Read tshwa 1 Va le Korinte 7 Bible Online

1 Va le Korinte 7 - tshwa bible

1 Va le Korinte 7

¹Xungetano ni timhaka leti mu nga nzi tsalela, nzi ngalo: A wanuna i maha khwatsi loku a nga khumbi wasati,

²kanilezi hi kota ya wubhayi, ngha wanuna munwe ni munwani a hi ni sati wakwe, ni wasati munwe ni munwani a hi ni nuna wakwe. [94]

³Ngha wanuna a nyika ka sati wakwe lezi zi faneleko; zinghaho ni wasati ka nuna wakwe. [95]

⁴A sati a nga fumeli miri wakwe, sine nuna wakwe; zinghaho ni nuna wa kona, a nga fumeli miri wakwe, sine a sati.

⁵Mu nga tsonani, saseka loku mu vumelana hi xikhati xo kari, kasi mu fela ku ti nyikela kukhongeleni, mu tlhela mu tlhangana kambe, lezaku Satani a nga mu ringi hi kuhluleka ka nwina a ku ti khoma. [96]

⁶Kanilezi nzi wulile lezi hi ku mu tsetsa, na ku nga hi kulaya. [97]

⁷Kasike mina nzi waku ngha vanhu vontlhe vaku khwatsi hi mina. Ahembalokoke, munhu ni munhu i nyikilwe xinyikiwo xakwe xi mu faneleko na xi nyikiwa hi Nungungulu; a munwani hi tshamela legi, ni munwani hi legiya. [98]

⁸Kanilezi ka lava va nga tekangiko, ni va nga tekwangiko, ni ka tinoni, nzi ngalo: Zi va sasekele loku va tshama kota mina. [99]

⁹Kanilezi loku va nga zi koti ku ti khoma, a va teke ni ku tekiwa; hakuva i chukwana a ku teka hambu ku tekiwa a ku hunza a kuswa hi kunavela. [100]

¹⁰Kanilezi nza laya lava va tekeneko, na ku nga hi mina, kanilezi hi Hosi, nzi ngalo: A wasati ngha a nga suki nuneni wakwe, [101]

¹¹(kanilezi loku a suka ngha a tshama a nga tekiwi, kutani a tlhela a zwanana ni nuna wakwe;) ni wanuna ngha a nga tsiki a sati wakwe.

¹²Kanilezi a ka vanwani nza wula mina, na ku nga hi Hosi, nziku: Loku a hi kona makabye a nga ni sati loyi a nga kholwiko, a nga dzuki a mu tsika, loku a sati a ranza ku tshama naye.

¹³Ni wasati loyi a nga ni nuna a nga kholwiko, a nga dzuki a mu tsika, loku a ranza ku tshama naye.

¹⁴Hakuva a wanuna loyi a nga kholwiko i basisilwe hi kota ya sati wakwe, ni wasati loyi a nga kholwiko i basisilwe hi nuna. Loku zi wa nga hi lezo ngha vanana va nwina va nga hlazekangi, kasike lezi va basile. [102]

¹⁵Kanilezi loku a suka loyi a nga kholwiko, a suke; a makabye wa xi-i na kutani wa xisati a va khungwangi hi timhaka ta kunghaho, hakuva Nungungulu i hi vitanele ku hanya kuruleni.

¹⁶Hakuva wena wasati, u zi tiva hikuyini lezaku u ta hanyisa a nuna wa wena ke? Na wena wanuna, u zi tiva hikuyini lezaku u ta hanyisa a sati wa wena ke? [103]

¹⁷Ntsena lezaku munhu ni munhu a hanye kota lezi a Hosi yi mu nyikileko zona, ni laha Nungungulu a mu vitanileko ha kona. Nzi laya lezo mabandleni wontihe. [104]

¹⁸Loku munhu a vitanilwe na hi xitshiva, ngha a nga mahi nkhuna. Loyi a vitanilweko na hi nkhuna, ngha a nga engheni wukwera. [105]

¹⁹A wutshiva a hi nchumu, ni wuhkhuna a hi nchumu; a xa hombe hi ku hlayisa a milayo ya Nungungulu. [106]

²⁰A munwe ni munwani a simamise ka tshamela lego a vitanilweko na a hi ka gona. [107]

²¹Loku u vitanilwe na u hi khumbi, u nga karateki ha gona; kanilezi loku u zi kota ku tlhatlheka, hlawula lezo. [108]

²²Hakuva loyi a vitanilweko hi Hosi na hi khumbi, mutirulwa wa Hosi; zinghaho ni loyi a vitanilweko na a tlhatlhekile, i khumbi ya Kristu. [109]

²³Mu xabyilwe hi ntsengo, mu nga dzuki mu maha tikhumbi ta vanhu. [110]

²⁴Vamakabye, ngha na munhu ni munhu a simamisa mahlweni ka Nungungulu ka tshamela legi a nga vitanwa na hi ka gona.

