Read tshwa Va le Efesusi 6 Bible Online

Va le Efesusi 6 - tshwa bible

Va le Efesusi 6

¹Vanana, ingisani a vapswali va nwina Hosini, hakuva lezi zi sasekile. [87]

²Chava a raru wa wena ni nyine wa wena (lowu hi nayo wo ranga wu nga ni xitsumbiso), [88]

³kasi u fela ku kateka, u hanya xikhati xa hombe laha misaveni.

⁴Na nwinawu vararu, mu nga zangarisi a vana va nwina; kanilezi va wundleni hi kululeka ni kulaya ka Hosi. [89]

⁵Nwina malanza, ingisani a venyi va nwina va misava hi xichavo ni kururumela, hi kupangama ka timbilu ta nwina, aku khwatsi hi ka Kristu

⁶mu nga va tireli ntsena loku va mu wona, khwatsi hi lava va tsakisako vanhu; kanilezi tirani khwatsi hi malanza ya Kristu, mu maha kuranza ka Nungungulu hi mbilu.

⁷Va tireleni hi matsenya, khwatsi hi loku mu tirela Hosi na ku nga hi vanhu.

⁸Ma zi tiva lezaku kani hi xihi xilo xi nene lexi a munhu a xi mahako, xwalexo i ta xi amukela hi ka Hosi, kani i khumbi kutani hi loyi a tlhatlhekileko. [90]

⁹Na nwina venyi, mahani zalezo ka malanza ya nwina, mu tsika a ku va dzukisa; na mu tiva lezaku loyi a nga Hosi ya vona ni ya nwina i le tilweni, ni lezaku ka yena a ku na kuhlawulwa munhu. [91]

¹⁰Hi kugumesa, tiyani Hosini, ni ntanwini wakwe wa hombe.

¹¹Hlomani a matlhari wontihe ya Nungungulu, kasi mu fela ku zi kota ku hlula a mano ya Satani. [92]

¹²Hakuva a kulwa ka hina a hilwi ni nyama ni nkhata, kanilezi hilwa ni tihosana ta mimoya, ni mintamu, ni tihosi ta munyama lowu, ni mimoya ya kubiha ya le hehla. [93]

¹³Hikwalaho hlomani a matlhari wontihe ya Nungungulu, lezaku mu tava ni ntamu wa ku yima hi siku ga khombo, mu simama mu yima loku mu hlulele magumo.

¹⁴Hikwalaho yimani, na mu bohile ziwunu za nwina hi bhandi ga zinene, na mu ambele a xikatawu xa xiketse xa kululama, [94]

¹⁵na mu ambele mikonzweni ya nwina a zilato za ivangeli ya kurula. [95]

¹⁶Nguvunguvu hlomani a xitlhangu xa kukholwa, lexi mu ta nga zi kota ku tima ha xona a zijulu zontlhe za nzilo za loyi wa kubiha. [96]

¹⁷Tekani a ndlhondlha ya kuhanyiswa, ni supado ya Moya, yi nga Mhaka ya Nungungulu. [97]

¹⁸Khongelani zikhati zontlhe hi mikhongelo ni kukombela hi Moya, mu rinzela hi lihlaza-mbilu ni ku kombelela a vobasa vontlhe. [98]

¹⁹Nzi khongeleleni na minawu, lezaku kasi nza nyikwa magezu loku nzi ahlama nomu wa mina, nzi kanela a fihlakalo wa ivangeli hi kutiya,

²⁰leyi nzi nga tsumi wa yona a makhotsweni; kombelani lezaku nzi fela a ku wulawula ha yona hi kutiya, kota lezi nzi faneleko ku wulawula. [99]

²¹Tikikusi a makabye a ranzekako, a nga xitiri xi tsumbekileko Hosini, i ta mu tivisa hi kuhanya ka mina, a mu byela wontihe mahungu. [100]

²²Nzi mu rumele lezo ka nwina, lezaku mu fela ku tiva a timhaka ta hina, ni kuva a fela ku tangalisa a timbilu ta nwina.

²³A kurula a kuve ni vamakabye, ni liranzo zinwe ni kukholwa ka le ka Nungungulu a Dadani, ni Hosi Jesu Kristu.

²⁴A tipswalo a tive na vona vontlhe va ranzako a Hosi ya hina Jesu Kristu hi liranzo li nga onhekiko.