Read tshwa 2 Va le Korinte 5 Bible Online

2 Va le Korinte 5 - tshwa bible

2 Va le Korinte 5

¹Hakuva ha zi tiva lezaku loku wu hahluka a xaxa wa miri wa hina, yi nga yindlu ya hina ya misava, hi na ni yindlu leyi yi akilweko hi Nungungulu, leyi yi nga akiwangiko hi mandla, ya pinzukelwa le tilweni. [49]

²Hakuva hakunene ha keta hi kunavela lezaku hi ambala a yindlu ya hina ya le tilweni; [50]

³hakuva loku hi yi ambele, zonake hi nga ta kumiwa na hi hi zimbyiri. [51]

⁴Hizinene, hina lava hi nga ka lowu xaxa ha keta ni ku binzwa; na ku nga hi lezaku hi ranza a ku tlumulelwa tinguwo, kanilezi hi ranza ku ambaliswa, kasi lezi zi fako zi fela ku mitiwa hi kuhanya. [52]

⁵Makunu loyi a hi tirileko a kuva hi ringana lexi xilo hi Nungungulu, loyi a nga hi zimela seve hi Moya. [53]

⁶Hikwalaho hi tiyilehlana xontlhe xikhati, na hi tiva lezaku loku ha ha tshamile mirini lowu, hi le kule ni Hosi,

⁷hakuva hina hi famba hi kukholwa, a hi fambi hi kuwona. [54]

⁸Nzi ngalo: Hi tiyilehlana, na hi ranza a kuva hi rura a mirini, hi ya tshama kaya zinwe ni Hosi. [55]

⁹Hikwalaho ha xuva nguvu a ku yi tsakisa, hambu hi hi kona mirini kutani hi humele ka wona.

¹⁰Hakuva hina hontlhe hi yimelwe hi ku wonekeliswa kota lezi hi nga zona mahlweni ka xitshamu xa kulamula xa Kristu; kasi munwe ni munwani a fela ku amukela lezi zi ringanako lezi a zi mahileko na a ha hi mirini, kutani zo saseka hambu zi hi za kubiha. [56]

¹¹Hikwalaho kota lezi hi tivako a kuchaveka ka Hosi, ha khongotela vanhu a ku kholwa, kanilezi Nungungulu wa zi tiva lezi hi nga zona; nza tsumba lezaku ha tibyiwa kambe livalweni la nwina.

¹²A hi tlheli hi ti dzunza ka nwina, kanilezi hi mu nyika xikhati xa kuva mu ti dzunza hi kota ya hina, kasi mu fela zi tiva ku hlamula lava va ti kulisako hi nghohe, na ku nga hi mbilu.

¹³Hakuva loku hi hungukile, hi hungukele Nungungulu; hambu loku hi hi ni kupima ku nene, hi nako hi kota ya nwina. [57]

¹⁴Hakuva a liranzo la Kristu la hi kurumeta, kota lezi hi alakanyako ku ngalo: Munwe i lo fela vontlhe, hikwalaho vontlhe va file. [58]

¹⁵Yena i lo fela vontlhe kasi lava va hanyako va nga ha ti hanyeli wutsumbu, kanilezi va hanyela loyi a ngafa a tlhela a vuka hi kota ya vona. [59]

¹⁶Hikwalaho a ha ha tivi munhu hi ka nyama; hambu lezi hi nga mu tiva Kristu hi ka nyama, makunu a ha ha mu tivisi lezo. [60]

¹⁷Hikwalaho loku munhu a hi ka Kristu, ximahwa xiswa; a za kale zi hunzile, zi mahile ziswa. [61]

¹⁸Kanilezi zontlhe lezi zita hi ka Nungungulu, loyi a hi tlhanganyisileko naye hi Kristu, a hi nyika a ntiro wa kutlhanganyisa,

¹⁹hakuva Nungungulu i wa hi ka Kristu loku a tlhanganyisa tiko zinwe naye, lezaku a nga ha va hlayeli a zihambuko zabye; makunu i hi nyikile a mhaka ya kutlhanganyisa. [62]

²⁰Hikwalaho hina hi mitsumi ya Kristu, hi Nungungulu a mu khongotelako ha hina; ha mu khongotela hi kota ya Kristu, ngha mu tlhanganyiswa ni Nungungulu. [63]

²¹Hakuva loyi a nga kala a nga ku tivi kuonha, Nungungulu i lo mu maha xionho hi kota ya hina; lezaku ha yena hi fela kuva kululama ka Nungungulu. [64]