Read tshwa 1 Va le Tesalonika 1 Bible Online

1 Va le Tesalonika 1 - tshwa bible

1 Va le Tesalonika 1

¹Paule, na Silvanusi, na Timote, ha rungula a bandla ga va le Tesalonika, legi gi nga ka Nungungulu Dadani, ni Hosi Jesu Kristu, hiku: A tipswalo ni kurula a zive na nwina. [1]

²Hina ha bonga Nungungulu xontlhe xikhati ha nwina nwentlhe, na hi mu alakanya kukhongeleni ka hina.

³Xontlhe xikhati hi alakanya a ntiro wa nwina wa kukholwa, ni kupinyama ka liranzo, ni kutiya ka nwina kutsumbeni ka Hosi ya hina Jesu Kristu, a mahlweni ka Nungungulu a Dadani wa hina. [2]

⁴Vamakabye va ranzilweko hi Nungungulu, ha zi tiva lezaku mu hlawulilwe hi yena, [3]

⁵hakuva a ivangeli ya hina a yi tangi ka nwina hi kuwulawula koce, kanilezi yi tile kambe hi ntamu ni Moya wa ku Basa, ni kutiyiswa kunyingi. Nwina ma zi tiva lezaku hi tshamisile kuyini xikari ka nwina kasi ku mu vuna. [4]

⁶Nwina mu lo maha vapimanyisi va hina ni va Hosi, hambu lezi mu nga amukele a mhaka hi kuxaniseka kunyingi, mu wa hi ni kutsaka ka Moya wa ku Basa;

⁷laha kakuva mu maha xiwonelo ka vontlhe lava va kholwako le Makedonia ni le Akaia.

⁸Hakuva a mhaka ya Hosi yi zwakele yi huma hi le ka nwina, na ku nga hi Makedonia ni le Akaia koce, kanilezi a kukholwa ka nwina ka Nungungulu ku la su ga fenemete wutshanwini gontlhe, laha kaku a za ha laveki ku wula nchumu ha kona. [5]

⁹Hakuva a vanhu va hi hlawutela hi maenghenela ya hina xikari ka nwina, ni kutsika ka nwina a zifananiso mu hunzulukela ka Nungungulu, kasi ku khozela loyi a hanyako ni wa zinene,

¹⁰na mu rinzela a Nʼwana a kuta hi le tilweni, loyi yena a nga mu vuxa hi ka vafileko, a nga Jesu loyi a hi hlangutako zangeni leyi yi ta ngata. [6]