²⁵Makunu hi xungetano ni vanhwana, a nzi na nayo wa Hosi; kanilezi nzo luleka khwatsi hi munwe loyi a tsumbekileko, kota lezi nzi kumileko wuxinji ga Hosi. [111]

²⁶Hikwalaho nza alakanya mina, hi kota ya kukarateka ka nguva leyi, lezaku zi sasekile ka munhu a kuva a simamisa ka tshamela lego a nga ka gona.

²⁷Loku u bohilwe ka wasati, u nga lavi ku tlhatlheka. Loku u nga hi ha sati, u nga lavi sati.

²⁸Kanilezi loku u teka, a ku onhi; ni loku a nhwana a tekiwa, a nga onhi. Kanilezi a va kunghahi va ta karateka nyameni, mina nza va xanisekela.

²⁹Kanilezi nza mu byela vamakabye a xikhati xi komile, kusukela lezi ngha lava va nga ni vasati va hanyisa ku khwatsi a va navo; [112]

³⁰ni lava va rilako vaku khwatsi a va rili; ni lava va tsakako vaku khwatsi a va tsaki; ni lava va xavako vaku khwatsi a va na nchumu;

³¹ni lava va tirisako a za misava vaku khwatsi a va zi tirisi nguvu; hakuva a matshamela ya misava leyi ma hunza. [113]

³²Kanilezi nzi ranza ku ngha mu tlhatlheka kukaratekeni. Loyi a nga tekangiko i chela kota hi zilo za Hosi, lezaku i ta yi nengelisisa kuyini a Hosi. [114]

³³Kanilezi loyi a nga ni sati i chela kota hi zilo za misava, lezaku i ta nengelisisa kuyini a sati wakwe.

³⁴Hizalezo ku kona kuhambana xikari ka pswatsi ni nhwana. Loyi a nga tekwangiko i chela kota hi zilo za Hosi, lezaku kasi a fela ku basa le mirini ni le moyeni; kanilezi loyi a nga ni nuna i chela kota hi zilo za misava, lezaku i ta nengelisisa kuyini a nuna wakwe. [115]

³⁵Nza wula lezi a kuva mu vuneka, na ku nga hi a ku mu khunga hi gota, kanilezi kasi ma famba hi kufaneleko, mu namarela ka Hosi na mu nga tsopetiswi hi nchumu.

³⁶Kanilezi loku a munhu a alakanya lezaku a chela tingana a nhwana loyi a mu tsumbisileko hi ku mu hunzisa a xikhati xakwe xa ku tekiwa, ni lezaku i fanele ku tekiwa, ngha a maha lezi a zi ranzako; a va tekane, a hi kuonha.

³⁷Kanilezi loyi a tiyisileko a mbilwini yakwe, na a nga kurumetwi hi nchumu, kanilezi a hi ni ntamu ku maha kuranza kakwe, loku a pimile mbilwini yakwe a ku hlayisa a nʼwana wakwe wa xisati le kabye, i maha khwatsi.

³⁸Lezoke loyi a nyikelako a nʼwana wakwe wa xisati a kuva a tekwa, i maha khwatsi; ni loyi a nga mu nyikeliko ku tekwa i maha khwatsi nguvu. [116]

³⁹A wasati i bohilwe na a ha hanya a nuna wakwe; kanilezi loku a nuna afa, i tlhatlhekile; a nga tekana ni wihi loyi a mu ranzako, ntsena ku mahiwa Hosini. [117]

⁴⁰Kanilezi mina nza alakanya lezaku i tava a katekile loku a tshamisa zalezo. Kambe nza kholwa lezaku na minawu nzi na ni Moya wa Nungungulu.