Read tshwa 1 Va le Korinte 6 Bible Online

1 Va le Korinte 6 - tshwa bible

1 Va le Korinte 6

¹Xana a munhu wa nwina loku a hi ni mhaka ni waakelane, i tiyela yini a mu kecara mahlweni ka lava va nga lulamangiko, wutshanwini ga ku yi yisa mahlweni ka vobasa ke?

²Kutani a mu zi tivi lezaku a vobasa va ta lamula misava ke? Makunu loku a misava yi ta lamulwa hi nwina, xana a mu faneli ku lamula a timhaka ti tsongwani ke? [80]

³A mu zi tivi ku ngalo hi ta lamula tingelosi ke? Nguvunguvu a timhaka ta loku kuhanya. [81]

⁴Hikwalaho loku mu hi ni timhaka ta kuhanya loku, xana ma yimisa lava va nga dzunziwiko lomu bandleni a kuva valamuli ke?

⁵Nzi wula lezi ku mu wisa tingana. Xana a nga kona loyi a tlharihileko xikari ka nwina, loyi a ta nga zi kota ku lamula xikari ka vamakabye vakwe ke?

⁶Kanilezi a munhu wa kecara makabye wakwe a mahlweni ka vangakholwiko!

⁷Kunene, ni lezaku mu na ni timhaka xikari ka nwina za komba lezaku mu na ni gome. Hikuyini mu nga vumeliko a ku onhelwa, hikuyini mu nga vumeliko ku kalavelwa ke? [82]

⁸Kanilezi nwina wutsumbu ma onha ni ku kalavela, mu maha lezo ni ka vamakabye va nwina. [83]

⁹Xana a mu zi tivi lezaku a vangalulamangiko va nga taga a tshomba ya mufumo wa Nungungulu ke? Mu nga kohliswi: hakuva a zirembi, ni vakhozeli va zifananiso, ni zibhayi, ni lava va ti mahako vavasati, ni lava va ti bihisako ni vanwani vavanuna, [84]

¹⁰ni makhamba, ni zinaveli, ni zidakwa, ni lava va rukatelako, ni vaphangi; a va kunghaho va nga taga a tshomba ya mufumo wa Nungungulu.

¹¹A vanwani va nwina va wa hi vakunghaho; kanilezi mu lo hlaziwa, mu basiswa, mu hlayelwa kululama a vitweni ga Hosi Jesu Kristu, ni le Moyeni wa Nungungulu wa hina. [85]

¹²Zontlhe zilo zi vumelekile ka mina, kanilezi a hi zona zontlhe zi vunako. Zontlhe zilo zi vumelekile ka mina, kanilezi a nzi vumeli ni xinwe xa zona a ku nzi fumela. [86]

¹³A zakuga za rumbu, ni rumbu ga zakuga; kanilezi Nungungulu i ta mbhetisa zontlhe. Kanilezi a miri a hi wa wubhayi, kanilezi ngwa Hosi, ni Hosi nja miri. [87]

¹⁴Lezi Nungungulu a nga vuxa Hosi, lezo i ta hi vuxa hina hi ntamu wakwe. [88]

¹⁵A mu zi tivi lezaku a mimiri ya nwina ziro za Kristu ke? Xana nzi ta teka a ziro za Kristu nzi zi maha a ziro za xibhayi ke? Kokwihi!

¹⁶A mu zi tivi lezaku loyi a ti tlhanganisako ni xibhayi i maha miri munwe zinwe naxo ke? Hakuva i ngalo; Lava vambiri va ta maha nyama yinwe. [89]

¹⁷Kanilezi loyi a tlhanganyisilweko ni Hosi i moya munwe zinwe nayo. [90]

¹⁸Chavani wubhayi! A zionho zontlhe lezi munhu a zi mahako zi lahandle ka miri wakwe; kanilezi loyi a bhayako i onhisa a miri wakwe. [91]

¹⁹A mu zi tivi lezaku a miri wa nwina i tempeli ya Moya wa ku Basa lowu wu nga nzeni ka nwina, lowu mu nyikilweko wona hi Nungungulu ke? Nwina a mu va nwina venyi, [92]

²⁰hakuva mu xabyilwe hi tsengo, hikwalaho dumisani Nungungulu mirini wa nwina. [93]