Read tshwa 1 Va le Korinte 14 Bible Online

1 Va le Korinte 14 - tshwa bible

1 Va le Korinte 14

¹Hlotani a liranzo, mu lavisisa a zinyikiwo za moya, nguvunguvu a kuva mu profeta. [214]

²Hakuva loyi a wulawulako hi lirimi limbe a nga wulawuli ka vanhu, kanilezi ka Nungungulu; hakuva a ku na munhu a zi pimako, hilezi i wulawula mifihlakalo te moyeni. [215]

³Kanilezi loyi a profetako i byela vanhu a zilo zi akako, ni ku tangalisa, ni ku chavelela. [216]

⁴Loyi a wulawulako hi lirimi limbe o ti akela yena wutsumbu; kanilezi loyi a profetako i akela bandla.

⁵Nza ranza lezaku nwina nwentlhe mu wulawula hi tirimi, kanilezi nguvunguvu a kuva mu profeta. Loyi a profetako ngwa hombe ku hunza loye a wulawulako hi tirimi ahandle ka mutlhamuseli, kasi a bandla gi fela ku vuneka.

⁶Makunu vamakabye, loku nzita ka nwina na nzi wulawula hi tirimi, nzi ta mu vunisa kuyini ke, loku nzi nga wulawuli na nwina hi ku mu vululela timhaka, kutani hi kutiva, kutani hi kuprofeta, kutani hi kugonzisa?

⁷Hambu ni zilo lezi zi nga hiko na kuhanya, lezi zi nga ni pfumawulo, kutani i nanga kani xitende, loku a kuvuma ka zona ku nga hambani, ku ta tibyiwa hikuyini aku ku biwa nanga niku xitende xi hi wako ke? [217]

⁸Loku a mpunzu wu hi ni pfumawulo lowu wu nga tibyiwiko, himani a ta nga hloma a kuya yimpini ke?

⁹Hizalezo na nwinawu; loku mu nga humesi a magezu ma zwalako hi tirimi ta nwina, zi ta tibyiswa kuyini lezi zi wulawulwako ke? Mu ta wulawula mahala. [218]

¹⁰Ti kona tirimi tinyingi laha misaveni, kanilezi a li kona ni linwe leli a magezu ya lona ma nga humesiko nchumu.

¹¹Kanilezi loku nzi nga tivi a magezu ya lirimi la kona, nzi tava wamatiko ka loyi a wulawulako, ni loyi a wulawulako i tava wamatiko ka mina.

¹²Zinghaho na nwina, kota lezi mu navelako a zinyikiwo za moya, lavani lezaku zi enzeleka ka nwina kasi a bandla ga vuneka.

¹³Hikwalaho ngha loyi a wulawulako a lirimi limbe a khongela kasi a fela ku zi kota ku tlhamusela. [219]

¹⁴Hakuva loku nzi khongela hi lirimi limbe, ku khongela a moya wa mina, kanilezi a kupima ka mina a ku vuni vanwani.

¹⁵Nzi taku yini ke? Nzi ta khongela hi moya, nzi khongela kambe hi kupima; nzi ta yimbelela hi moya, nzi yimbelela kambe hi kupima. [220]

¹⁶Hakuva loku u khesa Nungungulu hi moya ntsena, a munhu wa lahandle i ta wulisa kuyini aku, Amen, a kukheseni ka wena ke, kota lezi a nga zi tiviko lezi u zi wulako? [221]

¹⁷Hakunene wa bonga khwatsi, kanilezi munwani a nga vuneki.

¹⁸Nza mu bonga Nungungulu, hakuva nzi wulawula tirimi ku hunza nwina nwentlhe.

¹⁹Ahembalokoke lomu bandleni nzi ranza ku wula a ntlhanu wa timhaka ntsena hi kupima ka mina, kasi nzi fela ku gonzisa vanwani, ku hunza ku wula zana ga mazana ya timhaka hi lirimi limbe.

