Read tshwa 1 Va le Korinte 16 Bible Online

1 Va le Korinte 16 - tshwa bible

1 Va le Korinte 16

¹Makunu xungetano ni hlengo lowu wu hlengelwako lava vobasa, mahani na nwinawu kota lezi nzi layileko a mabandla ya le Galatia. [278]

²Hi siku go ranga ga viki, ngha loyi ni loyi a ti vekela kota lezi a zi kumileko, kasi ku nga mahiwi hlengo loku nzi chikele. [279]

³Ni loku nzi chikele nzi ta nyika mapapilo ka lava mu ta nga va hlawula, nzi va rumela a ku heleketa a xinyikiwo xa nwina le Jerusalema. [280]

⁴Loku ku laveka a kuva nzi famba na minawu, va ta famba zinwe na mina.

⁵Hakuva nzi ta mu enzela loku nzi hunzile hi le Makedonia, hakuva nzi ta tsemakanya Makedonia, [281]

⁶kanilezi nzi la tshama na nwina a masiku yo kari, kutani kala ku mbhela wuxika, kasi mu fela ku nzi heleketa pfhumbeni ga mina ni kwihi laha nzi yako kona. [282]

⁷Lezi a nzi ranzi kuya hi ku mu hambukela ntsena, hakuva nza tsumba lezaku nzi ta ta tshama na nwina a xikhati xo kari loku Hosi yi vumela.

⁸Nzi ta tshama le Efesusi kala ku chikela Pentekosta;

⁹hakuva seyo nzi vululelwe a nyangwa ya hombe ya ntiro; ni kambe ku na ni valala vanyingi. [283]

¹⁰Loku ata Timote, mahani lezaku a tshama na nwina na a nga chavi; hakuva i tira a ntiro wa Hosi khwatsi hi mina; [284]

¹¹ngha ku nga hi kona munhu a mu kanyisako. Kanilezi mu heleketeni hi kurula pfhumbeni gakwe ga ku wuya ka mina, hakuva nzi mu cuwukele zinwe ni vamakabye. [285]

¹²Xungetano ni makabye Apolosi, nzi mu khongotele nguvu lezaku a mu enzela zinwe ni vamakabye vanwani, kanilezi i wa nga ranzi a kuta zalezi; hambu zi hi tano, i tata loku ava ni xikhati. [286]

¹³Rinzelani, muku nde kukholweni, mu maha xinuna, muva ni ntamu.

¹⁴Zontlhe lezi mu zi mahako a zi mahiwe hi liranzo.

¹⁵Makunu nza ha mu khongotela vamakabye: Ma yi tiva a yindlu ya Stefanasi, lezaku hi yona a mbhanzu wo ranga wa le Akaia, ni lezaku va ti yimisele a kuva va tirela a vobasa.

¹⁶Ti koramiseni ka vanhu va kunghahi, ni ka vontlhe vatiri-kulori, va ti karatako ntirweni.

¹⁷Nza tsaka hi kota ya kuta ka Stefanasi na Fortunatusi na Akaikusi; hakuva va lo nzi nehela lezi nzi nga zi vumala ha nwina. [287]

¹⁸Va tiyisetile a moya wa mina ni wa nwina; hikwalaho alakanyani a vanhu va kunghahi. [288] Marungula.

¹⁹A mabandla ya leno Asia ma mu rungula. Akwila na Priska va mu rungula nguvu Hosini, zinwe ni bandla legi gi nga lomu ndlwini yabye. [289]

²⁰Vamakabye vontlhe va mu rungula. Losanani hi kupswopswa ko basa.

²¹Mina Paule nza tsala a marungula ya mina hi canja ga mina wutsumbu.

²²Loku a hi kona munhu loyi a nga ranziko Hosi, ave a rukatelweko. Maranatha! [290]

²³A tipswalo ta Hosi Jesu Kristu a tive na nwina.

²⁴A liranzo la mina li na nwina nwentlhe ka Kristu Jesu. Amen.