Read tshwa 2 Va le Korinte 9 Bible Online

2 Va le Korinte 9 - tshwa bible

2 Va le Korinte 9

¹Xungetano ni hlengo wo vunetela a vobasa, a zi laveki lezaku nzi mu tsalela; [101]

²hakuva nza ku tiva a kulonga ka nwina, loku nzi ti dzunzako ha kona ka va le Makedonia, nziku a va le Akaia va wa longile a nwecemu; a kupangama ka nwina ku vuxile vanyingi vabye: [102]

³Kanilezi nzi rumile vamakabye, lezaku a kutidzunza ka hina hi kota ya nwina ku ngavi mahala mhakeni leyi; kanilezi lezaku mu fela ku tshama na mu longile, kota lezi nzi wulileko zona; [103]

⁴ku nga taku loku vata na mina a va le Makedonia, va ta mu kuma na mu nga longangi, hina hi chelwa tingana kutsumbeni loku, a nzi wuli tingana ta nwina.

⁵Hi ka lezoke nzi lo alakanya lezaku zi lavekile ku khongotela vamakabye a kuva va ranga vata ka nwina, kasi ka longiselwa khwatsi a xinyikiwo lexi mu nga si na mu xi tsumbisile, kasi xi fela kuva xi longile, na xi hi xinyikiwo xa matsenya, na ku nga hi ku kurumetwa.

⁶Mina nzi ngalo: Loyi a xwanyako kutsongwani, i ta tshovela kutsongwani; ni loyi a xwanyako nguvu, i ta tshovela nguvu. [104]

⁷A munwe ni munwani a nyike kota lezi a xuvako mbilwini yakwe; na a nga karateki, kutani ku kurumetwa; hakuva Nungungulu wa ranza loyi a nyikako na a xalele. [105]

⁸Nungungulu wa zi kota ku enzelekisa ka nwina a tipswalo tontlhe; lezaku nwina, na mu enelisilwe xikhati xontlhe zilweni zontlhe, mu fela kuva nazo zo tira mitiro yontlhe yo saseka: [106]

⁹Kota lezi ku tsalilweko ku ngalo: Loyi a xwanyileko, i lo avela lava va vumalako; A kululama kakwe ku simamisile kala kupinzuka. [107]

¹⁰Loyi a nyikako mbewu ka muxwanyi, a muha ni zakuga, i ta mu nyika a mbewu ku xwanya, a yi anzisa, ni ku enzelekisa a mihanzu ya kululama ka nwina, [108]

¹¹lezaku mu fumiswa zilweni zontlhe, kasi muva ni wuhana gontlhe, legi gi ta nga vanga ka hina kubonga ka Nungungulu. [109]

¹²Hakuva a hlengo lowu a hi wa ku vuna lava vobasa kuvumaleni kabye ntsena, kanilezi wu anzisa nguvu a kubongwa ka Nungungulu.

¹³Loku va wona a ntiro lowu va ta dumisa Nungungulu hi kota ya kuingisa ka nwina kukholweni ka ivangeli ya Kristu, ni xinyikiwo xa nwina ka vona ni ka vontlhe. [110]

¹⁴Kambe va mu kombelela na va lava ku mu wona hi kota ya tipswalo ta hombe ta Nungungulu leti ti nga ka nwina.

¹⁵A ku bongiwe Nungungulu hi kota ya xinyikiwo xakwe lexi xi nga wulekiko. [111]