Read tshwa Va le Roma 6 Bible Online

Va le Roma 6 - tshwa bible

Va le Roma 6

¹Makunu hi taku yini ke? Hi ta simamisa kuonheni lezaku a tipswalo ti fela ku anza ke?

²Kokwihi! Hina lava hi fileko hi tlhelo ga kuonha, xana hi nga ha hanyisa kuyini lomu ka kona ke? [93]

³Kutani a mu zi tivi nwina lezaku hina hontlhe hi nga bapatizelwa ka Kristu Jesu, hi lo bapatizelwa kufeni kakwe ke? [94]

⁴Hikwalaho hi lahlilwe zinwe naye kufeni hi kubapatiza; lezaku kota lezi Kristu a nga vuxiwa hi ka vafileko hi kungangamela ka Dadani, hizalezo na hinawu hi fela ku famba hi mahanyela maswa. [95]

⁵Hakuva loku hi tlhanganyisilwe zinwe naye hi ku fanana ka kufa kakwe, hi ta tlhanganyiswa naye kambe hi ku fanana ni kuvuka kakwe; [96]

⁶na hi tiva lezaku a munhu wa hina wa kale i belelwe zinwe naye, kasi a miri wa kuonha wu fela ku hetiswa, lezaku hi nga havi tikhumbi ta kuonha, [97]

⁷Hakuva loyi a fileko i tirulwe kuonheni.

⁸Kanilezi loku hi file zinwe na Kristu, ha kholwa lezaku kambe hi ta hanya naye; [98]

⁹na hi tiva lezaku lezi Kristu a vuxilweko hi ka vafileko a nga ta hafa kambe; a kufa a ka hi na ntamu hehla kakwe. [99]

¹⁰Hakuva a kufa loku a ngafa ha kona, i lofa kanwe hi tlhelo ga kuonha; kanilezi a kuhanya loku a hanyako ha kona, i hanyela Nungungulu.

¹¹Hizalezo na nwinawu, ti wuleni lezaku mu file hi tlhelo ga kuonha, kanilezi mu hanyela Nungungulu ka Kristu Jesu. [100]

¹²Hikwalaho ngha mu nga vumeli a kuonha ku fuma mirini wa nwina wa kufa, lezaku mu ingisa a kunavela ka wona. [101]

¹³Hambu ni ku nyikela a ziro za nwina kuonheni ziva matlhari ya kungalulami; kanilezi ti nyikeleni ka Nungungulu, khwatsi hi lava va humileko kufeni va hanya, ni ziro za nwina ziva matlhari ya kululama ya ku tirela Nungungulu.

¹⁴Hakuva a kuonha ku nga ta kuva ni ntamu hehla ka nwina; hakuva nwina a mu lahasi ka nayo, kanilezi mu lahasi ka tipswalo. [102]

¹⁵Hi taku yini ke? Hi ta onha lezi hi nga hiko lahasi ka nayo, kanilezi hi lahasi ka tipswalo ke? Kokwihi! [103]

¹⁶Xana a mu zi tivi lezaku mu malanza ya nwinyi loyi mu ti nyikelako kakwe, mu maha malanza ya loyi mu mu ingisako, kutani ya kuonha loku ku yisako kufeni, hambu ya kuingisa loku ku yisako kululameni ke?

¹⁷A ku bongiwe Nungungulu, hakuva hambu lezi mu nga hi malanza ya kuonha, mu zi kotile a ku ingisa a gonzisela legi mu nga nyikiwa gona.

¹⁸Makunu na mu tlhatlhisilwe kuonheni, mu mahile malanza ya kululama. [104]

¹⁹Nzi wula hi mawulawulela ya vanhu hi kota ya gome ga nyama ya nwina. Khwatsi hi lezi mu nga nyikela a ziro za nwina a kuva malanza ya kungahlazeki ni ya kubiha mu anza kubiheni, hizalezo makunu nyikelani a ziro za nwina a kuva malanza ya kululama lezaku muya kubasisweni.

²⁰Hakuva laha mu nga hi malanza ya kuonha, mu wa tlhatlhekile hi tlhelo ga kululama.

²¹Kanilezi mu wa bhinzula yini xikhatini lexo ke? Ntsena a zilo lezi mu nga ni tingana ha zona makunu! hakuva a magumeso ya zona hi kufa.

²²Kanilezi makunu na mu tlhatlhisilwe kuonheni, na mu hi malanza ya Nungungulu, mu bhinzule a kubasiswa, ni magumeso ya kona hi wutomi ga pinzukelwa.

²³Hakuva a hakhelo ya kuonha hi kufa, kanilezi a xinyikiwo xa Nungungulu hi wutomi ga pinzukelwa ha Jesu Kristu a Hosi ya hina. [105]