Read tshwa 2 Va le Korinte 12 Bible Online

2 Va le Korinte 12 - tshwa bible

2 Va le Korinte 12

¹Mina nzi yimelwe hi ku ti dzunza, hambu loku zi nga faneli; kanilezi nzi ta wulawula hi ziwoniso, ni kuvululelwa hi Hosi.

²Mina nza tiva a munhu loyi a nga ka Kristu, loyi a nga tlakuselwa tilweni ga wunharu, a 14 wa malembe ma hunzileko (kutani i wa hi le mirini, ahati; kutani i wa humile mirini, ahati; Nungungulu wa zi tiva). [149]

³Nza zi tiva lezaku munhu loyi i lo tlakuselwa Paradiseni (kutani i wa hi le mirini, ahati; kutani i wa humile mirini, ahati; Nungungulu wa zi tiva);

⁴leyo i lozwa a magezu ma nga wulekiko, lawa ma nga faneliko ku ruliwa hi munhu. [150]

⁵Nzi ta ti dzunza hi munhu loye; nzi nga ta ti dzunza hi kota ya wutsumbu ganga, kanilezi hi gome ga mina. [151]

⁶Hambu loku nzi ranza ku ti dzunza, nzi nga tava xipumbu, hakuva nzi ta wulawula zinene. Kanilezi nzi ta tsika, kutani munhu a nga alakanya ha mina lezaku nzi wahombe ku hunza lezi a nzi wonisako zona, ni lezi a zi zwako ha mina. [152]

⁷Hi kota ya ku kasi nzi nga ti kukumukisi hi kuvululelwa loku ka hombe, nzi lo nyikiwa a muzwa lomu nyameni, a ntsumi wa Satani wa ku nzi tshekulela lezaku nzi nga ti kukumukisi hi ku hunzeleta nzheko. [153]

⁸Nzi khongotele Hosi zikhati zinharu lezaku wu fela ku suka ka mina. [154]

⁹Kanilezi Hosi yi te ngalo ka mina; A tipswalo ta mina ti ku enele, hakuva a ntamu wa mina wu mbheleliswa gomeni. Hikwalaho nzi ranza a ku ti dzunza gomeni ga mina, lezaku a ntamu wa Kristu wu fela ku tshama ka mina. [155]

¹⁰Hikwalaho nza xalala gomeni, ni kurukatelweni, ni kuvumaleni, ni le kuxanisweni, ni le kukaratekeni hi kota ya Kristu; hakuva loku nzi hi ni gome, hi kona nzi nga ni ntamu. [156]

¹¹Makunu nzi mahile xipumbu, hi ku ti dzunza, na kasi hi nwina mu nga nzi kurumeta; hakuva nzi wa fanele a kuva nzi dzunziwa hi nwina. Hakuva a nzi hunziwangi ha nchumu hi vapostoli lava va hombe, hambu lezi nzi nga hiko nchumu. [157]

¹²A zikombiso za wupostoli ga mina zi lo tiriwa xikari ka nwina hi kutimisela kontlhe, hi ziwoniso ni zirewukiso ni mitiro ya ntamu. [158]

¹³Hakuva a manwani mabandla ma mu hunza hi yini? Hi lezi nzi nga kala ku mu binzela ke? Nzi tsetseleleni a xihoxo lexo! [159]

¹⁴Langutani, lexi xikhati xa wunharu na nzi longile a ku mu enzela. Nzi nga ta mu binzela, hakuva a nzi lavi za nwina, nzi lava nwina. A vanana a va faneli ku vekela vapswali, kanilezi a vapswali hi vona va vekelako vanana. [160]

¹⁵Mina nza ranza a ku nyikela zontlhe za mina, ni kuva nzi nyikelwa wutsumbu hi kota ya mihefemulo ya nwina. Loku mina nzi mu ranza nguvu, hi kona nwina mu ta nga nzi ranza kutsongwani ke? [161]

¹⁶Kutani mu taku: A nzi mu binzisangi, kanilezi kota lezi nzi nga ni mano nzi lo mu khoma hi kukhohlisa. [162]

¹⁷Nzi lo mu gelela nchumu hi munwe wa lava nzi va rumileko vata ka nwina ke? [163]

¹⁸Nzi lo khongotela Titusi a kuva ata ka nwina, nzi mu rumela kuta zinwe ni makabye munwani. A ngava Titusi a mu gelele xa nchumu ke? Xana a hi fambangi naye hi moya munwe ni makanzihelo manwe ke? [164]

¹⁹Ma alakanya nwina muku xontlhe lexi xikhati ho maha makalavisa mahlweni ka nwina ke? Ahihi, hi wulawula mahlweni ka Nungungulu ni ka Kristu. Kanilezi varanzekako, zilo zontlhe zi mahiwa kasi ku mu vuna. [165]

²⁰Hakuva nza chava lezaku, loku nzita nzi ta ta mu kuma na mu nga hi lezi nzi zi ranzako, na nwinawu mu nzi kuma na nzi hi lezi mu nga zi ranziko; ni lezaku ku nga dzuka kuva kona kuholova, ni xiluse, ni zanga, ni kuhambana, ni mahlevo, ni kulumbetana, ni kutikukumukisa, ni mazolonga. [166]

²¹Ku nga taku loku nzi chikele ka nwina, a Nungungulu wa mina i ta nzi bohlisa mahlweni ka nwina, zonake nzi rilela vanyingi lava va onhileko kale, va nga hunzulukangiko a kunyenyezeni ni wubhayini ni wurembini legi va gi mahileko. [167]