Read tshwa 1 Va le Korinte 4 Bible Online

1 Va le Korinte 4 - tshwa bible

1 Va le Korinte 4

¹Ngha na vanhu va wula ha hina lezaku hi malanza ya Kristu, ni tinekwa ta mifihlakalo ya Nungungulu. [54]

²Tlhatakumbiri ku laveka ka tinekwa lezaku ti kumeka na ti tsumbekile.

³Kanilezi xilo xi tsongwani ka mina a kuva nzi lamuliwa hi nwina, hambu ku lamuliwa hi vanhu; na mina a nzi ti lamuli a wutsumbu ga mina.

⁴Hakuva a nzi ti woni na nzi hi ni nanzu wa nchumu; ahembalezoke a nzi hlayelwi loyi a lulamileko hi kota ya lezo: kanilezi loyi a nzi lamulako hi Hosi.

⁵Hikwalaho mu nga lamuli nchumu hi xihatla, yi kala yita Hosi; leyi yi ta nga humesa kubaseni a zilo zi fihlilweko za munyama, yi wonekelisa a makungo ya timbilu; zonake munwe ni munwani i ta kuma hi ka Nungungulu a kudzunziwa loku ku mu ringeneko. [55]

⁶Makunu vamakabye, lezi nzi zi wulawulile ha mina na Apolose hi kota ya nwina, lezaku mu gonza ha hina, mu nga hunzeleti lezi zi tsalilweko; kasi ku nga hi kona wa nwina a ti kukumukisako hehla ka munwani hi ku yimela munwani mugonzisi. [56]

⁷Hakuva himani a ku mahako a kuva chukwana? Xini lexi u nga naxo lexi u nga nyikiwangiko ke? Kanilezi loku wena u lo xi amukela, u dzunzekela yini a ku khwatsi a ku lo xi amukela ke? [57]

⁸Nweno mu sina mu xurile, nweno mu sina mu fuyile, mu fumile hi handle ka hina. Ina, nzi ngha na mu fuma, kasi hinawu hi fela ku fuma na nwina. [58]

⁹Hakuva nza alakanya nziku Nungungulu i vekile hina vapostoli a kuva nzhako ka vontlhe, khwatsi hi vanhu va yimiselweko kufa; hakuva hi mahilwe mabhemba ka misava, ni ka tingelosi, ni ka vanhu. [59]

¹⁰Hina hi zipumbu hi kota ya Kristu, kanilezi nwina mu tlharihile ka Kristu; hina hi na ni gome, kanilezi nwina mu na ni ntamu; nwina ma dumiswa, kanilezi hina ha kanyiswa. [60]

¹¹Kala ni lezi hi na ni ndlala ni tora, hi na ni wuna, ha biwa, hi vatsenzeleki; [61]

¹²ha ti karata hi ku tira hi mandla ya hina; loku hi rukatelwa hi tlhela hi katekisa; loku hi xaniswa, hina ha timisela; [62]

¹³loku hi panzwa wuxezi, hina ha khongotela. Hina hi mahilwe ku khwatsi hi chaka ga misava, hi fenze ya zilo zontlhe kala lezi.

¹⁴A nzi tsali lezi aku nzi mu chela tingana, kanilezi kasi ku mu luleka kotisa vanana va mina va ranzekako.

¹⁵Hakuva hambu loku mu ngava ni zana ga mazana ya vagonzisi ka Kristu, a mu na vadadani vanyingi, hakuva hi mina nzi nga mu beleka ka Kristu Jesu hi ivangeli. [63]

¹⁶Hikwalaho nza mu khongotela nziku, mahani vapimanyisi va mina. [64]

¹⁷Hi kota ya lezo nzi rumele Timote ka nwina, loyi a nga nwananga a ranzekileko ni ku tsumbeka Hosini; i ta mu alakanyisa hi mafambela ya mina ka Kristu, khwatsi hi lezi nzi gonzisisako zona mabandleni wontihe. [65]

¹⁸Makunu vanwani va ti kukumukisile, a ku khwatsi nzi wa nga ha tata ka nwina.

¹⁹Kanilezi, nzi tata ka nwina lokuloku, loku a Hosi yi zi ranza; zonake nzi nga ta tiva a kuwulawula ka lava va ti kukumukisako, kanilezi a ntamu wabye. [66]

²⁰Hakuva a mufumo wa Nungungulu a hi wa kuwulawula, kanilezi ngwa ntamu. [67]

²¹Xana mu ranza yini ke? A kuva nzita ka nwina nzi hi ni nhonga, kutani hi liranzo ni moya wa kurula ke?