Read tshwa 2 Va le Korinte 3 Bible Online

2 Va le Korinte 3 - tshwa bible

2 Va le Korinte 3

¹Nweno ha ha ta sanguleta a ku ti dzunza ke? Xana ku laveka ka hina, khwatsi hi ka vanwani, a mapapilo ya ku hi yimela xikari ka nwina, kutani a mapapilo ya ku hi yimela ma humako ka nwina ke? [30]

²Nwina mu papilo ga hina, gi tsalilweko timbilwini ta hina, gi tibyiwako ni ku gonziwa hi vanhu vontlhe. [31]

³Hakuva za su dlunya lezaku nwina mu papilo ga Kristu, legi gi tsalilweko hi hina, na mu nga tsaliwangi hi tinta, kanilezi hi Moya wa Nungungulu loyi a hanyako; a mu tsaliwangi timbiteni ta maribye, kanilezi timbileni ta nyama, ti nga timbilu ta vanhu. [32]

⁴Hakuva hi na ni kutsumba loku ka Nungungulu ha Kristu;

⁵na ku nga hi lezaku hina wutsumbu, hi ringene a ku wula nchumu lezaku wuta hi ka hina wutsumbu; kanilezi a ntamu wa hina wuta hi ka Nungungulu; [33]

⁶loyi a nga hi maha a kuva hi ringana a ku maha zitiri za xivumelwano xiswa; na ku nga hi lexi xa kutsala, kanilezi xa Moya; hakuva a nayo wu tsalilweko wa daya, kanilezi a Moya wa hanyisa. [34]

⁷Kanilezi loku a kukhozela ka kufa, loku ku tsalilweko maribyeni, na ku tile hi kungangamela kala a vanana va ka Israeli va nga zi koti a ku cuwuka a nghohe ya Mosi hi kota ya kungangamela ka yona; na ku hi kungangamela loku ku nga hunza;

⁸xana kunene a kukhozela ka Moya ku nga tava ni kungangamela ka hombe nguvu ke? [35]

⁹Hakuva loku a kukhozela ka kukona ku hi ni kungangamela, ka hunziwa nguvunguvu hi kungangamela ka kukhozela ka kululama. [36]

¹⁰Lezi zi nga ranga ziva ni kungangamela, a za ha hi na kungangamela loku zi ringanyiswa ni kungangamela loku ku hunzisako.

¹¹Hakuva loku lezi zi hunzako zi tile hi kungangamela, zi ta ngangamela nguvunguvu lezi zi simamisako.

¹²Hikwalaho lezi hi nga ni kutsumba ka kunghahi, hi kanela hi kutiyahlana,

¹³na hi nge khwatsi hi Mosi, loyi a nga fenengeta a nghohe yakwe hi nguwo, kasi a vanana va ka Israeli va nga zi koti a ku wona a magumo ya lezi zi hunzako. [37]

¹⁴Kanilezi a kupima kabye ku lo nonohiswa, hakuva kala ni nyamutlha lezi, loku va gonza a mitsalo ya xivumelwano xa kale, a nguwo leyi ya ha hi kona; a nguwo leyi yi susiwa ntsena ka Kristu. [38]

¹⁵Kanilezi kala ni nyamutlha lezi, loku ku gonziwa a timhaka ta Mosi, a nguwo yi tshama timbilwini tabye.

¹⁶Kanilezi kani hi rini va tlhelelako ka Hosi, a nguwo yi ta susiwa. [39]

¹⁷A Hosi hi wona Moya, ni laha wu nga kona a Moya wa Hosi, ku kona kutlhatlheka.

¹⁸Hina hontlhe lava hi cuwukako a kungangamela ka Hosi hi mahlo ma nga fenengetwangiko a ku khwatsi hi laha wonini, ha hunzuluswa a ku fanana zinwe naye, hi longoloka hi kungangamela kunwe hiya ka kunwani, kota lezi yi tirako Hosi leyi, yi nga Moya. [40]