Read tshwa Va le Roma 7 Bible Online

Va le Roma 7 - tshwa bible

Va le Roma 7

¹Xana a mu zi tivi vamakabye (nzi wulawula ni lava va tivako nayo), lezaku a munhu i fumelwe hi nayo a xikhati xontlhe xa kuhanya kakwe ke?

²A wasati loyi a tekilweko i bohilwe hi nayo ka nuna wakwe loku a ha hanya, kanilezi loku nuna wakwe a file, i tlhatlhisilwe nayweni wa nuna. [106]

³Hikwalaho ke, loku yena a tekiwa hi munwani wanuna na a ha hanya a nuna wakwe, yena i ta wuliwa aku xibhayi; kanilezi loku a file a nuna wakwe, zonake i tlhatlhekile nayweni; lezo a nga hi xibhayi hambu loku a tekiwa hi munwani wanuna. [107]

⁴Hizalezo na nwina vamakabye va mina, mu file hi tlhelo ga nayo hi miri wa Kristu; aku kasi mu fela ku tlhanganyiswa ka munwani, a nga yena loyi a vuxilweko hi ka vafileko, lezaku hi fela ku humesa mihanzu ka Nungungulu. [108]

⁵Hakuva laha hi nga ha hi nyameni, a kunavela ka kuonha loku ku nga hi kona hi kota ya nayo, ku lo tira zirweni za hina, lezaku hi humesa mihanzu ya kufa. [109]

⁶Kanilezi makunu hi tlhatlhisilwe nayweni, hi file ka lezo hi nga wa bohilwe ha zona; lezaku hi khozela hi mahanyela maswa ya ka Moya, na ku nga hi mahanyela ya kale ya nayo wu tsalilweko. [110]

⁷Zonake hi taku yini? A nayo kuonha ke? Kokwihi! Ahembalokoke, ngha nzi nga ku tivangi a kuonha ahandle ka nayo; hakuva ngha nzi nga ku tivangi a kunavela, loku a nayo wu wa nga wulangi, wuku: U nga naveli, [111]

⁸Kanilezi a kuonha ku lo kuma xikhati hi kota ya xileletelo ku vuxa nzeni ka mina a tixaka tontlhe ta kunavela; hakuva ahandle ka nayo a kuonha ku file. [112]

⁹Nzi wa kari nzi ti hanyela handle ka nayo; kanilezi na ku chikele a kulaya a kuonha ku lo vuka, zonake mina nzi lofa;

¹⁰ni kulaya loku ku nga vekelwe wutomi, ku lo nzi vangela kufa. [113]

¹¹Hakuva a kuonha na ku kumile xikhati hi kota ya kulaya, ku lo nzi kanganyisa ku nzi daya ha kona.

¹²Lezoke a nayo wu basile, ni kulaya ku basile, ku lulamile ni kusaseka, [114]

¹³Xana lezi zi sasekileko zi nzi vangele kufa ke? Kokwihi! Kanilezi hi kuonha ku nzi vangeleko kufa hi lezi zi sasekileko, kasi ku fela ku wonekeliswa lezaku kuonha; lezaku a kuonha ku fela ku hunzisa ku biha hi kota ya kulaya.

¹⁴Hina ha zi tiva, lezaku a nayo ngwa moya; kanilezi mina nzi na ni matshamela ya nyama, nzi xavisilwe wukhumbini ga kuonha. [115]

¹⁵Hakuva lezi nzi zi mahako a nzi zi tivi; hakuva lezi nzi ranzako ku zi maha a nzi zi mahi, kanilezi nzi maha lezi nzi zi vengako. [116]

¹⁶Kanilezi loku nzi maha lezi nzi nga zi ranziko, nza vumela lezaku a nayo wu nene.

¹⁷Makunu lezo a hi mina nzi zi mahako, kanilezi hi kuonha loku ku tshamileko xikari ka mina.

¹⁸Hakuva nza zi tiva lezaku a kusaseka a ku tshami xikari ka mina, lezo hiku ngalo, lomu nyameni ya mina; a kuxuva aku maha kusaseka ku kona, kanilezi a nzi na ntamu wa ku maha lezi zi sasekileko. [117]

¹⁹Hakuva a kusaseka loku nzi ku ranzako a nzi ku mahi; kanilezi a kubiha loku nzi nga ku ranziko, hi kona nzi ku mahako.

²⁰Kanilezi loku nzi maha lezi nzi nga zi ranziko, a nza hi mina nzi zi mahako, kanilezi hi kuonha loku ku tshamileko xikari ka mina.

²¹Lezoke, hi tlhelo ga nayo nza kuma lezaku, a kubiha ku kona ka mina loyi nzi ranzako ku maha kusaseka.

²²Hakuva nza tsakela a nayo wa Nungungulu hi munhu loyi a nga xikari ka mina. [118]

²³Kanilezi nza wona munwani nayo zirweni za mina, lowu wu lwako ni nayo wa kupima ka mina, wu nzi kokela wukhumbini ga nayo wa kuonha lowu wu nga kona zirweni za mina.

²⁴Munhu wa makhombo hi mina! Himani a ta nga nzi hlanguta mirini lowu wa kufa ke?

²⁵A ku khesiwe Nungungulu hi Jesu Kristu a Hosi ya hina! Lezoke nza tirela Nungungulu hi kupima ka mina, kanilezi a nayo wa kuonha nza wu tirela hi nyama.