Read tshwa 1 Va le Korinte 10 Bible Online

1 Va le Korinte 10 - tshwa bible

1 Va le Korinte 10

¹Vamakabye, nza ranza lezaku mu zi tiva ku ngalo, a vakoko vontlhe va hina va wa hi lahasi ka refu, vontlhe va lo tsemakanya bimbi; [145]

²vontlhe va lo bapatizelwa ka Mosi a refini ni lomu bimbini;

³vontlhe va loga a kuga kunwe ka moya; [146]

⁴vontlhe va lonwa a kunwa kunwe ka moya; hakuva va lonwa ribyeni ga moya legi gi nga va pangalata; a ribye lego gi wa hi Kristu. [147]

⁵Kanilezi a linyingi labye Nungungulu i wa nga tsaki ha vona, hi kota ya lezo va lo lobyiswa xiwuleni.

⁶Lezi zilo za hi laya lezaku kasi hi nga naveli a zilo za kubiha, kota lezi vona va nga navela.

⁷Mu ngavi vakhozeli va zifananiso, khwatsi hi vanwani va vona; kota lezi ku tsalilweko, ku ngalo; A vanhu va lo tshama lahasi vaga, vanwa, va suka va hlakana. [148]

⁸Ngha hi nga mahi wubhayi kota vanwani ya vona va nga maha wubhayi, vafa hi siku ginwe 23,000 wa vanhu. [149]

⁹Ngha hi nga ringi Hosi, kota vanwani va vona va nga yi ringa, va dawa hi tinyoka. [150]

¹⁰Kambe mu nga monyi, kota vanwani va vona va nga monya, va lobyiswa hi mudayi.

¹¹Zontlhe lezi zi lo humelela ka vona kasi ku maha xikombiso, zi lo tsaliwa kasi ku hi luleka, hina lava hi chikelelweko hi zikhati zo gumesa. [151]

¹²Hikwalaho loyi a alakanyako lezaku i yimile, a ti wonele, a nga dzuka awa.

¹³A mu se nga humelwa hi nzhingo ahandle ka lowu munhu a wu kotako ku rwala; Nungungulu i tsumbekile, a nga ta vumela a kuva mu ringwa ku hunza a ntamu wa nwina; kanilezi i ta mu mahela a ndlela ya kupona loku wuta nzhingo, kasi mu ta zi kota ku wu rwala. [152]

¹⁴Hikwalaho varanzekako, chavani a ku khozela zifananiso.

¹⁵Nzi wulawula ku khwatsi hi ka lava va tlharihileko; pimani nwina venyi lezi nzi zi wulako.

¹⁶A gombe ga zikatekiso legi hi gi khesako, a hi gona ga hlengelo wa nkhata wa Kristu ke? Ni xibaba lexi hi xi khemako a hi xona xa hlengelo wa miri wa Kristu ke? [153]

¹⁷Lezi ku nga ni xibaba xinwe, hina hi nga vanyingi hi miri munwe, hakuva hina hontlhe higa xibaba xwalexi xa xinwe. [154]

¹⁸Langutani a vaIsraeli hi ka nyama: vona lava va gako miphahlo a va hlengeli ni alati ke? [155]

¹⁹Zonake nzi yini ke? Lezi zi phahlelweko zifananisweni i nchumu ke? Kutani xifananiso i nchumu ke?

²⁰Ahihi, kanilezi nziku, lezi a vamatiko va zi phahlelako, va phahlela madimoni, a va phahleli Nungungulu; a nzi zi ranzi lezaku mu hlengela ni madimoni. [156]

²¹A mu zi koti kunwa a gombe ga Hosi ni gombe ga madimoni; a mu zi koti ku gela mezeni ya Hosi, ni mezeni ya madimoni, [157]

²²Xana ha yi vuxela xiluse a Hosi ke? Xana ha yi hunza hi ntamu ke? [158]

²³Zontlhe zilo zi vumelekile, kanilezi a hi zona zontlhe zi vunako. Zontlhe zilo zi vumelekile, kanilezi a hi zona zontlhe zi akako.

²⁴Ngha na munhu a nga ti laveli a zakwe ntsena, kanilezi munwe ni munwani a mu lavele a kusasa a waakelane wakwe. [159]

²⁵Zontlhe lezi zi xaviswako bazarini, ganani; mu nga wutisi nchumu hi kota ya livalo.

²⁶Hakuva a misava nja Hosi, ni zontlhe zi nga ka yona. [160]

²⁷Loku munwe wa lava va nga kholwiko a mu ramba mubuzweni, na mu ranza a kuya, ganani zontlhe lezi zi vekiwako mahlweni ka nwina, mu nga wutisi nchumu hi kota ya livalo. [161]

²⁸Kanilezi loku munhu aku ka nwina: Lezi zi phahlelwe zifananiso, mu ngagi hi kota ya yena loyi a mu tivisileko, na hi kota ya livalo. [162]

²⁹A nzi wuli a livalo la wena, kanilezi a la munwani; hakuva a kutlhatlheka ka mina ku nga lamuliswa kuyini hi livalo la munwani ke? [163]

³⁰Hakuva loku nziga hi kubonga, nzi solelwa yini hi lezi nzi bongileko ha zona ke?

³¹Hikwalaho loku muga, kutani munwa, kani hi xihi lexi mu xi mahako zi maheni zontlhe ziva kudzunzwa ka Nungungulu. [164]

³²Mu nga mahi xikhunguvanyiso ka vaJuda, hambu ka vaGreki, kutani bandleni ga Nungungulu;

³³khwatsi hi lezi na minawu nzi tsakisako vanhu vontlhe zilweni zontlhe, nzi nga ti laveliko lezi zi vunako mina, kanilezi nzi lava lezi zi vunako laʼvo tala, lezaku va fela ku hanyiswa.