Read tshwa 2 Va le Korinte 8 Bible Online

2 Va le Korinte 8 - tshwa bible

2 Va le Korinte 8

¹Kambe vamakabye, ha mu tivisa hi tipswalo ta Nungungulu leti ti nyikilweko mabandleni ya le Makedonia.

²Hambu lezi va nga hi nzhingweni wa kuxaniseka ka hombe va wa tsaka nguvu, ni lomu wusiwaneni gi etileko va lo nyikela hi matsenya. [86]

³Nzi va mahela wukustumunyu lezaku va lo nyikela hi kuranza kabye kotisa a ntamu wabye, ina ni ku hunza a ntamu wabye.

⁴Va lo hi khongotela nguvu lezaku va nyikwa a thomo ga ku hlengela na hina a ku vunetela lavo vo basa. [87]

⁵A va nyikangi lezi hi nga tsumbile zona ntsena, kanilezi va lo ranga va ti nyikela ka Hosi, zonake va lo ti nyikela ka hina hi kuranza ka Nungungulu. [88]

⁶Hikwalaho hi lo kombela Titusi lezaku a hetisa a ntiro lowu xikari ka nwina, kota lezi a nga yena a nga wu sangulisa. [89]

⁷Kota lezi mu anzileko zilweni zontlhe: hi kukholwa, hi kuwulawula, hi kutiva, hi kupinyama kontlhe, hi liranzo leli mu hi ranzako ha lona, ngha ma mu anza ntirweni lowu kambe. [90]

⁸A nzi wuli lezi hi ku mu laya, kanilezi nzi lava ku mu ringa hi wunene ga vanwani, nzi wona loku a liranzo la nwina li hi li nene. [91]

⁹Hakuva ma ti tiva a tipswalo ta Hosi ya hina Jesu Kristu, lezaku hambu lezi a nga fumile, i lo maha xisiwana hi kota ya nwina, lezaku nwina mu fela ku fuma hi kota ya wusiwana gakwe. [92]

¹⁰A mhakeni leyi nza mu byela a kualakanya ka mina: zi mu fanele nwina hakuva a nwecemu mu rangele vontlhe a ku tira ni ku ranza a ntiro lowu. [93]

¹¹Makunu mbhetisani a ntiro wa kona, lezaku kota lezi ku nga hi kona a kulonga, ngha ku hi kona kambe a kumbhetisa kota a ntamu wa nwina.

¹²Hakuva loku ku hi kona kuxuva ku nyika, a xinyikiwo xa amukeleka kotisa lezi munhu a nga nazo, na ku nga kotisi lezi a nga hiko nazo. [94]

¹³Hakuva a nzi wuli lezi lezaku vanwani va ta hehukelwa, nwina mu binzwa;

¹⁴kanilezi ku fela ku ecanyiswa; lezaku a xikhati lexi a pfuno wa nwina wu ta vuna a kuvumala kabye, kasi a pfuno wabye wu fela ku vuna kuvumaleni ka nwina, lezo ku tava kona kuringana;

¹⁵kota lezi ku tsalilweko ku ngalo: Loyi a wungeletelako nguvu a nga salangi ni nchumu, ni loyi a wungeletelako kutsongwani a nga vumalangi nchumu, [95]

¹⁶A ku bongiwe Nungungulu loyi a nyikileko Titusi yaleyo mbilu ya ku mu pinyamela.

¹⁷Hakuva i lo vumela khwatsi a kukhongotela ka hina kota lezi a nga pangamile nguvu i lo suka ata ka nwina hi kuranza kakwe yena nwinyi.

¹⁸Hi mu rumile zinwe ni makabye munwani, loyi a dzunziwako mabandleni wontihe hi kota ya ntiro wakwe ivangelini; [96]

¹⁹na ku nga hi lezo ntsena, kanilezi kambe i lo yimiswa hi mabandla wontihe a kuva a hi pangalata a ntirweni lowu wa wuxinji, lowu hi wu tirelako lezaku yi dumiswa a Hosi, ni ku wonisa a kuxuva ka hina. [97]

²⁰Hi ti tlharihela hi lezo, lezaku hi nga soliwi hi munhu hi kota ya hlengo wa hombe lowu wu tiriwako hi hina. [98]

²¹Hakuva hi chela kota hi zilo zi nene, na ku nga hi mahlweni ka Hosi ntsena, kanilezi ni mahlweni ka vanhu. [99]

²²Hi va rumile zinwe ni munwani makabye wa hina, loyi hi mu kumileko zikhati zinyingi na a pangamile zilweni zo tala, kanilezi makunu i pangamile nguvu hi kota ya kutsumba kakwe ka hombe ha nwina.

²³Makunu loku ku hi Titusi, makabye ni xitiri-kulori ka nwina; hi tlhelo ga vamakabye vanwani va hina, mitsumi ya mabandla ni wudzunzo ga Kristu. [100]

²⁴Hikwalaho kombisani ka vona mahlweni ka mabandla a xiwoniso xa liranzo la nwina, ni xa kutidzunza ka hina hi kota ya nwina.