Read tshwa 1 Va le Tesalonika 2 Bible Online

1 Va le Tesalonika 2 - tshwa bible

1 Va le Tesalonika 2

¹Hakuva na nwina, vamakabye, ma zi tiva lezaku a ku mu enzela ka hina a ku mahiwangi mahala.

²Kanilezi hambu lezi hi nga rangile hi xaniseka ni ku khonʼwa hi tingana le Filipi (kota lezi mu zi tivako), hi lo tiya-hlana ka Nungungulu wa hina, hi kanela ka nwina a ivangeli hi kulwa ka hombe. [7]

³Hakuva a kukhongotela ka hina a hi timhaka ti kanganyisako ni kungahlazeki, hambu hi mano.

⁴Kanilezi kota lezi hi kumilweko hi Nungungulu, hi hi ni fanelo a kuva hi nyikwa a ntiro wa ivangeli, hina ha yi kanela, na ku nga hi ku xalalisa vanhu, kanilezi kasi ku xalalisa Nungungulu, loyi a hlolako timbilu ta hina. [8]

⁵Nwina ma zi tiva lezaku cima a hi kanelangi a magezu ya ku dzumeleta, hambu a mano ya ku ti fumisa; Nungungulu hi kustumunyu wa hina.

⁶Kambe a hi lavangi a ku dumiswa hi vanhu, hambu hi nwina, kutani hi vanwani; hambu loku hi wa ta ngha hi zi kotile ku mu binzela, kota lezi hi nga vapostoli va Kristu. [9]

⁷Kanilezi hi lo rula xikari ka nwina, kota a muanwisi loku a hlayisa a vanana vakwe.

⁸Kota lezi hi nga mu ranza nguvu hi lo tsaka a ku mu nyika ivangeli ya Nungungulu, na ku nga hi yona yoce, kanilezi hi wa longile a ku nyikela hambu ni wutomi ga hina, hakuva mu wa ranzeka nguvu ka hina. [10]

⁹Vamakabye, nwina ma alakanya a ntiro wa hina ni kukarateka ka hina; lezi hi nga tira wusiku ni mumu, kasi hi nga binzisi ni munwe wa nwina, laha hi nga kanela ivangeli ya Nungungulu ka nwina. [11]

¹⁰Nwina mu vakustumunyu va hina, ni Nungungulu kambe, lezaku hi tshamisile kuyini hi kubasa ni kululama ni kungasoleki ka nwina lava mu kholwako.

¹¹Na nwina ma zi tiva lezaku hi wa mu layile munwe ni munwani, hi mu luleka ni ku mu layisisa khwatsi hi raru loyi a layako vanana vakwe.

¹²Kasi ma famba hi kufaneleko Nungungulu, loyi a mu vitaneleko mufunweni wakwe ni kungangameleni kakwe. [12]

¹³Hi kota ya lezo ha simamisa hi bonga Nungungulu, lezaku laha mu nga amukela a mhaka ya Nungungulu, leyi mu nga yi kuma ka hina, a mu yi amukelangi khwatsi i mhaka ya vanhu, kanilezi mu lo amukela a mhaka ya Nungungulu kota lezi yi nga yona, a mhaka leyi yi tirako xikari ka nwina lava mu kholwako. [13]

¹⁴Hakuva nwina, vamakabye, mu lo maha vaecanyisi va mabandla ya Nungungulu ma nga le Judia, lawa ma nga ka Kristu Jesu; hakuva nwina mu lo xaniswa hi va ka nwina, kota lezi va nga xanisiswa zona hi vaJuda. [14]

¹⁵Lava va nga daya Hosi Jesu ni vaprofeti, va hlongola na hina; a va xalalisi Nungungulu, kanilezi mbalala va vanhu vontlhe; [15]

¹⁶va hi tsimbetela a ku kanela ka vamatiko, lezaku va fela ku hanyiswa; lezo va tatisa xontlhe xikhati a lipimo la zionho zabye. Kanilezi a khulo ga Nungungulu gi va putsuketele magumo. [16]

¹⁷Vamakabye, kota lezi hi nga tsawukene na nwina mirini a xikhatanyana, kanilezi na hi nga tsawukanangi hi mbilu, hi lo navela nguvu a ku wona tinghohe ta nwina.

¹⁸Hakuva hi wa xuvile a kuta ka nwina; nguvu mina Paule, nzi ringile kanwe ni kumbiri, kanilezi Satani i lo hi thindekisa. [17]

¹⁹Hakuva xini a kutsumba ka hina, kutani kutsaka ka hina, kutani a xidlodlo lexi hi ti kulisako ha xona mahlweni ka Hosi ya hina Jesu a kuwuyeni kakwe? A hi yena nwina ke? [18]

²⁰Ina, hi nwina mu nga wudumo ga hina ni kutsaka ka hina.