Read tshwa Va le Efesusi 3 Bible Online

Va le Efesusi 3 - tshwa bible

Va le Efesusi 3

¹Hikwalaho mina Paule, nzi nga peresu ya Jesu Kristu hi kota ya nwina vamatiko,— [37]

²loku hakunene mu zwile hi wunekwa ga tipswalo leti nzi nyikilweko tona hi kota ya nwina; [38]

³lezaku nzi lo tiviswa a fihlakalo hi kuvululelwa, kota lezi nzi sinako nzi mu tsalele hi timhaka ti tsongwani. [39]

⁴Loku mu ti gonza, mu ta wona a kupimisisa ka mina fihlakalweni wa Kristu, [40]

⁵lowu wu nga kala ku tiviswa ka vanhu va zizukulwana zinwani, kota lezi ku vululelweko hi Moya ka vapostoli vakwe vo basa ni vaprofeti; [41]

⁶lezaku ngalo: A vamatiko zigatshomba zinwe na hina, vava miri munwe zinwe na hina, va hi zihlengelikulori za xitsumbiso ka Kristu Jesu hi ivangeli, [42]

⁷leyi mina nzi nga mahiwa xitiri xa yona, hi kota ya xinyikiwo xa tipswalo ta Nungungulu leti nzi nyikilweko tona hi kutira ka ntamu wakwe. [43]

⁸Mina loyi nzi nga tsongwanyanyani xikari ka vobasa vontlhe, nzi lo nyikiwa a tipswalo leti ta ku kanela ka vamatiko a ivangeli ya titshomba ta Kristu leti ti nga kambiwiko; [44]

⁹ni ku kombisa ka vanhu vontlhe, va tiva a wunekwa ga fihlakalo lowu wu nga fihlilwe hi kale ka matiko ka Nungungulu, loyi a nga vanga zilo zontlhe. [45]

¹⁰Nungungulu i wa xuva lezaku a wutlhari gakwe ga ginyingi gi fela ku tiviswa hi bandla ka mintamu ni tihosi ta le tilweni, [46]

¹¹kotisa a khungo legi ga pinzukelwa legi a nga gi maha ha Kristu Jesu a Hosi ya hina,

¹²loyi hi tiyako ha yena a ku tshinela ka Nungungulu hi kutsumba, hi kukholwa ka yena.

¹³Hikwalaho nza mu kombela lezaku mu nga rereki hi kota ya zikarato za mina hi kota ya nwina, hakuva wudumo ga nwina.

¹⁴Hi kota ya lezo nza khizama ka Dadani hi madzolo ya mina,

¹⁵loyi a mingango yontlhe ya le tilweni ni ya laha misaveni yi chuliwako ha yena, [47]

¹⁶nzi kombela lezaku a fela ku mu nyika hi kutala ka wukosi gakwe, lezaku mu tiyiswa hi ntamu munhwini wa lomu nzeni hi Moya wakwe, [48]

¹⁷lezaku Kristu a tshama timbilwini ta nwina hi kukholwa; lezaku na mu zimekilwe ni ku seketelwa liranzweni, [49]

¹⁸mu fela ku zi kota ku pima zinwe ni vobasa vontlhe, lezaku xini a kuanama ni kuleha ni kueta, [50]

¹⁹ni ku tiva a liranzo la Kristu leli li hunzako kutiva kontlhe, lezaku mu tatiswa hi kutala kontlhe ka Nungungulu. [51]

²⁰Makunu ka yena loyi a zi kotako ku maha nguvunguvu ku hunza zontlhe lezi hi zi kombelako, kutani ku alakanya, hi ntamu lowu wu tirako ka hina,

²¹ka yena a give wudzunzo bandleni ni ka Kristu Jesu ka zizukulwana zontlhe, kala kupinzuka ni kupinzuka. Amen! [52]