Read tshwa Va le Roma 9 Bible Online

Va le Roma 9 - tshwa bible

Va le Roma 9

¹Nzi wula zinene mahlweni ka Kristu, a nzi hembi wunwa, ni livalo la mina la nzi mahela wukustumunyu ka Moya wa ku Basa,

²lezaku nzi na ni wusiwana ga hombe ni kubayisa ku nga mbheliko lomu mbilwini ya mina.

³Hakuva nzi wa ta ranza a kuva nzi rukatelwe mina wutsumbu, nzi hoxiwa ka Kristu, loku a vamakabye va mina va nga vuneka ha zona, lava va nga maxaka ya mina hi ka nyama. [146]

⁴Va nga vaIsraeli, lava a wunʼwana gi nga gabye, ni wudumo, ni xivumelwano, ni nayo, ni wukhozeli ga tempeli, ni zitsumhiso. [147]

⁵A vakokwani vabye; Kristu i lo huma kabye hi ka nyama, loyi a nga hehla ka zontlhe, Nungungulu loyi a bongiwako kala kupinzuka. Amen. [148]

⁶Kanilezi a hi ku khwatsi a mhaka ya Nungungulu yi tsanzekile; hakuva a vaIsraeli a hi vona vontlhe va nga huma hi ka Israeli. [149]

⁷Hambu loku va hi va pswalo wa Abrahama, a hi vona vontlhe va nga vana; hakuva ku tsalilwe ku ngalo: A pswalo wa wena wu ta huma hi ka Isaka. [150]

⁸Lezo hi ku ngalo, lava va nga vana hi ka nyama, a hi vona va nga vana va Nungungulu; kanilezi hi vana va xitsumbiso va wuliwako lezaku i pswalo.

⁹Hakuva a mhaka ya xitsumbiso hi leyi: Nzi ta wuya hi xikhati lexi ha nwakani na Sara i tava ni nʼwana. [151]

¹⁰Na ku nga hi lezo ntsena, kanilezi na yena Rebeka na a hi ni nyimba ya Isaka a koko wa hina, [152]

¹¹hakuva a vanana na va nga se ku belekiwa, hambu ni ku maha zo saseka kutani za kubiha, lezaku a khungo ga Nungungulu hi tlhelo ga kuhlawula gi fela ku simama, hi kota ya yena loyi a vitanako, na ku nga hi kota ya mitiro, [153]

¹²ku wulilwe ka yena Rebeka, ku ngalo; A nhonzwa yi ta tirela a nzisana.

¹³Khwatsi hi lezi ku tsalilweko ku ngalo: Jakobe nzi lo mu ranza, nzi venga Esau. [154]

¹⁴Zonake hi taku yini ke? Ku kona a kungalulami ka Nungungulu ke? Kokwihi! [155]

¹⁵Hakuva yena i te ngalo ka Mosi: Nzi ta mu zwela wusiwana loyi nzi mu zwelako wusiwana; nzi ta mu mahela wuxinji loyi nzi mu mahelako wuxinji. [156]

¹⁶Hikwalahoke, a ziti hi kuranza ka munhu, kutani hi kutikarata kakwe, kanilezi zita hi ka Nungungulu loyi a nga ni wuxinji. [157]

¹⁷Hakuva a mutsalo wu ngalo ka Faro: Nzi lo ku vuxa lezaku kasi nzi fela ku wonisa a ntamu wa mina ha wena, ni lezaku a vito ga mina gi zwakala misaveni yontlhe. [158]

¹⁸Hikwalaho yena wa mu zwela wusiwana loyi a zi ranzako ku mu zwela, ni ka loyi a zi ranzako ku mu nonohisa wa mu nonohisa.

¹⁹Zonake wena u taku ngalo ka mina: Xana Nungungulu wa ha solela yini ke? hakuva himani a nga alelako a kuranza kakwe ke? [159]

²⁰Munhu nzi wena, u mani wena u ta nga kanetisana na Nungungulu ke? Xana a mbita yi ngaku ka loye a yi wumbileko: Hi yini u nzi wumbisileko lezi ke? [160]

²¹Xana a muwumbi a nga na ntamu hehla ka wumba, a kuva hi xipanze xinwe xa wumba a wumba a xibya xinwe xo khesiwa, ni xinwani xi nga khesiwiko ke? [161]

²²Nungungulu na a ranza ku wonisa a zanga yakwe ni ku kombisa a ntamu wakwe, kutani loku a timisela nguvu hi zibya lezi za zanga lezi zi longiselweko a kudawa, u taku yini ke, [162]

²³loku a ranzile ku wonekelisa a wukulu ga kungangamela kakwe a zibyeni za wuxinji, lezi a nga zi longisela wudumo hi kale?

²⁴Nzi wula hina lava a nga hi vitana, na ku nga hi ka vaJuda voce, kanilezi ni ka vamatiko kambe.

²⁵Khwatsi hi lezi a wulako lomu ka Hosea, ku ngalo: Lava va nga kala va nga hi vanhu va mina, Nzi ta va vitana nziku, Mbanhu va mina; Ni loyi a nga kala ku ranziwa, nzi ta mu vitana nziku: Xiranzwa! [163]

²⁶Ku ta maheka lezaku a wutshanwini legi ku nga wulilwe kabye ku ngalo: A mu vanhu va mina, Kwalaho va ta vitanwa ku ngalo: Vana va Nungungulu a hanyako. [164]

²⁷Na Isaya iba hungu ha Israeli, aku: Hambu loku a tsengo wa vanana va Israeli wuku khwatsi i seke ga bimbi, misalela basi yi ta nga hanyiswa. [165]

²⁸Hakuva a Hosi yi ta tatisa a mhaka ya yona misaveni, yi yi tsema hi xihatla. [166]

²⁹Khwatsi hi lezi Isaya a nga wula hi kale, aku: Loku a Hosi yi wa nga hi siyelangi a vanana, Ngha hi fanene ni Sodoma, ni ku khwatsi hi Gomora. [167]

³⁰Zonake hi taku yini ke? Hi ngalo, a vamatiko lava va nga kala va nga hloti a kululama, va ku kumile, a kululama loku ku nga ka kukholwa.

³¹Kasi vaIsraeli lava va nga ringa ku tatisa nayo wa kululama va wu tsanzekile. [168]

³²Hikuyini ke? Hilezi va nga kala ku wu lava hi kukholwa, kanilezi va wu lava hi mitiro. Va lo khunguvanyeka ribyeni ga xikhunguvanyiso: [169]

³³khwatsi hi lezi ku tsalilweko, ku ngalo: Langutani, nza veka a ribye ga xikhunguvanyiso le Zioni, A ribye legi gi ta nga va wisa; Loyi a kholwako ka gona a nga tawa tingana. [170]