Read tshwa 1 Va le Korinte 15 Bible Online

1 Va le Korinte 15 - tshwa bible

1 Va le Korinte 15

¹Vamakabye, nza mu alakanyisa hi ivangeli leyi nzi nga kanela ka nwina, leyi mu nga yi amukela, leyi mu yimileko ka yona, [235]

²leyi mu hanyisilweko ha yona, loku mu hlayisisa a timhaka leti nzi nga yi kanela ha tona ka nwina, loku mu nga kholwangi mahala. [236]

³Hakuva a mhaka ya hombe nzi nga mu fayela yona, leyi minawu nzi nga yi amukela, hi lezaku Kristu i lo fela zionho za hina kota lezi yi wulako mitsalo; [237]

⁴ni lezaku i lahlilwe, a tlhela a vuka hi siku ga wunharu, kota lezi yi wulako mitsalo: [238]

⁵ni lezaku i lo woneka ka Kefasi, zonake ka vakhume ni vambiri; [239]

⁶zonake i lo woneka khatiginwe ka 500 wa vamakabye va hlamusa; a vanyingi va vona va ha hi kona ni lezi, kanilezi a vanwani va hunzile.

⁷Zonake i lo woneka ka Jakobe, zonake ni ka vontlhe vapostoli; [240]

⁸anzhako ka vona vontlhe i lo woneka ka mina kambe, nzi nga ku khwatsi hi munwe a pswalilweko hi ku handliwa. [241]

⁹Hakuva mina nzi loyi wa tsongwani xikari ka vapostoli, a nzi faneli ku vitanwa aku nzi mupostoli, hakuva nzi lo xanisa a bandla ga Nungungulu. [242]

¹⁰Kanilezi hi tipswalo ta Nungungulu nzi lezi nzi nga zona, ni tipswalo takwe a nzi nyikiwangi tona mahala; hakuva nzi tirile nguvu ku hunza vona vontlhe; na ku nga hi mina, kanilezi hi tipswalo ta Nungungulu leti ti nga hi zinwe na mina. [243]

¹¹Hambu loku ku hi mina kutani hi vona, hi kanela zalezo, zonake mu lo kholwa zalezo.

¹²Makunu loku ku kanelwa ha Kristu lezaku i vukile hi ka vafileko, va wula hi kuyini a vanwani va nwina lezaku a ku kona a kuvuka ka vafileko ke? [244]

¹³Loku ku hi hava a kuvuka ka vafileko, hambu na Kristu a nga vukangi. [245]

¹⁴Ni loku Kristu a nga vukangi, zonake a kukanela ka hina mahala, ni kukholwa ka nwina mahala.

¹⁵Zonake hi kumiwa na hi hi vakustumunyu va mawunwa va Nungungulu; hakuva hi lo kustumunya ha Nungungulu lezaku i vuxile Kristu, loyi a nga mu vuxangiko, loku hakunene a vafileko va nga vuki.

¹⁶Hakuva loku a vafileko va nga vuki, hambu Kristu a nga vukangi;

¹⁷ni loku Kristu a nga vukangi a kukholwa ka nwina mahala; nwina ma ha hi zionhweni za nwina. [246]

¹⁸Zonake ni lava va etleleko ka Kristu va lovile.

¹⁹Loku hi tsumbile ka Kristu a kuhanyeni loku ntsena, hi na ni khombo ku hunza vanhu vontlhe. [247]

²⁰Kanilezi futsi Kristu i vukile hi ka vafileko, hi yena matewula ya vona lava va etleleko. [248]

²¹Hakuva kota lezi a kufa ku ngata hi munhu, lezo kambe a kuvuka ka vafileko ku tile hi munhu. [249]

²²Hakuva khwatsi hi lezi vontlhe ya fako hi ka Adamu, hizalezo kambe hi ka Kristu vontlhe va ta mahiwa va hanya.

²³Kanilezi munwe ni munwani i ta vuka hi xikhati xakwe; a matewula hi Kristu; zonake lava va nga va Kristu va ta vuka a kuwuyeni kakwe. [250]

²⁴Zonake ku chikela magumo, laha a ta nga tlhelisela a mufumo ka Nungungulu Dadani; anzhako ka kuva na a hetisile a kufuma kontlhe, ni wuhosi gontlhe ni mintamu. [251]

²⁵Hakuva i yimelwe hi ku fuma a kala a veka a valala vakwe vontlhe lahasi ka mikonzo yakwe. [252]

²⁶A nala wo gumesa loyi a ta nga lobyiswa hi kufa. [253]

²⁷Hakuva Nungungulu i vekile a zilo zontlhe lahasi ka mikonzo yakwe. Kanilezi loku aku: A zilo zontlhe zi vekilwe lahasi ka yena, zi te dlunya lezaku loyi a vekileko zilo zontlhe lahasi kakwe, yena i lehandle ka zona. [254]

²⁸Ku taku loku zilo zontlhe zi vekilwe lahasi kakwe, zonake na yena Nʼwana i ta vekiwa lahasi ka loyi a vekileko zilo zontlhe lahasi kakwe, lezaku kasi Nungungulu ava zontlhe ka vontlhe. [255]

²⁹Loku zi nga hi lezo, lava va bapatizelwako a vafileko va alakanya yini? Loku a vafileko va nga vuki, va ha bapatizelwa a vafileko hikuyini ke?

