Read tshwa Va le Filipi 4 Bible Online

Va le Filipi 4 - tshwa bible

Va le Filipi 4

¹Hikwalaho vamakabye va ranzekako, va navelekako, mu nga kutsaka ka mina ni xidlodlo xa mina, yimani muku nde Hosini, ziranzwa za mina. [45]

²Nza khongotela Evodia na Sintike, a kuva va zwana Hosini.

³Ina, nza ku khongotela na wenawu xitiri-kulori, vunetela a vavasati lava, hakuva va tirile na mina ivangelini, zinwe na Klemente, ni zinwani zitiri-kulori, lava a mavito yabye ma tsalilweko bhukwini ga wutomi. [46]

⁴Tsakani Hosini xikhati xontlhe; nzi engeta kambe nziku, Tsakani!

⁵Ngha na wunene ga nwina gi tibyiwa hi vanhu vontlhe. A Hosi yi le kusuhi. [47]

⁶Mu nga kanakaneli nchumu; kanilezi a timhakeni tontlhe tivisani a mixuvo ya nwina ka Nungungulu hi kukombela ni kukhongotela, na mu kari mu bonga. [48]

⁷Zonake a kurula ka Nungungulu, loku ku nga hiko na kupimiwa, ku ta hlayisa a timbilu ta nwina ni maalakanyo ya nwina ka Kristu Jesu. [49]

⁸Vamakabye, hi kugumesa nzi ngalo: Ni zihi lezi zi nga zi nene, ni zihi lezi zi dzunzekako, ni zihi lezi zi lulamileko, ni zihi lezi zi basileko, ni zihi lezi zi ranzekako, ni zihi lezi zi khesiwako; loku gi hi kona wunene, ni zilo lezi zi faneleko ku bongiwa, alakanyani zontlhe lezo.

⁹Zontlhe lezi mu nga zi gonza, ni ku amukela, mu zizwa ni ku wona ka mina, zi maheni; zonake a Nungungulu wa kurula i tava na nwina.

¹⁰Nza tsaka nguvu Hosini hilezi mu nga tlhela mu alakanya ku nzi vuna; hakunene mu lo nzi alakanya kanilezi mu lo vumala xikhati a ku nzi mahela nchumu. [50]

¹¹A nzi wuli lezo hi kota ya kuvumala; hakuva nzi gonzile a kuva nzi xalala ni ka gihi tshamela nzi nga ka gona. [51]

¹²Nza tiva kukoramiswa, nza tiva kambe ku taleliwa; a ka matshamu wontihe ni ka matshamela wontihe nzi gonzile a ku xalala, hambu nzi xura kutani nzizwa ndlala, hambu ku taleliwa kutani ku vumala. [52]

¹³Nza zi kota ku maha zilo zontlhe ha Kristu loyi a nzi tiyisako. [53]

¹⁴Hambu zi hi tano, mu mahile khwatsi, lezi mu nga hlengela na mina kuxanisekeni ka mina. [54]

¹⁵Na nwina va le Filipi, ma zi tiva lezaku, a kusanguleni ka ntiro wa ivangeli, laha nzi nga suka hi le Makedonia, ku wa nga hi kona bandla ginwani gi nga hlengela na mina timhakeni ta ku nyika ni ku amukela, saseka nwina ntsena. [55]

¹⁶Hakuva ni laha nzi nga hi le Tesalonika mu lo rumela kanwe, zonake mu lo engeta ka wumbiri kuvumaleni ka mina. [56]

¹⁷A hi lezaku nzi lava zinyikiwo; kanilezi nzi lava a mihanzu leyi yi talelako nwina hi kota ya zona. [57]

¹⁸Nzi kumile zontlhe, nzi nazo ni ku hunza. Nzi talelwe hi ku amukela ha Epafroditusi lezi zi ngata hi le ka nwina, za masema yo nanziha, a muphahlelo wu amukelekako wu xalalisako Nungungulu. [58]

¹⁹A Nungungulu wa mina i ta mu nyika zontlhe lezi mu zi vumalako, khwatsi hi kufuma kakwe ni kungangamela kakwe ka Kristu Jesu. [59]

²⁰Makunu a give wudzunzo ka Nungungulu wa hina thlelo Dadani, kala kupinzuka ni kupinzuka. Amen!

²¹Rungulani a vobasa vontlhe ka Kristu Jesu. A vamakabye lava va nga zinwe na mina va mu rungula.

²²Vontlhe a vobasa va mu rungula, nguvunguvu a va lomu ndlwini ya Kesari. [60]

²³A tipswalo ta Hosi Jesu Kristu a tive zinwe ni mimoya ya nwina.