²⁰Vamakabye mu nga mahi zihlangi kupimeni ka nwina, kanilezi mahani zihlangi ka zakubiha, mu maha madota kupimeni. [222]

²¹Ku tsalilwe nayweni ku ngalo: Nzi ta wulawula ni lava vanhu hi vanhu va tinwani tirimi ni milomu ya vamatiko; hambu zi hi tano, va nga ta nzizwa, ku wula Hosi. [223]

²²Hikwalaho a tirimi xikombiso, na ku nga hi ka lava va kholwako, kanilezi ka lava va nga kholwiko. Kanilezi a kuprofeta xikombiso ka lava va kholwako, na ku nga hi ka lava va nga kholwiko.

²³Hikwalaho loku a bandla gontlhe gi tsombene, na vontlhe va wulawula hi tirimi, loku ku enghena a valahandle kutani lava va nga kholwiko, va nga ta wula vaku mu hungukile ke? [224]

²⁴Kanilezi loku vontlhe va profeta, zonake ku enghena munhu loyi a nga kholwiko kutani wa lahandle, i ta koniwa hi vontlhe, a lamuliwa hi vontlhe.

²⁵A zigungu za mbilu yakwe za tsetsulwa, zonake i tawa hasi hi nghohe yakwe a khizamela Nungungulu aku: Hizinene Nungungulu i kona xikari ka nwina. [225]

²⁶Za kuyini ke, vamakabye? Laha na mu tsombana, munwe ni munwani wa nwina i na ni lisimu, kutani gonzo, kutani kuvululwa, kutani kuwulawula lirimi limbe, kutani kutlhamusela; ngha zontlhe lezi zi mahiwa kasi mu vunana. [226]

²⁷Loku mu ranza ku wulawula hi tinwani tirimi, a ku wulawule vambiri kutani vanharu; ku mahiwa hi ku lanzelana, ni munwani a tlhamusela.

²⁸Kanilezi loku a mutlhamuseli a hi hava a va miyele lomu bandleni; va wulawula ka wutsumbu gabye ni ka Nungungulu.

²⁹A vaprofeti ngha va wulawula na va hi vambiri kutani vanharu, ni vanwani va lamula lezi zi wulawuliwako.

³⁰Loku munwe wa lava va tshamileko a vululelwa mhaka, loyi a nga ranga i ta miyela. [227]

³¹Hakuva nwina nwentlhe mu nga profeta ha munwe munwe, kasi vontlhe va fela ku gonziswa, ni vontlhe va tangaliswa. [228]

³²A mimoya ya vaprofeti ya ingisa a vaprofeti va kona. [229]

³³Hakuva Nungungulu a hi Nungungulu wa woyonga, kanilezi wa kurula. [230]

³⁴Khwatsi hi lomu mabandleni wontihe ya vobasa, ngha vavasati va miyela mitlhanganweni; hakuva a va vumelwi ku wulawula. Va fanele ku ingisa kota lezi wu wulako nayo. [231]

³⁵Loku va lava ku tiva nchumu, ngha va wutisa a vanuna vabye le kaya; hakuva tingana ka wasati a kuva a wulawula lomu chechini.

³⁶Xana a mhaka ya Nungungulu yi lo huma hi ka nwina ke? Kutani yi tile ka nwina nwece ke? [232]

³⁷Loku a hi kona munhu a ti alakanyako aku muprofeti, kutani ngwa Moya, ngha a tiva lezaku lezi nzi tsalako ka nwina kulaya ka Hosi. [233]

³⁸Loku munhu a ala ku tiva lezi, ngha a tshama a nga tivi.

³⁹Hikwalaho vamakabye va mina, navelisisani a xinyikiwo xa kuprofeta, mu nga beleteli munhu ku wulawula hi tirimi. [234]

⁴⁰Kanilezi ngha zilo zontlhe zi mahiwa hi fanelo ni nayo.