Read tshwa Va le Kolosi 3 Bible Online

Va le Kolosi 3 - tshwa bible

Va le Kolosi 3

¹Zonake loku mu vukile zinwe na Kristu, ngha mu hlota a zilo lezi zi nga le hehla, laho Kristu a nga kona, na tshamile hi le reveni ga xinene ga Nungungulu. [26]

²Alakanyani a zilo za le hehla, na ku nga hi zilo za laha misaveni.

³Hakuva mu file, ni kuhanya ka nwina ku fihlilwe zinwe na Kristu ka Nungungulu. [27]

⁴Laha Kristu, loyi a nga wutomi ga hina, a ta nga wonekeliswa, zonake na nwinawu mu ta wonekeliswa zinwe naye hi kungangamela. [28]

⁵Hikwalaho dayani a ziro za nwina za laha misaveni: a wubhayi, ni kungahlazeki, ni wurembi, ni kumbilukela ka kubiha, ni likaka, li nga kukhozela zifananiso;

⁶hi kota ya zakunghahi yata a zanga ya Nungungulu hehla ka lava va nga ingisiko,

⁷lezi mu nga fambafamba xikari ka zona kale, laha mu nga hanya ka zona.

⁸Kanilezi makunu tsikani zontlhe lezi: a zanga, ni khulo; ni mona, ni kulumbeta, ni kuwulawula ko nyenyeza. [29]

⁹Mu nga hembelani mawunwa, kota lezi mu runzuwuleko a munhu wa kale ni zimaho zakwe, [30]

¹⁰na mu ambele a munhu muswa, loyi a mahiwako luswa a kutiveni, lezaku a fanana na yena loyi a nga mu vanga. [31]

¹¹Laho a ku na muGreki ni muJuda, ni xitshiva ni khuna, ni wamatiko ni muSkite, a khumbi ni loyi a tlhatlhekileko; kanilezi Kristu hi yena zontlhe, i kona ka vontlhe. [32]

¹²Hikwalaho, kota lezi mu nga vahlawulilweko va Nungungulu, mu basile ni ku ranzeka, ambalani a mbilu yo zwela wusiwana, ni wunene, ni kutikoramisa, ni kurula, ni lihlaza-mbilu. [33]

¹³Honiselanani ni ku tsetselelana; loku munhu a hi ni xisolo ka munwani, kota lezi Hosi yi nga mu tsetselela, nwinawu mahani zalezo.

¹⁴A hehla ka zontlhe lezo, ambalani liranzo, leli li nga xiboho xa kumbhelela. [34]

¹⁵Ngha na kurula ka Kristu ku fuma timbilwini ta nwina, loku mu vitaneleko kona mirini munwe; kambe muva ni kubonga. [35]

¹⁶A mhaka ya Kristu a yi tshame yi anza ka nwina; gonzisanani hi wutlhari gontlhe, mu khongotelana hi tixangu ni tisimu ni zizimba za moya, na mu bonga Nungungulu hi tisimu timbilwini ta nwina. [36]

¹⁷Kani hi xihi lexi mu xi mahako, kani hi kuwulawula kutani hi kutira, mahani zontlhe vitweni ga Hosi Jesu, mu bonga Nungungulu Dadani ha yena. [37]

¹⁸Vavasati, ingisani a vanuna va nwina, kota lezi zi faneleko Hosini.

¹⁹Vavanuna, ranzani vasati va nwina, mu nga va maheli timbiti.

²⁰Vanana, ingisani a vapswali va nwina zilweni zontlhe, hakuva lezo za xalalisa Hosi. [38]

²¹Vararu, mu nga zangarisi a vana va nwina, va nga mbhela ntamu. [39]

²²Malanza, ingisani zilweni zontlhe lava va nga venyi va nwina va misava, na mu nga va tireli ntsena loku va mu wona, khwatsi hi lava va tsakisako vanhu, kanilezi hi kupangama ka timbilu ta nwina, na mu chava Hosi.

²³Kani hi xihi lexi mu xi mahako, xi maheni hi mbilu; khwatsi hi loku mu tirela Hosi, na ku nga hi vanhu.

²⁴Ma zi tiva lezaku mu ta amukeliswa a tshomba hi Hosi, yiva nchachazelo wa nwina; hakuva a nwinyi loyi mu mu tirelako hi Hosi Kristu.

²⁵Loyi a mahako kubiha i ta tlheliselwa hi kota ya kubiha loku a ku mahileko, hakuva a ku na kuhlawulwa munhu.