Read tshwa Va le Efesusi 2 Bible Online

Va le Efesusi 2 - tshwa bible

Va le Efesusi 2

¹Yena i lo mu vuxa, nwina lava mu nga wa file hi zihambuko ni zionho za nwina, [20]

²lezi mu nga famba ha zona kale, kukotisa a mahanyela ya misava leyi, mu lanzela a hosana ya mintamu ya lomu ndengelengeni, wu nga moya lowu wu tirako makunu ka lava va nga ingisiko. [21]

³Hina hontlhe hi wa kari hi famba zinwe navo a kunaveleni ka nyama ya hina, hi maha a kuranza ka nyama ni ka maalakanyo; hi mahanyela ya hina hi wa hi vanana va khulo khwatsi hi vanwani. [22]

⁴Kanilezi Nungungulu loyi a teleko wuxinji, hi kota ya liranzo lakwe la hombe leli a hi ranzileko ha lona, [23]

⁵i lo hi hanyisa zinwe na Kristu laha hi nga file hi kota ya zihambuko za hina (mu hanyisilwe hi tipswalo). [24]

⁶I lo hi vuxa zinwe naye, ni ku hi tshamisa zinwe naye le tilweni ka Kristu Jesu,

⁷lezaku a zikhatini lezi za ha tako a fela ku kombisa a wukulu ga hombe ga tipswalo takwe, hi wunene gakwe legi a hi maheleko gona nzeni ka Kristu Jesu.

⁸Hakuva hi kota ya tipswalo mu hanyisilwe hi kukholwa; na ku nga hi kumaha ka nwina, xinyikiwo xa Nungungulu. [25]

⁹A zi kumeki hi mitiro, lezaku munhu a nga ti kulisi. [26]

¹⁰Hakuva hina hi ntiro wakwe, a ka Kristu Jesu hi vangelwe mitiro yo saseka, leyi Nungungulu a yi longiseleko kale lezaku hi ta famba ha yona. [27]

¹¹Hikwalaho alakanyani lezaku a kale mu wa hi vamatiko hi ka nyama. Mu wa vitanwa Makhuna hi vona lava va vitanwako Zitshiva, gi nga wukwera ga nyama gi mahiwako hi mandla. [28]

¹²Alakanyani lezaku hi ka xikhati lexo mu wa hi kule na Kristu, mu wa hi handle ka wusumbulwa ga vaIsraeli, mu wa nga hi na xiavelo ka xivumelwano za xitsumbiso, na mu nga hi na kutsumba, mu nga hi na Nungungulu misaveni. [29]

¹³Kanilezi makunu ha Kristu Jesu, nwina lava mu nga hi kule, mu tshinetilwe hi nkhata wa Kristu. [30]

¹⁴Hakuva hi yena kurula ka hina yena loyi a nga maha hina vambiri hiva munwe, a khungumula a xipetso xa laha xikari lexi xi nga hi hambanyisile. [31]

¹⁵I fuvisile a nyameni yakwe lezi zi nga vanga wulala, wona nayo wa zileletelo ni mikhuwo, lezaku a vanga hi lava vambiri a munhu munwe muswa ka yena, kuva kona kurula. [32]

¹⁶I lo hi tlhanganyisa ka Nungungulu hi va miri munwe hi xihambano, na a dele wulala ha xona. [33]

¹⁷I lo ta kanela kurula ka nwina lava mu nga hi kule, ni kurula ka lava va nga hi kusuhani. [34]

¹⁸Hakuva ha yena ha zi kota ku enghena hi wumbiri ga hina hi Moya munwe ka Dadani.

¹⁹Hikwalaho a ma ha hi vapfhumba ni valuveli, kanilezi mu zisumbulwa zinwe ni vobasa, mu va le ngangweni wa Nungungulu.

²⁰Mu akilwe xiseketelweni xa vapostoli ni xa vaprofeti, Jesu Kristu wutsumbu hi ribye ga magumo. [35]

²¹A kuaka kontlhe ku ringanyetwa ka yena, ku kula ku maha tempeli yo basa Hosini;

²²loyi mu akilweko khatiginwe ka yena, mu maha a yindlu ya Nungungulu le Moyeni. [36]