Read tshwa Va le Efesusi 4 Bible Online

Va le Efesusi 4 - tshwa bible

Va le Efesusi 4

¹Hikwalaho mina loyi nzi nga peresu Hosini, nza mu khongotela a kuva ni mafambela lawa ma faneleko a kuvitanwa loku mu nga vitanwa ha kona; [53]

²muva ni kutikoramisa kontlhe, ni lihlaza-mbilu, mu timiselana hi liranzo, [54]

³mu pinyamela a ku hlayisa a wunwe ga Moya hi xiboho xa kurula. [55]

⁴Wu kona miri munwe ni Moya munwe, kota lezi mu nga vitanelwa a kutsumba kunwe laha mu nga vitanwa. [56]

⁵A Hosi yinwe, a kukholwa kunwe, a kubapatiza kunwe, [57]

⁶ni Nungungulu munwe a nga Dadani wa vontlhe, loyi a nga hehla ka vontlhe, ni xikari ka vontlhe, ni ku tshama ka vontlhe. [58]

⁷Kanilezi a tipswalo ti lo nyikiwa ka munwe ni munwani wa hina khwatsi hi lipimo la xinyikiwo xa Kristu.

⁸Hikwalaho ku tsalilwe ku ngalo: Laha a nga tlakukela hehla i lo rangela vakhomiwa, A nyika zinyikiwo ka vanhu. [59]

⁹Makunu lezi zaku: I lo tlakukela, zi wula yini loku ku nga hi lezaku i wa rangile a relela wutshanwini ga lahasi ka misava ke? [60]

¹⁰Yena loyi a nga relela hi yaloye a nga tlakukela hehla ka matilo wontihe, lezaku a tatisa zilo zontlhe. [61]

¹¹I lo nyika vanwani a kuva vapostoli, ni vanwani a kuva vaprofeti, ni vanwani a kuva vavangeli, ni vanwani a kuva varisi ni vagonzisi, [62]

¹²kasi a vobasa va fela ku mbhelela ntirweni wa wurisi, ku akiwa a miri wa Kristu, [63]

¹³hi kala hina hontlhe hi chikela kuzwaneni ka kukholwa, ni ka ku tiva a Nʼwana wa Nungungulu, ni ka wudota gi mbheleleko, ni ka lipimo la xiyimo xi mbheleleko xa Kristu; [64]

¹⁴lezaku hi nga ha mahi zihlangi, hi ndlengandlengiswa kukotisa mabyandlati ya bimbi hi timheho tontlhe ta tigonzo, kutani hi kukanganyisa ka vanhu, ni wumbyori gabye ga ku khohlisa. [65]

¹⁵Kanilezi hi ta hlayisa zinene hi liranzo, hi kula zilweni zontlhe ka yena, loyi a nga hloko, yena Kristu,

¹⁶loyi a miri wakwe wontihe wu tlhanganyiswako khwatsi, ni ku tiyiswa hi xivuno lexi xi nyikwako hi xiro xinwe ni xinwani, wu kuma kukula hi ntamu lowu wu avelwako xiro xinwe ni xinwani, kasi wu akiwa hi liranzo. [66]

¹⁷Nzi laya ni ku tiyisa Hosini, nziku: Ngha mu nga ha fambi kota vamatiko, lava va fambako maalakanyweni yabye ya hava,

¹⁸na va pfhupelisilwe kupimeni kabye, va hambene ni kuhanya ka Nungungulu hi kota ya kungativi loku ku nga kona xikari kabye, hi kota ya kunonoha ka timbilu tabye. [67]

¹⁹Laha na va nga ha zi koti kuzwa va lo ti nyikela wurembini, va tira kungahlazeki kontlhe ku hunza mpimo. [68]

²⁰Kanilezi nwina a mu mu gonzangi kota lezo Kristu,

²¹loku mu mu zwile, mu gonziswa ka yena, kota lezi a zinene zi nga ka Jesu.

²²Xungetano ni mahanyela ya nwina ya kale mu yimelwe hi ku ti tlhatlha ka munhu wa kale, loyi a onhekako hi kunavela ka kukhohlisa;

²³kasi mu mahiwa laʼvaswa a moyeni wa kupima ka nwina, [69]

²⁴mu ambala munhu muswa, loyi a vangilweko ku fanana ni Nungungulu kululameni ni kubaseni ka zinene.

²⁵Hikwalaho tsikani mawunwa, mu wulawula zinene munwe ni munwani ka waakelane wakwe, hakuva munwe ni munwani xiro ka vanwani.

²⁶Zangarani, kanilezi mu nga onhi; ngha gambo gi nga peli na ma ha zangarile,

²⁷ngha mu nga mu nyiki xikhati Satani. [70]

²⁸Ngha loyi a nga hi khamba a nga ha yivi kambe; kanilezi a ti karate a tira lezi zi sasekileko hi mandla yakwe, kasi a fela kuva nazo zo nyika loyi a vumalako.

²⁹A kuwulawula ko nyenyeza ngha ku nga humi milonwini ya nwina, sine timhaka ta zinene ta ku vunetela laha ku lavekako, lezaku tiva xikatekiso ka lava va ingisako.

³⁰Mu nga vangeli wusiwana a Moya wa ku Basa wa Nungungulu, lowu mu nga fungiwa ha wona hi kota ya siku ga kutirulwa. [71]

³¹A titsheku tontlhe, ni khulo, ni zanga, ni guwa, ni wuxezi, ngha zi suswa ka nwina, zinwe ni mona wontihe.

³²Ngha mu hi ni wunene ka munwe ni munwani, mu zwelana wusiwana, ni ku tsetselelana, kota lezi Nungungulu kambe a nga mu tsetselela ha Kristu.