Read tshwa 2 Va le Korinte 1 Bible Online

2 Va le Korinte 1 - tshwa bible

2 Va le Korinte 1

¹Mina Paule, nzi nga mupostoli wa Jesu Kristu hi kuranza ka Nungungulu, na Timote a makabye wa hina, ha losa a bandla ga Nungungulu legi gi nga le Korinte, zinwe ni vobasa vontlhe lava va nga le Akaia gontlhe, hiku: [1]

²A tipswalo a tive na nwina ni kurula ka le ka Nungungulu a Dadani wa hina, ni Hosi Jesu Kristu. [2]

³A bongiwe Nungungulu tlhelo Dadani wa Hosi ya hina Jesu Kristu, a Dadani wa wuxinji ni Nungungulu wa kuchavelela kontlhe; [3]

⁴loyi a hi chavelelako kuxanisekeni ka hina kontlhe, kasi hi fela ku zi kota ku chavelela vona lava va nga le kuxanisekeni, hi kuchavelela loku hi chavelelwako ha kona hi Nungungulu. [4]

⁵Hakuva kota lezi a kuxaniseka ka Kristu ku hi taleleko, hizalezo kambe ni kuchavelelwa ku hi talele ha Kristu. [5]

⁶Loku hina hi xaniseka, zi maheka kasi nwina mu fela ku chavelelwa ni ku hanyiswa; ni loku hi chavelelwa ku maha lezaku nwina mu kuma kuchavelelwa, loku ku mu vunako a ku timisela a zixaniso lezi hinawu hi xaniswako ha zona. [6]

⁷Hakuva a kutsumba ka hina ha nwina ku tiyile, hi ku tiva lezaku kota lezi mu nga vahlengeli va kuxaniseka, lezo kambe mu tava vahlengeli va kuchavelelwa. [7]

⁸Hakuva vamakabye, a hi zi ranzi lezaku mu kohlwa hi khombo hi nga welwa ha gona le Asia, hakuva hi wa tsimbeketilwe nguvu ni ku hunza a ntamu wa hina, kala hi nga ha tsumbi aku hi ta hanya. [8]

⁹Ina, hina wutsumbu hi wa alakanya aku hi tafa, hi nga ha ti tsumbi, kanilezi hi tsumba Nungungulu loyi a vuxako a vafileko; [9]

¹⁰yena loyi a nga hi hlanguta a kufeni ko tshisa wa ha ta hi hlanguta. Hi mu tsumbile lezaku i ta engeta a hi hlanguta, [10]

¹¹na hi kari hi vuniwa hi mikhongelo ya nwina, lezaku vanyingi va fela ku bonga Nungungulu hi kota ya xinyikiwo lexi hi nyikilweko xona hi kota ya ku hi khongelela ka vanyingi. [11]

¹²Hakuva a kutikulisa ka hina ni wukustumunyu ga livalo la hina, hi lezaku hi hanyile laha misaveni, nguvunguvu xikari ka nwina, hi wubaswa ni wunene ga Nungungulu, na ku nga hi wutlhari ga nyama, kanilezi hi tipswalo ta Nungungulu. [12]

¹³A hi mu tsaleli a timhaka tinwani ahandle ka leti mu ti gonzako, leti mu ti tivako; ha tsumba lezaku mu ta ti tiva kala kugumesa,

¹⁴kota lezi mu nga vumela hi tlhelo, lezaku hi hina a kutikulisa ka nwina, kota lezi nwina mu nga kutikulisa ka hina a sikwini ga Hosi ya hina Jesu. [13]

¹⁵Na nzi hi ni kutsumba loku nzi wa xuvile a kuta ka nwina kuranga, kasi ma fela kuva ni xinyikiwo xa wumbiri. [14]

¹⁶Nzi wa lava ku hunza hi ka nwina nziya Makedonia, nzi tlhela nzi mu enzela kambe kuwuyeni ka mina hi le Makedonia, kasi ma nzi heleketa lwenzweni la mina la kuya Judia. [15]

¹⁷Laha nzi nga xuva ku maha lezo, nzi lo maha wugangaganga ke? Kutani a zilo lezi nzi xuvako a ku zi maba, nzi xuva a ku maha zona khwatsi hi ka nyama ke? Loku nziku: Ina, ni Ahihi, zi kona ka mina khati ginwe ke? [16]

¹⁸Kanilezi nza tiyisa hi kutsumbeka ka Nungungulu, lezaku a timhaka leti nzi ti wulako ka nwina a ti hunzukangi ti maha ta Ina ni Ahihi.

¹⁹Hakuva a Nʼwana wa Nungungulu, yena Jesu Kristu, loyi a nga xumayelwa xikari ka nwina hi mina na Silvanusi na Timote, a nga mahangi wa Ina ni Ahihi, kanilezi a kakwe ku na ni Ina xontlhe xikhati. [17]

²⁰Hakuva hambu loku a zitsumhiso za Nungungulu zi ngava zingani, a Ina wa zona ku kona ka yena; hi kota ya lezo hi wula Amen ha yena, lezaku Nungungulu a dumiswa ha hina. [18]

²¹Makunu loyi a hi tiyisako zinwe na nwina ka Kristu, ni ku hi tota, hi yena Nungungulu; [19]

²²i vekile ka hina a xifungo xakwe, a zima seve timbilwini ta hina hi Moya. [20]

²³Kanilezi nza vitana Nungungulu a ku maha wukustumunyu muhefemulweni wa mina, lezaku hi kota ya ku mu zwela wusiwana a nzi tangi Korinte. [21]

²⁴Na ku nga hi lezaku nzi ranza ku fumela a kukholwa ka nwina; kanilezi nza lava ku mu vuna a kuva mu tsaka, hakuva mu yimile khwatsi kukholweni. [22]