Read tshwa 2 Va le Korinte 10 Bible Online

2 Va le Korinte 10 - tshwa bible

2 Va le Korinte 10

¹Mina Paule wutsumbu nza mu khongotela hi wunene ni kurula ka Kristu, mina loyi nzi ti koramisako loku nzi hi xikari ka nwina, kanilezi loku nzi hi hava nzi maha wurena ka nwina. [112]

²Ina, nza mu khongotela lezaku mu nga nzi kurumeti loku nzita ku maha hi wurena ka vanwani lava va wulako lezaku hi famba hi ka nyama. [113]

³Hakuva hambu hi famba na hi ka nyama a hilwi hi ka nyama.

⁴Hakuva a matlhari ya hina a hi ya nyama, kanilezi nja ntamu mahlweni ka Nungungulu a ku hahlula makhokhola. [114]

⁵Hi hangalasa a maalakanyo, ni tigingisi tontlhe leti ti tlakukileko to bhiyela a kutiva ka Nungungulu, hi khozisa a maalakanyo wontihe mava tikhumbi ta ku ingisa Kristu; [115]

⁶loku ku mbhelele a kuingisa ka nwina, nzi tava nzi longile a ku tsayisa kontlhe a kungaingisi. [116]

⁷Cuwukani, za su dlunya mahlweni ka nwina. Loku munhu a ti tsumba lezaku ngwa Kristu, ngha a alakanya lezaku kota lezi yena a nga wa Kristu, hi zalezo na hinawu. [117]

⁸Hakuva hambu loku nzi ti dzunza hi kota ya ntamu wa hina, lowu a Hosi yi nga hi nyika wona kasi mu akiwa ha wona, na ku nga hi lezaku mu hahlulwa, mina nzi nga ta wiswa tingana;

⁹kasi ku nga woneki ku khwatsi nzo lava ku mu dzukisa hi mapapilo ya mina.

¹⁰Hakuva ve ngalo: A mapapilo yakwe ma tika ma na ni ntamu, kanilezi loku a hi kona yena wutsumbu i na ni gome, ni kuwulawula kakwe ka nyenyeka, [118]

¹¹Loye a wulako lezo a pime lezaku lezi hi zi tsalako mapapilweni loku hi nga hi kona, hi ta maha zalezo loku hi chikela.

¹²Hakuva a hi tiyi ku ti hlaya kutani ku ti ecanyisa ni vokari lava va ti dzunzako wutsumbu gabye; kanilezi a va hi na kupima, hakuva va ti ringanyisa ni wutsumbu gabye, ni ku ti ecanyisa ni wutsumbu gabye ntsena. [119]

¹³Kanilezi hina hi nga ta ti dzunza ku tlula mpimo, kanilezi hi ta ti dzunza hi mpimo lowu hi tsemelweko wona mbhingano hi Nungungulu, lowu wu chikeleko ni ka nwina.

¹⁴Hakuva a hi kilaveteli hi ntamu, a ku khwatsi hi loku hi nga chikelangi ka nwina; hakuva hi chikele ni kwaleyo ka nwina hi ivangeli ya Kristu. [120]

¹⁵A hi ti dzunzi ku tlula mpimo mitirweni ya vanwani vanhu; kanilezi ha tsumba lezaku, a kukholwa ka nwina loku ku anzile, hina hi ta kuliswa xikari ka nwina, kasi a mbhingano wa hina wa engetelwa. [121]

¹⁶Lezaku kasi ha kanela ivangeli ni ka matlhelo lawa ma nga mahlweni ka nwina, hi nga ti dzunzi tlhelweni ga munwani hi zilo lezi zi sinako zi tirilwe kona.

¹⁷Kanilezi loyi a ti dzunzako, ngha a ti dzunza Hosini. [122]

¹⁸Hakuva yena loyi a ti dzunzako a hi yena a amukelekako, kanilezi sine loyi a dzunziwako hi Hosi. [123]