Read tshwa 1 Va le Korinte 11 Bible Online

1 Va le Korinte 11 - tshwa bible

1 Va le Korinte 11

¹Mahani vapimanyisi va mina, kotisa mina nzi nga mupimanyisi wa Kristu. [165]

²Nza mu khesa hilezi ma nzi alakanya ka zilo zontlhe, mu gonga a mikhuwo leyi nzi nga mu nyika yona. [166]

³Kanilezi nzi ranza a kuva mu tiva lezaku a hloko ya wanuna munwe ni munwani hi Kristu, ni hloko ya wasati hi nuna wakwe, ni hloko ya Kristu hi Nungungulu. [167]

⁴A wanuna munwe ni munwani loyi a khongelako, kutani ku profeta, na fenengetile a hloko yakwe, i yi chela tingana a hloko yakwe.

⁵Kanilezi a wasati munwe ni munwani loyi a khongelako, kutani ku profeta, na a nga fenengetangi a hloko yakwe, i yi chela tingana a hloko yakwe; hakuva lezo zi fana ni loku a cingile. [168]

⁶Hakuva loku wasati a nga ti fenengeti hloko, a kayiwe; kanilezi loku ku hi tingana ka wasati a ku kayiwa kutani ku cingiwa, ngha a fenengeta hloko. [169]

⁷Hakuva a wanuna a nga faneli ku fenengeta a hloko yakwe, kota lezi a nga xifananiso ni wudzunzo ga Nungungulu; kanilezi a wasati wudzunzo ga wanuna. [170]

⁸Hakuva a wanuna a nga tangi hi ka wasati, kanilezi a wasati ita hi ka wanuna. [171]

⁹Ni kambe a wanuna a nga vangelangi wasati, kanilezi hi wasati a nga vangelwa wanuna.

¹⁰Hi kota ya lezo a wasati i fanele a kuva ni xikombiso a hlokweni yakwe xaku i fumelwe, hi kota ya tingelosi. [172]

¹¹Ahembalokoke, le Hosini a nga kona wasati hi lehandle ka wanuna, ni wanuna a nga kona hi lehandle ka wasati. [173]

¹²Hakuva kota lezi a wasati a ngata hi ka wanuna, zinghaho ni wanuna i pswaliwa hi wasati; kanilezi zontlhe zita hi ka Nungungulu. [174]

¹³Hi nga lamulani, xana zi fanele lezaku a wasati a khongela ka Nungungulu na a nga fenengetangi a hloko ke?

¹⁴Xana na wona ntumbuluko a wu mu gonzisi lezaku wanuna ava ni tingana loku a kulisa misisi ke?

¹⁵Kanilezi loku a wasati a hi ni misisi yo leha, mbukosi ka yena; hakuva i nyikilwe a misisi yakwe a kuva xifenengeto.

¹⁶Kanilezi loku munhu a ranza ku kaneta, hina a hi na mukhuwo wa kunghahi, hambu ni mabandla ya Nungungulu a ma nawo. [175]

¹⁷Loku nzi engeta nzi mu laya a nzi zi koti ku mu khesa, hakuva a mitlhanganweni ya nwina a mu hloti ku ti chukwata, kanilezi mo ti bihisa.

¹⁸A kusanguleni, loku mu tsombana chechini, nzizwa lezaku ku kona kuhambana xikari ka nwina; hi tlhelo nza kholwa lezaku ku kona. [176]

¹⁹Hakuva ku fela kuva kona mitlawa xikari ka nwina, kasi ku ta woneka lava va nga va nene xikari ka nwina. [177]

²⁰Hikwalaho loku mu tsombana, a zi koteki kuga xilalelo xa Hosi,

²¹hakuva a kugeni ka nwina a munwe ni munwani i rangela vanwani aga xilalelo xakwe; zonake munwani azwa ndlala, na munwani a xurile. [178]

²²Xana a mu na tiyindlu ta ku gela ni ku nwela kona ke? Kutani mu kanyisa a chechi ya Nungungulu, ni ku va chela tingana lava va nga hiko nazo ke? Nzi taku yini ka nwina? Nzi ta mu dzunza ke? A nzi mu dzunzi. [179]

²³Hakuva mina nzi amukele ka Hosi lezi nzi mu tivisileko zona; lezaku a wusiku lego a nga nyikelwa ha gona, Hosi Jesu i lo teka xibaba; [180]

²⁴laha a nga bongile i lo xi khema, aku ngalo: Lexi hi miri wa mina, lowu wu khemelelweko nwina; mahani lezo kasi ku nzi alakanya.

²⁵Zinghaho anzhako ka xilalelo i lo teka a gombe, aku: A gombe legi hi xivumelwano xiswa nkhateni wa mina; ni xihi xikhati mu gi nwako, mahani lezo kasi ku nzi alakanya. [181]

²⁶Hakuva hi xikhanzakanya xa lezi mu gako lexi xibaba, ni kunwa a gombe legi, muba hungu hi kufa ka Hosi yi kala yi wuya. [182]

²⁷Hikwalaho kani hi wihi a gako a xibaba ni kunwa a gombe ga Hosi hi kungafaneliko, i tava ni nanzu wa miri ni nkhata wa Hosi. [183]

²⁸Hikwalaho ngha munhu a ti hlola yena wutsumbu, zonake age a xibaba ni kunwa a gombe. [184]

²⁹Hakuva loyi a gako ni kunwa na a nga hambanyisi xikari ka miri wa Hosi ni kuga kunwani, i ti gela a ti nwela kulamulwa.

³⁰Hi xigelo lexo a vanyingi va nwina va na ni gome, va babya, ni vanwani va file.

³¹Kanilezi loku hina wutsumbu hi wa ti lamula, ngha hi nga lamulwi. [185]

³²Kanilezi loku hi lamulwa hi biwa hi Hosi, kasi hi fela ku kala hi nga koneki zinwe ni misava. [186]

³³Hikwalaho, vamakabye, loku mu tsombana ku taga, rinzelanani.

³⁴Loku munhu azwa ndlala, ngha aga le kaya; kasi a kutsombana ka nwina ku nga mu vangeli kulamulwa. A timhaka tinwani nzi ta ta ti lulameta loku nzi chikele. [187]