³⁰Na minawu hikuyini nzi nga le timhangweni a zikhati zontlhe ke? [256]

³¹Nzafa masiku wontihe, lezo nza tiyisa hi kutidzunza loku nzi nga nako ha nwina ka Kristu Jesu a Hosi ya hina. [257]

³²Za nzi vuna yini lezaku nzi lwile ni zihari le Efesusi? (na nzi wulawula kota vanhu.) Loku a vafileko va nga vuki, a hi geni, hinwa, hakuva manziko hi tafa. [258]

³³Mu nga kohliswi; a ku tolovetana ni vakubiha ka bihisa a mahanyela ma nene.

³⁴Vukani, mu maha kululama, mu nga onhi; hakuva vanwani a va mu tivi Nungungulu, nzi wula lezi ku mu chela tingana. [259]

³⁵Kanilezi munwani i taku ngalo: A vafileko va ta vukisa kuyini ke? Va ta huma na va hi ni miri wa lixaka muni ke? [260]

³⁶Xipumbu nzi wena, a mbewu leyi u yi byalako, a yi mili loku yi nga rangi yifa. [261]

³⁷Ni laha u byalako, a ku byali a miri lowu wu ta nga humelela, kanilezi u byala a mbewu ntsena, kutani nja zipfhaki, kutani nja lixaka linwani.

³⁸Kanilezi Nungungulu wa yi nyika a miri kota lezi zi mu xalalisako yena, a ka mbewu yinwe ni yinwani a miri wa yona. [262]

³⁹A nyama yontlhe a hi nyama ya lixaka linwe; kanilezi yi kona a nyama ya vanhu, a yinwani i nyama ya zihari, ni yinwani i nyama ya zinyanyani, ni yinwani ya zidluwani.

⁴⁰Kambe yi kona mimiri ya le tilweni, ni mimiri ya laha misaveni; kanilezi a kungangamela ka ya le tilweni ka limbe lixaka, ni kungangamela ka ya laha misaveni ka linwani lixaka.

⁴¹Ku kona a kungangamela ka gambo, ni kunwani ka hweti, ni kunwani ka tinyeleti; hakuva a nyeleti yinwe ya hambana ni yinwani nyeleti hi kungangamela.

⁴²Zi tava nghaho a kuvukeni ka vafileko: a miri lowu wu nga byalwa hi kubola wu ta vuka hi kungaboliko; [263]

⁴³wu lo byaliwa hi kusoleka, wu ta vuka hi kungangamela; wu byaliwa na wu hi ni gome, wu vuka na wu hi ni ntamu; [264]

⁴⁴laha ku byaliwa a miri wa nyama, seyo ku vuka a miri wa moya. Wu kona a miri wa nyama, wu kona kambe ni miri wa moya.

⁴⁵Ku tsalilwe ku ngalo: A munhu wo sangula, Adamu, i lo maha muhefemulo wu hanyako. Na Adamu wo gumesa i lo maha a moya wu hanyisako. [265]

⁴⁶Hambu lezo a za moya a hi zona za kusangula, kanilezi lezi za nyama; a za moya zita hi lenzhako.

⁴⁷A munhu wo ranga i lo mahiwa hi misava, ngwa misava; a munhu wa wumbiri ngwa le tilweni. [266]

⁴⁸Khwatsi hi lezi a nga hi zona a wa misava, va nghaho ni va misava; ni kota lezi a nga zona a wa le tilweni, va nghaho a va le tilweni. [267]

⁴⁹Kota lezi hi nga tekelela a wa misava, hizalezo kambe hi ta tekelela a wa le tilweni. [268]

⁵⁰Makunu vamakabye, nzi wula lezaku a nyama ni nkhata a zi na kuga a tshomba ya mufumo wa Nungungulu; hambu ni kubola a kuna kuga a tshomba ya kungaboli. [269]

⁵¹Langutani, nza mu byela fihlakalo waku ngalo: Hi nga ta etlela hontlhe, kanilezi hina hontlhe hi ta hunzuluswa xiyimo [270]

⁵²hi xikhatanyana xo fanana ni kutsopeta ka tihlo, loku ku biwa a mpunzu wo gumesa; hakuva a mpunzu wu ta biwa, zonake a vafileko va ta vuka va nga ha boli kambe, na hina hi ta hunzuluswa xiyimo. [271]

⁵³Hakuva a miri lowu wa kubola wu fela ku ambaliswa a kungaboli, ni miri lowu wa kufa wu fela ku ambaliswa a kungafi. [272]

⁵⁴Kanilezi laha a kubola ku ta nga ngha ku ambele a kungaboli, ni kufa ku ta nga ngha ku ambele a kungafi, zonake ku ta tatiseka a mhaka leyi yi tsalilweko ya ku ngalo: A kufa ku mitilwe hi kuhlula. [273]

⁵⁵Wena kufa, ku kwihi a kuhlula ka wena ke? Wena kufa, li kwihi a livole la wena ke? [274]

⁵⁶A livole la kufa hi kuonha; ni ntamu wa kuonha hi nayo. [275]

⁵⁷Kanilezi a ku bongiwe Nungungulu, loyi a hi nyikako kuhlula hi Hosi ya hina Jesu Kristu. [276]

⁵⁸Hikwalaho vamakabye va mina va ranzekako, tiyani muku ndende, mu nga tsekatseki, kanilezi mu anza mitirweni ya Hosi xontlhe xikhati, na mu tiva lezaku a ntiro wa nwina a hi wa ipahala Hosini. [277]