Read tshwa 2 Va le Korinte 11 Bible Online

2 Va le Korinte 11 - tshwa bible

2 Va le Korinte 11

¹Hi nga timiselani kutsongwani ha mina loku nzi wulawula wupumbu; kunene ma timisela na mina. [124]

²Nza lusa ha nwina hi xiluse xa Nungungulu; hakuva nzi lo mu nyikela a ku wutiwa hi nuna munwe, kasi nza fela ku mu yisa ka Kristu na mu hi nhwana a basileko. [125]

³Kanilezi nza chava lezaku, kota lezi a nyoka yi nga khohlisa Eva hi wumbyori ga yona, lezo a maalakanyo ya nwina ma ta onheka ma susiwa wuneneni legi gi nga ka Kristu. [126]

⁴Hakuva loku ata munhu ka nwina, a ta kanela munwani Jesu, loyi hi nga mu kanelangiko hina, kutani loku mu nyikiwa a munwani moya lowu wu hambeneko ni lowu mu nga wu amukela hi mahlweni, kutani yinwani ivangeli yi hambeneko ni leyi mu yi amukeleko, nwina ma hunisela ha zona. [127]

⁵Kanilezi nza alakanya lezaku a nzi hunziwi ha nchumu hi vapostoli lava va hombe.

⁶Hambu lezi nzi nga ni vilavila kuwulawuleni, a nzi mahi lezo kutiveni; futsi, hi ku wonekelisile xikari ka nwina zilweni zontlhe. [128]

⁷Kutani nzi onhile laha nzi nga ti koramisa, lezaku nwina mu fela ku kuliswa, lezi nzi nga kanela ivangeli ya Nungungulu xikari ka nwina nzi nga hakhi nchumu ke? [129]

⁸Nzi lo phanga manwani mabandla, nzi hakhiswa ha wona, kasi nza fela ku tirela nwina.

⁹Laha nzi nga hi muvumali xikhatini lexi nzi nga hi xikari ka nwina, a nzi binzisangi munhu; hakuva laha vamakabye va ngata hi le Makedonia va lo nzi vuna hi lezi nzi nga zi vumala; nzi lo ti hlayisa ha nzoce nzi nga mu binzeli, nza ha ta ti hlayisisa zalezo. [130]

¹⁰Khwatsi hi lezi a zinene za Kristu zi nga ka mina, a ku na munhu a ta nga nzi wutlela a ku ti dzunza loku matikweni ya Akaia. [131]

¹¹Hikuyini ke? Hi lezi nzi nga mu ranziko ke? Nungungulu wa zi tiva lezaku nza mu ranza. [132]

¹²Lezi nzi zi mahako, nza ha ta zi maha, kasi nzi fela ku va thindekisa vona lava va lavako xikhati xa kuva va ti tlakusa va kumeka na va fana na hina. [133]

¹³Hakuva a vakunghahi mbapostoli va mawunwa, zitiri zi khohlisako, va ti maha wutsumbu gabye a kuva vapostoli va Kristu.

¹⁴Futsi a zi na kuhlamalisa, hakuva na Satani wa ti hunzula a ku khwatsi i ngelosi ya kuwonekela. [134]

¹⁵Hikwalaho ngha hi nga hlamali loku a malanza yakwe ma ti hunzula maku khwatsi malanza ya kululama. A magumeso yabye ma ta ringana ni mitiro yabye. [135]

¹⁶Kambe nzi ngalo: Ngha na munhu a nga alakanyi aku nzi xipumbu, kanilezi loku nzi hi tano, nzi amukeleni ku khwatsi nzi xipumbu, kasi na minawu nza fela ku ti dzunza kutsongwani,

¹⁷Lezi nzi zi wulako, loku nzi kari nzi ti dzunza, a nzi wulawuli hi ka Hosi, kanilezi nzi wulawula hi wupumbu. [136]

¹⁸Kota lezi vanyingi va ti dzunzako hi ka nyama, minawu nzi ta ti dzunza. [137]

¹⁹Hakuva nwina ma honisela nguvu hi zipumbu, nwina lava mu tlharihileko!

²⁰Nwina ma honisela hi munhu hambu loku a mu maha tikhumbi, ni loku a mu khadamula, ni loku a mu khoma, loku a ti kukumukisa, ni loku a mu phakata nghoheni. [138]

²¹Nzi wula hi tingana, a ku khwatsi hi wa hi ni gome. Lexi munhu a xi tiyelako, (nzi wulawula wupumbu) minawu nza xi tiyela. [139]

²²Vona mbaHeberu ke? na minawu nzi yena. Vona mbaIsraeli ke? na minawu nzi yena. Vona mba lixaka la Abrahama ke? na minawu nzi wa lona. [140]

²³Vona malanza ya Kristu ke? (Nzi wulawulisa ku kwa nzi hlanyile) nza hunzisa nguvu mina; a mitirweni nza va hunza, nzi khotselwe paxweni ku hunza vona, nzi bilwe tirimbiri ku tlula mpimo, nzi wa hi timhangweni ta kufa zikhati zinyingi. [141]

²⁴A vaJuda va nzi bile a ntlhanu wa zikhati a mune wa makume ya zifuta ku tsikwa xinwe. [142]

²⁵Makhati manharu nzi lo biwa hi tinhonga, khati ginwe nzi lo gandliwa hi maribye, makhati manharu nzi lo xaniseka hi kupanzeka ka mataru, nzi hetile siku ginwe ni wusiku ga kona na nzi ndlengandlengiswa bimbini. [143]

²⁶Zikhati zinyingi nzi wa hi mapfhumbeni, nzi hi timhangweni ta micongo, nzi wela mandleni ya vaphangi, nzi lava ku dawa hi va ka hina, ni vamatiko, nzi wa hi timhangweni ta lomu mitini, ni ta le xiwuleni, ni ta lomu bimbini, ni ta lomu xikari ka vamakabye va mawunwa. [144]

²⁷Nzi wa hi ni mitiro yo tala ni kukarateka, nzi pileka zikhati zinyingi, nzi hi ni ndlala ni tora, nzi yila zakuga zikhati zinyingi, nzi xaniseka hi xirame ni wuna. [145]

²⁸Ahandle ka zilo zinwani, zi kona lezi zi nzi tsimbeketako wontihe masiku, hi lezaku nzi khatalela wontihe mabandla. [146]

²⁹Himani a nga ni gome, mina nzi ngavi na gome ke? Himani a khubekiswako, mina nzi ngaswi hi zanga ke?

³⁰Loku zi lavekile a kuva nzi ti dzunza, nzi ta ti dzunza hi za gome ga mina.

³¹Nungungulu tlhelo Dadani wa Hosi Jesu, loyi a bongiwako kala kupinzuka, wa zi tiva lezaku a nzi hembi wunwa. [147]

³²Le Damasku a mwamangulo a nga hi lahasi ka hosi Aretasi, i lo lavelela a muti wa va le Damasku, kasi ku nzi khoma; [148]

³³kanilezi nzi lo chikiswa laha ligingisini hi njhanela na nzi khonelwe xirunzwini, nzi su ponisa zalezo mandleni yakwe.