Read tshwa 1 Va le Korinte 1 Bible Online

1 Va le Korinte 1 - tshwa bible

1 Va le Korinte 1

¹Paule loyi a vitanilweko hi kuranza ka Nungungulu a kuva mupostoli wa Jesu Kristu, na Sostene a makabye wa hina, [1]

²ha losa a bandla ga Nungungulu legi gi nga le Korinte, lava va basisilweko ka Kristu Jesu, lava va vitilweko a kuva vobasa, zinwe ni vontlhe lava va khongelako hi vito ga Hosi ya hina Jesu Kristu matshanwini wontihe, yi nga Hosi yabye ni ya hina, hiku: [2]

³A tipswalo a tive ka nwina ni kurula ka le ka Nungungulu a Dadani wa hina, ni ka Hosi Jesu Kristu.

⁴Nza bonga Nungungulu wa mina xikhati xontlhe hi kota ya nwina, loku nzi alakanya a tipswalo ta Nungungulu leti mu nyikilweko tona ka Kristu Jesu;

⁵lezaku hi ka yena mu fumisilwe zilweni zontlhe, hi tlhelo ga kuwulawula kontlhe ni kutiva kontlhe. [3]

⁶Ni wumboni ga Kristu gi tiyisilwe xikari ka nwina, [4]

⁷a kuva mu nga vumali xinyikiwo ni xinwe xa ka moya, na mu kari mu rinzela a kuwonekeliswa ka Hosi ya hina Jesu Kristu;

⁸loyi a ta nga mu tiyisa kala magumeso, lezaku mu kumeka na mu nga hi na kusoleka a sikwini ga Hosi ya hina Jesu Kristu. [5]

⁹Nungungulu i tsumbekile, loyi a mu vitanileko a ku ta hlengela ni Nʼwana wakwe Jesu Kristu a Hosi ya hina. [6]

¹⁰Makunu nza mu khongotela, vamakabye, hi vito ga Hosi ya hina Jesu Kristu, lezaku mu wulawula xilo xinwe, kasi ku ngavi kona kuhambana xikari ka nwina, kanilezi mu zwanana hi kualakanya ni kupima.

¹¹Hakuva nzi bikelwe ha nwina, vamakabye, hi va ka Kloe, lezaku kukanetana ku kona xikari ka nwina.

¹²Nzi wula lezo hakuva a munwe wa nwina i ngalo: Mina nzi wa Paule, ni munwani aku: Mina nzi wa Apolose; kutani, Mina nzi wa Kefasi; niku: Mina nzi wa Kristu. [7]

¹³Xana Kristu i avanyiselwa ke? Paule i wa belelelwe nwina ke? Kutani mu wa bapatizilwe vitweni ga Paule ke? [8]

¹⁴Nza bonga Nungungulu hakuva a nzi bapatizangi munhu xikari ka nwina, sine Krispusi na Gaiusi; [9]

¹⁵kasi ku ngavi kona munhu xikari ka nwina a wulako lezaku mu bapatizilwe vitweni ga mina.

¹⁶Nzi lo bapatiza ni va lomo ngangweni wa Stefanasi; a handle ka vona a nzi tivi loku nzi bapatizile vanwani. [10]

¹⁷Hakuva Kristu a nga nzi rumelangi a ku bapatiza, kanilezi ku kanela ivangeli; na nzi nga kaneli hi wutlhari ga timhaka, lezaku kasi a xihambano xa Kristu xi nga dzuki xi lahlekelwa hi ntamu wa xona. [11]

¹⁸Kunene a mhaka ya xihambano mbupumbu a ka lava va lovako; kanilezi i ntamu wa Nungungulu ka hina lava hi hanyiswako. [12]

¹⁹Hakuva ku tsalilwe ku ngalo: Nzi ta mbhetisa a wutlhari ga titlhari, Nzi tsanzekisa a wutivi ga lava va tivako. [13]

²⁰I kwihi loyi a tlharihileko? I kwihi loyi a tivako mitsalo? I kwihi a mukaneti wa nguva leyi? Xana Nungungulu a nga mahangi a wutlhari ga misava giva wupumbu ke? [14]

²¹Hakuva lezi a kutlhariheni ka Nungungulu a misava yi nga kala ku mu tiva Nungungulu hi wutlhari ga yona, zi lo mu xalalisa Nungungulu a ku hanyisa lava va kholwako hi wupumbu ga kukanela ka hina. [15]

²²Hakuva a vaJuda va kombela zirewukiso ni vaGreki va lava wutlhari; [16]

²³kanilezi hina hi kanela Kristu loyi a belelweko; loyi a nga xikhunguvanyiso ka vaJuda, ni wupumbu ka vamatiko; [17]

²⁴kanilezi ka vona lava va vitanilweko, hambu va hi vaJuda kutani vaGreki, Kristu i ntamu ni wutlhari ga Nungungulu. [18]

²⁵Hakuva a wupumbu ga Nungungulu gi hunza vanhu hi wutlhari, ni gome ga Nungungulu gi hunza vanhu hi ntamu. [19]

²⁶Kakuva alakanyani a kuvitanwa ka nwina vamakabye, lezaku a ku vitaniwangi vanyingi va tlharihileko hi ka nyama, a hi vanyingi lava va nga ni ntamu, a hi vanyingi vahombe va tiko. [20]

²⁷Kanilezi Nungungulu i lo hlawula lezi za wupumbu za misava, lezaku a fela ku wisa tingana lava va tlharihileko; Nungungulu i lo hlawula lezi za gome za misava, lezaku a fela ku wisa tingana lezi zi nga ni ntamu; [21]

²⁸ni zilo zi nga nyawuliko, a zilo zi nyenyekako, Nungungulu i lo zi hlawula, ina, ni lezi zi nga hiko nchumu, Nungungulu i lo zi hlawula lezaku a fela ku mbhetisa a zilo lezi zi nga kona; [22]

²⁹kasi ku ngavi kona munhu a ti kulisako mahlweni ka Nungungulu.

³⁰Kanilezi i ntiro wakwe lezi nwina mu nga ka Kristu Jesu, loyi Nungungulu a nga mu yimisa a kuva wutlhari ga hina, ni kululama ka hina, ni kubasiswa ni kutirulwa.

³¹Lezaku ku maheka lezi zi tsalilweko, za ku ngalo: Loyi a ti kulisako a ti kulisele Hosini. [23]