Read tshwa Va le Galatia 3 Bible Online

Va le Galatia 3 - tshwa bible

Va le Galatia 3

¹Maphuphulu nzi nwina vaGalatia, mu kanganyisilwe hi mani, nwina lava Jesu Kristu a nga kombiswa ka nwina kubaseni kota loyi a belelweko? [34]

²Nza ranza ku mu wutisa hi mhaka leyi ntsena: Xana mu amukele Moya hi mitiro ya nayo, kutani hi lezi mu nga ingisa mu tlhela mu kholwa ke? [35]

³Kasi mu maphuphulu ya kunghahi ke? Nwina lava mu nga sangula hi Moya mu ta mbhetisa hi za nyama ke? [36]

⁴Xana mu xanisekele zilo zontlhe lezi mahala ke? Loku hakunene zi hi mahala! [37]

⁵Hikwalaho yena loyi a mu nyikako Moya, loyi a tirako zihlamaliso xikari ka nwina, i maha lezi hi mitiro ya nayo, kutani hi kuingisa ka ku kholwa ke? [38]

⁶Kota lezi Abrahama a nga kholwa Nungungulu, ku lo hlayelwa ka yena aku kululama.

⁷Hikwalaho tivani lezaku lava va nga va kukholwa, vona i vana va Abrahama. [39]

⁸Khwatsi hilezi a mutsalo wu wonileko kale lezaku Nungungulu i ta hlayela a vamatiko kululama hi kukholwa, wu lo tivisa Abrahama a mahungu yo saseka hi mahlweni wuku: A matiko wontihe ma ta katekiswa ha wena. [40]

⁹Hikwalaho lava va nga va kukholwa va katekiswa zinwe na Abrahama loyi a kholilweko.

¹⁰Hakuva vontlhe lava va tsumbako a mitiro ya nayo va lahasi ka nzhukano; hakuva ku tsalilwe ku ngalo: I rukatelwe mani na mani loyi a nga longoloxiko zilo zontlhe zi tsalilweko bhukwini ga nayo, a zi maha. [41]

¹¹Makunu zi la su dlunya lezaku a ku na munhu a hlayelwako kululama mahlweni ka Nungungulu hi nayo, hakuva ku tsalilwe ku ngalo: Lava va lulamileko va ta hanya hi kukholwa. [42]

¹²Kanilezi a nayo a wu humi kukholweni; ku tsalilwe ku ngalo: Loyi a mahako a zileletelo za mina i ta hanya ha zona. [43]

¹³Kristu i lo hi tirula ka nzhukano ya nayo, laha a nga mahiwa a nzhukano hi kota ya hina; hakuva ku tsalilwe ku ngalo: I rukatelwe mani na mani loyi a hayekilweko sinyeni, [44]

¹⁴lezaku a xikatekiso xa Abrahama xi fela kuta ka vamatiko ha Jesu Kristu; lezaku hi amukela a xitsumbiso xa Moya hi kukholwa. [45]

¹⁵Vamakabye, nzi wulawula hi wulela ga vanhu: Hambu loku ku hi xivumelwano xa munhu ntsena, loku xi tiyisilwe a ku na munhu a xi vinyako, hambu ku xi engetela nchumu. [46]

¹⁶Makunu a zitsumhiso zi lo wuliwa ka Abrahama ni ka pswalo wakwe. A ku wuliwi ku ngalo: Ni ka vona lava va humako pswalweni wa wena, khwatsi hi loku ku wuliwa hi vanyingi, kanilezi khwatsi hi loku ku wuliwa hi munwe, ku ngalo: Ni ka pswalo wa wena, wu nga Kristu. [47]

¹⁷Makunu lezi nzi wulako hi lezi. A xivumelwano lexi xi tiyisilweko kale hi Nungungulu a xi na ku vinyiwa hi nayo, lowu wu tileko na ku hunzile 430 wa malembe, a wu na ku maha xitsumbiso xi nga hi na ntamu. [48]

¹⁸Hakuva loku a tshomba yi nyikiwa hi nayo, a ya ha nyikiwi hi kota ya xitsumbiso; kanilezi Nungungulu i yi nyikile ka Abrahama hi xitsumbiso. [49]

¹⁹Loku zi hi lezo, xini a nayo ke? Wu lo nyikiwa nzhako hi kota ya zihambuko, wu tira kala ku chikela a pswalo lowu a xitsumbiso xi nga tsumbisile ka wona; wu lo yimiswa hi tingelosi a canjeni ga mutlhanganyisi. [50]

²⁰Makunu a mutlhanganyisi a hi mutlhanganyisi wa munwe ntsena. Kanilezi Nungungulu munwe. [51]

²¹Xana a nayo wu alana ni zitsumhiso za Nungungulu ke? Kokwihi, hakuva loku wu wa nyikilwe ka vanhu a nayo lowu wu zi kotako ku hanyisa, hakunene a kululama ngha ku tile hi nayo.

²²Kanilezi a mutsalo wu valele zontlhe kuonheni, kasi lava va kholwako va nyikiwa a xitsumbiso hi kukholwa ka Jesu Kristu.

²³Kanilezi na ku nga se ku chikela a kukholwa, hi lo wundliwa lahasi ka nayo, na hi rinzelwa a kukholwa loku ku nga ngha ku ta vululwa.

²⁴Hizalezo a nayo wu mahile a mugonzisi wa hina wa ku hi yisa ka Kristu, lezaku hi fela ku hlayelwa kululama hi kukholwa. [52]

²⁵Kanilezi na ku chikele a kukholwa, a ha hi lahasi ka mugonzisi.

²⁶Hakuva nwina nwentlhe mu varisanyana va Nungungulu hi kukholwa ka Kristu Jesu. [53]

²⁷Hakuva nwina nwentlhe lava mu nga bapatizelwa Kristu, mu ambele Kristu.

²⁸A ka hi kona muJuda hambu muGreki, a ka hi kona khumbi hambu a tlhatlhekileko, a ka hi kona wanuna hambu wasati; hakuva nwina nwentlhe mu munwe ka Kristu Jesu. [54]

²⁹Loku nwina mu hi va ka Kristu mu pswalo wa Abrahama, mu zigatshomba hi kota va xitsumbiso. [55]