Read tshwa 2 Va le Korinte 6 Bible Online

2 Va le Korinte 6 - tshwa bible

2 Va le Korinte 6

¹Kota lezi hi tirisanako naye ha mu khongotela lezaku mu nga amukeli tipswalo ta Nungungulu mahala, [65]

²hakuva i ngalo: Nzi ku ingisile a xikhatini xi faneleko, Nzi ku vunile hi siku ga kuhanyiswa. Langutani makunu hi xikhati xi faneleko, makunu hi siku ga kuhanyiswa. [66]

³A hi khunguvanyisi munhu ha nchumu, kasi a ntiro wa hina wu nga soliwi. [67]

⁴Kanilezi ka zilo zontlhe hi ranza ku kombisa lezaku hi malanza ya Nungungulu: hi kutimisela ka hombe, hi kuxaniseka, le makhombyeni, ni timhangweni, [68]

⁵ni kubiweni, ni le mapaxweni, ni le mawoyongeni, ni kupinyameni, ni le kurinzeleni, ni kuyileni ka zakuga,

⁶ni le kubaseni, ni le kutiveni, hi lihlaza-mbilu, hi wunene, ni ka Moya wa ku Basa, ni liranzo li nga ti mahisiko,

⁷na hi wulawula zinene, na hi ntamu wa Nungungulu, ni matlhari ya kululama a canjeni ga xinene ni ga xibhabha, [69]

⁸hi kudzunziwa ni ku nyenyiwa, hi wudumo ga kubiha ni wudumo go saseka; aku khwatsi hi vakohlisi, kasi lezi hi va zinene,

⁹a ku khwatsi hi lava va nga tibyiwiko, kasi lezo ha tibyiwa khwatsi; aku khwatsi hafa, kasi lezo ha hanya; aku khwatsi ha tsayiswa, kasi lezo a hi dawi; [70]

¹⁰a ku khwatsi hi xanisekile, kasi lezo ha tsaka xikhati xontlhe; a ku khwatsi hi lava va vumalako, kasi lezo hi fumisa votala; a ku khwatsi a hi na nchumu, kasi lezo hi na ni zilo zontlhe.

¹¹A milomu ya hina yi ahlamukile ka nwina va le Korinte, a mbilu ya hina yi anamile ka nwina nwentlhe.

¹²A mu tlimbanangi nzeni ka hina, kanilezi mu tlimbene timbilwini ta nwina. [71]

¹³Makunu a hi tlheliselaneni hi zalezo (nza wulawula khwatsi hi ka vanana) nzi anamiseleni a timbilu ta nwina.

¹⁴Mu nga bohelwi ntsungwa munwe ni va nga kholwiko; hakuva kunengela muni xikari ka kululama ni kubiha ke? Kutani hi kwihi a kutlhangana ka kuwonekela ni munyama ke? [72]

¹⁵Hi kwihi a kuzwanana ka Kristu na Beliali ke? Kuhlengela muni a nga nako loyi a kholwako ni loye a nga kholwiko ke?

¹⁶Ku kwihi a kuvumelana ka tempeli ya Nungungulu ni zifananiso za vanungungulu va mawunwa ke? Hina hi tempeli ya Nungungulu a hanyako, kota lezi Nungungulu a ngaku ngalo: Nzi ta tshama ka vona, nzi fambafamba xikari ka vona; nzi ta maha Nungungulu wabye, vona va ta maha vanhu va mina. [73]

¹⁷Hikwalaho ti hambanyiseni mu huma xikari ka vona, ku wula Hosi; mu nga khumbi a xilo xo nyenyeza, zonake nzi ta mu amukela. [74]

¹⁸Nzi tava Raru wa nwina, nwina mu tava a varisanyana ni vanhanyana va mina, ku wula Hosi ya Nyamintamu. [75]