Read tshwa Va le Efesusi 1 Bible Online

Va le Efesusi 1 - tshwa bible

Va le Efesusi 1

¹Paule, a mupostoli hi kuranza ka Nungungulu, nza rungula a vobasa lava va nga le Efesusi, lava va tsumbekileko ka Kristu Jesu, nziku: [1]

²A tipswalo ni kurula a zive na nwina, zi tako hi ka Nungungulu a Dadani, ni ka Hosi Jesu Kristu. [2]

³A ku khesiwe Nungungulu tlhelo Dadani wa Hosi ya hina Jesu Kristu, loyi a hi katekisileko ka Kristu hi zikatekiso zontlhe za ka moya za le tilweni, [3]

⁴kota lezi a nga hi hlawula ka yena na ku nga se ku seketelwa misava, lezaku hi tava va kubasa, hi nga hiko na bawa mahlweni ka yena. [4]

⁵Hi liranzo lakwe i lo hi yimisa kale a kuva vana vakwe ha Jesu Kristu, kota a kuxuva ka kuranza kakwe, [5]

⁶kasi ku dumisa a kungangamela ka tipswalo takwe, leti a nga hi nyika tona hi kota ya Xiranzwa xakwe. [6]

⁷Hi kuma ha yena a kutirulwa ka hina hi kota ya nkhata wakwe, ku nga kutsetselelwa ka zihambuko za hina, hi ku ringana ni kutala ka tipswalo takwe, [7]

⁸leti a nga ti anzisa ka hina hi kutlhariha kontlhe ni kupima.

⁹I lo hi tivisa a mifihlakalo ya kuranza kakwe kukotisa a kuxuva kakwe loku a ku xuvileko, [8]

¹⁰lezaku a yimisa a xaxameto a kumbheleni ka xikhati, lowu ha wona a ta nga tlhanganyisa zilo zontlhe ka Kristu, a zilo za le matilweni ni lezi za laha misaveni. [9]

¹¹Ka Kristu hi nyikilwe a tshomba ya hina, hina lava hi yimiselweko yona hi kale, kota a kuxuva ka yena loyi a tirako zilo zontlhe hi khungo ga kuranza kakwe; [10]

¹²kasi hina ha dumisa a wudumo gakwe, hina lava hi nga ranga hi tsumba Kristu. [11]

¹³Nwina kambe laha na mu zwile a mhaka ya zinene, yi nga ivangeli ya kuhanyiswa ka nwina, na mu kholilwe mu lo fungiwa hi Moya wa ku Basa lowu wu tsumbisilweko, [12]

¹⁴lowu wu nga seve wa tshomba ya hina, kala va tirulwa lava Nungungulu a nga ti kumela vona, kasi ga dumiswa a wudumo gakwe. [13]

¹⁵Lezi nzi zwileko hi kukholwa ka nwina ka Hosi Jesu, ni liranzo leli mu ranzako ha lona a vobasa vontlhe,

¹⁶a nzi tsiki a ku bonga Nungungulu hi kota ya nwina, nza mu alakanya mikombelweni ya mina.

¹⁷Nzi kombela lezaku a Nungungulu wa Hosi ya hina Jesu Kristu, a Dadani wa kungangamela, a fela ku mu nyika a moya wa kutlhariha ni wa kuvululelwa lezaku mu mu tiva. [14]

¹⁸Ngha a woninga a mahlo ya timbilu ta nwina, kasi mu fela ku tiva lezaku xini a kutsumba loku a mu vitaneleko kona, ni lezaku gi talisa kuyini a wukosi ga tshomba yakwe xikari ka vobasa, [15]

¹⁹ni lezaku wu kulisile kuyini a ntamu wakwe ka hina lava hi kholwako, kukotisa a kutira ka ntamu wakwe wa hombe, [16]

²⁰lowu a nga tira ha wona ka Kristu, laha a nga mu vuxa hi ka vafileko, a mu tshamisa canjeni gakwe ga xinene le tilweni,

²¹a hehla ka mifumo, ni mintamu, ni wukulu, ni wuhosi, ni mavito wontihe ma vitanwako, na ku nga hi ka xikhati lexi ntsena, kanilezi ni ka xikhati xi tako. [17]

²²I vekile a zilo zontlhe lahasi ka mikonzo yakwe, a mu yimisa a kuva hloko ya zilo zontlhe lomu bandleni, [18]

²³legi gi nga miri wakwe, legi gi teleko hi yena loyi a tatisako zontlhe ka vontlhe. [19]