Read tshwa 1 Va le Korinte 12 Bible Online

1 Va le Korinte 12 - tshwa bible

1 Va le Korinte 12

¹Xungetano ni zinyikiwo za moya, vamakabye, a nzi zi ranzi a ku ngha mu kohlwa hi nchumu. [188]

²Nwina ma zi tiva lezaku laha na ma ha hi vamatiko mu wa kokelwa zifananisweni lezi za timbeveve, hi laha mu nga kokwa ha kona. [189]

³Hikwalaho nza mu tivisa lezaku a ku na munhu loyi a wulawulako hi Moya wa Nungungulu, aku: Jesu a rukiwe; kambe a nga kona munhu a nga wulako, aku: Jesu i Hosi, na a nga wuliswi hi Moya wa ku Basa. [190]

⁴Makunu a zinyikiwo zi hambene, kanilezi a Moya munwe. [191]

⁵Ma kona matirela ma hambeneko, kanilezi a Hosi njinwe.

⁶Yi kona mitiro yi hambeneko, kanilezi Nungungulu munwe, loyi a tirako zontlhe ka vontlhe. [192]

⁷Kanilezi a kuwonekeliswa ka Moya ku nyikiwa munwe ni munwani, kasi ku vuna vontlhe. [193]

⁸Hakuva munwani i nyikiwa ha wona Moya a timhaka ta kutlhariha, ni munwani i nyikiwa a timhaka ta kutiva hi wona Moya lowo; [194]

⁹a munwani i kuma kukholwa hi wona Moya lowu; ni munwani a zinyikiwo za ku hanyisa vababyi hi wona Moya lowo munwe. [195]

¹⁰Ka munwani ku nyikiwa ku tira zihlamaliso; ni ka munwani a ku profeta; ni ka munwani a ku pima mimoya; ni ka munwani a ku wulawula a tirimi ti tsalangeneko, ni ka munwani a ku tlhamusela tirimi. [196]

¹¹Kanilezi zontlhe lezi zi tiriwa hi walowo Moya munwe, lowu wu avelako ka munwe ni munwani hi laha wu ranzako ha kona. [197]

¹²Hakuva khwatsi hi lezi a miri wu nga munwe, wu nga ni ziro zo tala, ni ziro zontlhe za miri, hambu lezi zi nga zinyingi, zi maha miri munwe, zinghaho ni ka Kristu. [198]

¹³Hakuva hi ka Moya lowo wa munwe hina hontlhe hi lo bapatizelwa a kuva miri munwe, hambu hi hi vaJuda kutani vaGreki, hambu hi hi tikhumbi kutani vatlhatlhekileko; hina hontlhe hi lo cheliwa Moya munwe. [199]

¹⁴Hakuva a miri a hi xiro xinwe ntsena, kanilezi zi tele.

¹⁵Loku a konzo wuku ngalo: Lezi nzi nga hiko canja, a nzi wa miri; mbunwa, ngwa miri.

¹⁶Loku a ndleve yiku ngalo: Lezi nzi nga hiko tihlo, a nzi wa miri; mbunwa, nja miri.

¹⁷Loku a miri wontihe wu wa hi tihlo, ngha ku hi kwihi kuzwa ke? Loku wontihe wu wa hi kuzwa, ngha ku hi kwihi kunuheta ke?

¹⁸Kanilezi Nungungulu i lungelele a xiro xinwe ni xinwani laha ka miri, kota lezi zi nga mu tsakisa.

¹⁹Loku zontlhe zi wa hi xiro xinwe, ngha wu hi kwihi a miri ke?

²⁰Kanilezi makunu a ziro zi tele, kanilezi a miri munwe.

²¹A tihlo a gi zi koti ku wula ka canja, giku: A nzi ku lavi; hambu ni hloko a yi na ku wula ka mikonzo ku ngalo: A nzi mu lavi.

²²Kokwihi! A ziro za miri lezi zi nge khwatsi zi na ni gome, za laveka nguvu.

²³A ziro lezi za miri hi nge a zi na wudzunzo, hi zona hi zi fenengetako hi wudzunzo ga hombe; ni ziro za hina lezi hi nga ni tingana ha zona, hi chela kota nguvu ha zona,

²⁴kasi a ziro za hina lezi zo saseka a zi vumali nchumu. Hakuva laha Nungungulu a nga tlhanganyisa miri, i lo nyika xichawo xa hombe ka ziro lezi zi nga dzunzekiko,

²⁵lezaku kasi ku fela ku kala ku nga hi kona a kuhambana mirini; kasi a ziro zi fela ku zwelana.

²⁶Hikwalaho loku a xiro xinwe xi xaniseka, ziro zontlhe zi xaniseka zinwe naxo; ni loku xiro xinwe xi dzunziwa, ziro zontlhe zi tsaka zinwe naxo.

²⁷Makunu nwina mu miri wa Kristu, nwina mu ziro zakwe a munwe ni munwani. [200]

²⁸Nungungulu i yimisile vanhu lomu bandleni, kuranga a ku maha vapostoli, ku gamela vaprofeti, a ka wunharu vagonzisi; zonake a vanwani vatiri va zihlamaliso, ni vanwani va nga ni zinyikiwo za ku hanyisa vababyi, ni va ku hlayisa zisiwana, ni vaangameli, ni lava va wulawulako tirimi ti tsalangeneko. [201]

²⁹Xana vontlhe mbapostoli ke? vontlhe mbaprofeti ke? vontlhe mbagonzisi ke? vontlhe mbatiri va zihlamaliso ke?

³⁰Xana vontlhe va na ni zinyikiwo za ku hanyisa vababyi ke? vontlhe va wulawula hi tirimi ti tsalangeneko ke? vontlhe va tlhamusela ke?

³¹Kanilezi navelisisani a zinyikiwo leʼza hombe nguvu. Makunu nzi ta mu kombisa a ndlela yi sasekileko nguvu. [202]