Read tshwa Va le Galatia 4 Bible Online

Va le Galatia 4 - tshwa bible

Va le Galatia 4

¹Mina nziku: Laha a xigatshomba na xa ha hi xihlangi a xi hambani nchumu ni khumbi, hambu lezi xi nga hosi ya zontlhe;

²hakuva xi lahasi ka vawundli ni tinekwa ku kala ku chikela a xikhati xi yimisilweko hi raru wakwe.

³Hizalezo na hinawu, laha hi nga hi zihlangi hi wa hi wukhumbini lahasi ka mintamu yo sangula ya misava. [56]

⁴Kanilezi loku a xikhati xi tatisekile, Nungungulu i lo rumela a Nʼwana wakwe a belekilweko hi wasati na a pswalelwe lahasi ka nayo; [57]

⁵lezaku a fela ku tirula lava va nga hi lahasi ka nayo, kasi ha fela ku amukela a wunwana. [58]

⁶Kota lezi mu nga vana, Nungungulu i rumela a Moya wa Nʼwana wakwe timbilwini ta hina, lowu wu vitanako, wuku: Abba, Dadani!

⁷Hikwalaho a wa ha hi khumbi, kanilezi u nʼwana; ni loku u hi nʼwana, zonake u xigatshomba hi kuranza ka Nungungulu. [59]

⁸Kanilezi hi xikhati lexo mu nga kala mu nga tivi Nungungulu, mu wa hi wukhumbini ka vona lava va nga hiko vanungungulu. [60]

⁹Kanilezi makunu kota lezi mu mu tivileko Nungungulu, nguvunguvu a ku tibyiwa hi Nungungulu, hiyini ma ha tlhelelako nzhako a ka mintamu yo sangula leyi yi nga ni gome, leyi mu lavako a kuva tikhumbi ta yona kambe ke? [61]

¹⁰Nwina ma hlayisa a masiku, ni tihweti, ni tinguva, ni malembe! [62]

¹¹Nza chava ha nwina, kutani nzi ngava nzi tirele mahala xikari ka nwina.

¹²Nza mu khongotela vamakabye, ngha mu ku khwatsi hi mina, hakuva nzi mahile khwatsi hi nwina. A mu nzi gohelangi nchumu; [63]

¹³nwina ma zi tiva lezaku laha nzi nga kanela ivangeli kuranga ka nwina nzi wa nga hanyi khwatsi mirini. [64]

¹⁴Hambu lezi a kubabya ka mina ku nga hi xiringo ka nwina, a mu nzi kanyisangi hambu ku nzi nyenya; kanilezi mu lo nzi amukela khwatsi hi ngelosi ya Nungungulu, ni ku khwatsi hi Kristu Jesu wutsumbu. [65]

¹⁵Makunu ku kwihi a kuxalala ka nwina loku mu nga hi nako ke? Hakuva nza mu mahela wukustumunyu, lezaku loku zi wa kotekile ngha mu xokole a mahlo ya nwina, mu nzi nyika wona.

¹⁶Xana nzi nala wa nwina, hilezi nzi mu byelako a zinene ke?

¹⁷A vavanuna lava va pinyamela a ku mu lava, na ku nga hi kusaseka, va lava ku mu hambukisa ka hina, kasi ma namarela ka vona. [66]

¹⁸Kanilezi zi sasekile xontlhe xikhati a ku pinyamelelwa hi zo saseka, na ku nga hi loku nzi hi kona zinwe na nwina ntsena.

¹⁹Vana vanga, lava nza ha tlhelako nzi lunwa ha nwina, kala Kristu a wumbiwa nzeni ka nwina, [67]

²⁰nzi wa ta ranza a kuva kona xikari ka nwina makunu, nzi kanela hi ginwani gezu, hakuva nza kanganyiseka ha nwina.

²¹Nzi byeleni, nwina lava mu ranzako a kuva lahasi ka nayo, xana a mu zwangi lezi a nayo wu wulako zona ke?

²²Ku tsalilwe ku ngalo: Abrahama i wa hi ni vana vambiri; munwani i wa hi wa wasati loyi wa khumbi, ni munwani i wa hi wa sati loyi wa xiteko. [68]

²³Kanilezi a nʼwana wa wasati loyi wa khumbi i lo belekiwa hi ka nyama, kasi a nʼwana wa sati wa xiteko i belekilwe hi xitsumbiso. [69]

²⁴A mhaka leyi xipimanyiso, hakuva a vavasati lava va komba xivumelwano zimbiri; xinwe xa le xitsungeni xa Sinai, xi belekako vanana wukhumbini, hi yena Hagari.

²⁵Makunu Hagari loyi hi xitsunga xa Sinai lexi xi nga le Arabia, i fanana ni Jerusalema legi gi nga kona makunu, a nga khumbi zinwe ni vanana vakwe.

²⁶Kanilezi Jerusalema wa le hehla i tlhatlhekile, hi yena mamani wa hina, [70]

²⁷Hakuva ku tsalilwe ku ngalo: Tsaka wena ngonwa, u nga belekiko; Kanyuluka hi litsako wena loyi u nga hiko na mbeleko; Hakuva mbanyingi a vanana va loyi a tsikilweko ku hunza loyi a nga ni nuna. [71]

²⁸Makunu vamakabye, nwina mu vana va xitsumbiso khwatsi hi Isaka. [72]

²⁹Kanilezi khwatsi hi xikhatini xa kale, loyi a nga belekiwa hi ka nyama hi yena a nga xanisa loyi a belekilweko hi ka Moya, hizalezo ni makunu. [73]

³⁰Ahembaloko, yi wula yini mitsalo? Hlongola a wasati loyi wa khumbi ni nʼwana wakwe; hakuva a nʼwana wa wasati wa khumbi a nga taga tshomba zinwe ni nʼwana wa sati wa xiteko. [74]

³¹Hikwalaho vamakabye, a hi vana va wasati wa khumbi, kanilezi va loyi wa xiteko.