Read tshwa Va le Kolosi 1 Bible Online

Va le Kolosi 1 - tshwa bible

Va le Kolosi 1

¹Paule, a mupostoli wa Kristu Jesu hi kuranza ka Nungungulu, na Timote a makabye wa hina,

²ha rungula a vobasa ni vamakabye va tsumbekileko ka Kristu lava va nga le Kolosi, hiku: A tipswalo ni kurula a zive na nwina na zi huma ka Nungungulu a Dadani wa hina. [1]

³Hina ha mu bonga Nungungulu a Dadani wa Hosi ya hina Jesu Kristu na hi mu khongelela xontlhe xikhati,

⁴hakuva hi zwile hi kukholwa ka nwina ka Kristu Jesu, ni liranzo leli mu ranzako ha lona a vobasa vontlhe, [2]

⁵hi keta ya kutsumba loku ku vekelweko nwina le matilweni. Kale na mu zwile hi kutsumba loku a mhakeni ya zinene ya ivangeli, [3]

⁶leyi yi tileko ka nwina, kota lezi yi tileko matikweni wontihe, yi ta pswala mihanzu ni ku anza ka wona, kota lezi yi mahako ka nwina kambe, kusukela a siku legi mu nga yizwa, ma tiva a tipswalo ta Nungungulu hi zinene, [4]

⁷kota lezi mu nga gonziswa hi Epafrasi, a xitiri-kulori xi ranzekako. Yena i nanza gi tsumbekileko ga Kristu xikari ka nwina, [5]

⁸hi yena a nga hi hlawutela a liranzo la nwina le Moyeni.

⁹Hi kota ya lezo na hinawu, kusukela a siku legi hi nga zizwa, a hi tsikangi a ku mu khongelela ni ku mu kombelela, lezaku mu fela ku tatiswa hi ku tiva a kuranza kakwe nzeni ka wutlhari gontlhe ni kupima kontlhe ka moya, [6]

¹⁰lezaku mu famba hi laha ku faneleko Hosi, mu yi xalalisa ka zontlhe, ni ku pswala mihanzu mitirweni yontlhe yo saseka, mu kula kutiveni ka Nungungulu. [7]

¹¹Ngha mu tiyiswa matlhelweni wontihe, khwatsi hi ntamu wakwe wa hombe, a kuva mu hi ni kutiyisela kontlhe ni kutimisela zinwe ni kutsaka, [8]

¹²na mu bonga Dadani, loyi a hi mahileko hi hi ni fanelo a kuva vahlengeli va tshomba ya vobasa le kuwonekeleni. [9]

¹³Yena i lo hi hlanguta ntanwini wa munyama, a hi enghenisa mufunweni wa Nʼwana wakwe a ranzekileko, [10]

¹⁴loyi hi nga ni kutirulwa ha yena, ku nga kutsetselelwa ka zionho za hina.

¹⁵Hi yena a nga xifananiso xa Nungungulu loyi a nga woniwiko, a matewula ya zivangwa zontlhe. [11]

¹⁶Hakuva a zilo zontlhe zi vangilwe ha yena, le tilweni ni laha misaveni, a zilo zi woniwako ni lezi zi nga woniwiko, kutani zitshamu za wuhosi, kutani mifumo, kutani vafumeli va mimoya, kutani mintamu; zontlhe zi vangilwe hi yena, zi vangelwa yena. [12]

¹⁷Hi yena a nga rangela zilo zontlhe, zontlhe zi te tsoma ha yena.

¹⁸Yena i hloko ya miri wu nga gona bandla; hi yena a nga masangulo, ni matewula ya kuvuka ka vafileko, lezaku ava loʼwo ranga matlhelweni wontihe. [13]

¹⁹Hakuva zi lo mu xalalisa Nungungulu lezaku a kumbhelela kontlhe ku tshama ka yena; [14]

²⁰lezaku a ta ti tlhanganisa ha yena ni zilo zontlhe za laha misaveni, kutani za le tilweni, na a vanga kurula hi nkhata wa xihambano xakwe.

²¹Na nwina lava mu nga hambukile kakwe xikhatini xa kale, mu hi valala kupimeni ka nwina hi mitiro ya nwina ya kubiha,

²²kanilezi makunu i mu tlhanganyisile naye mirini wa nyama yakwe hi kufa kakwe, kasi ku mu yisa mahlweni kakwe na mu basile, mu nga hi na hala, hambu ni kusoleka,

²³loku nwina mu simamisa kukholweni, na mu zimekilwe muku nde, mu nga tsiki ku tsumba a ivangeli leyi mu yi zwileko, leyi yi nga kanelwa ka zivangwa zontlhe lahasi ka tilo, leyi mina Paule nzi nga mahiwa nanza ga yona.

²⁴Makunu nza tsaka kuxanisekeni ka mina, loku nzi xanisekako hi kota va nwina; nzi tatisa nyameni ya mina lezi zi nga sele a kuxanisekeni ka Kristu hi kota ya miri wakwe, wu nga bandla gakwe. [15]

²⁵Hakuva nzi mahile nanza ga gona, hi ku yimiswa hi Nungungulu hi kota ya nwina, kasi ku tlhamusela a mhaka yontlhe ya Nungungulu,

²⁶leyi yi nga fihlakalo wu nga fihlilwe ka tintanga tontlhe ni zizukulwana, kanilezi makunu wu wonekelisilwe ka vobasa vakwe. [16]

²⁷Hakuva Nungungulu i lo ranza ku va tivisa lezaku ku talisile kuyini a kungangamela ka fihlakalo lowu xikari ka vamatiko, lowu wu nga lezaku Kristu i xikari ka nwina, loyi a nga kutsumba ka kungangamela.

²⁸Hi yena hi mu kanelako, na hi kari hi luleka ni ku gonzisa vanhu vontlhe hi wutlhari gontlhe, lezaku hi fela ku yimisa vanhu vontlhe na va mbhelele ka Kristu.

²⁹Hizalezo nzi tirelako zona mina, na nzilwa khwatsi hi kutira ka ntamu wakwe lowu wu tirako nguvu ka mina.