha yena.

¹²Hikwalaho khwatsi hi lezi a kuonha ku nga enghena misaveni hi kota ya munhu munwe, ni kufa ku tile hi kota ya kuonha; hizalezo a kufa ku lo thapela vanhu vontlhe, hakuva vontlhe va onhile. [88]

¹³Hakuva kuonha ku wa hi kona misaveni na wu nga seva kona nayo, kanilezi vanhu a va hlayelwi kuonha loku nayo wu hi hava. [89]

¹⁴Ahembalokoke, kusukela ka Adamu ku kala ku chikela ka Mosi, a kufa ku lo fuma ni le hehla ka vona lava va nga onhangiko khwatsi hi kuhambuka ka Adamu, loyi a nga wa hi mufananiso wa loyi a nga wa hata.

¹⁵Kanilezi a xinyikiwo xa wuxinji a xi fanani ni xihambuko. Hakuva loku a vanyingi vafile hi kota ya xihambuko xa munhu munwe, hikwalaho ti anzisilwe nguvunguvu ka vanyingi a tipswalo ta Nungungulu, ni xinyikiwo xa tipswalo xi tileko hi munhu munwe, yena Jesu Kristu. [90]

¹⁶Kambe a xinyikiwo a xi fanani ni lexi xi nga huma kuonheni ka loye wa munwe. Hakuva a kulamula ku tile hi kota ya xionho xinwe ku yisa kukonekeni, kanilezi a xinyikiwo xa wuxinji xi tile hi kota ya zihambuko zinyingi, xi yisa kululameni.

¹⁷Hakuva loku hi xihambuko xa munhu munwe a kufa ku fumile ha yena loye wa munwe; nguvunguvu vona lava va amukelako a wunyingi ga tipswalo ni xinyikiwo xa kululama va ta fuma wutomini hi kota ya munwe, yena Jesu Kristu.

¹⁸Hikwalaho khwatsi hi lezi a xihambuko xinwe xi nga humesa kulamula hehla ka vanhu vontlhe, hizalezo ku kona ka vanhu vontlhe a kuhlayelwa kululama loku ku yisako wutomini hi kota ya ntiro munwe wa kululama. [91]

¹⁹Hakuva khwatsi hi lezi hi kungaingisi ka munhu munwe a vanyingi va lo mahiwa vaonhi, hizalezo kambe hi kuingisa ka munwe a vanyingi va ta mahiwa volulama.

²⁰Kambe a nayo wu lota lezaku kasi a xihambuko xi anza; kanilezi laha kuonha ku nga anza, a tipswalo ti lo anza nguvunguvu; [92]

²¹lezaku kota lezi a kuonha ku nga fuma kufeni, lezo kambe a tipswalo ti fela ku fuma hi kululama ku yisako wutomini ga pinzukelwa ha Jesu Kristu a Hosi ya hina.