Read tshwa 1 Va le Tesalonika 4 Bible Online

1 Va le Tesalonika 4 - tshwa bible

1 Va le Tesalonika 4

¹Tlhatakumbiri, vamakabye, ha mu khongotela ni ku mu luleka ka Hosi Jesu, lezaku kota lezi mu nga gonza ka hina a mahanyela lawa ma xalalisako Nungungulu, simamisani ni ku anza ka wona. [28]

²Hakuva ma yi tiva a milayo leyi hi nga mu nyika yona ha Hosi Jesu,

³Hakuva a kuranza ka Nungungulu hi lezaku mu basiswa, ni lezaku mu tsika wubhayi. [29]

⁴Lezaku munwe ni munwani a tiva ku hlayisa a sati wakwe hi kubasiswa ni wudzunzo, [30]

⁵na ku nga hi wuxokori ga kunavela, khwatsi hi vamatiko lava va nga tiviko Nungungulu; [31]

⁶lezaku ku nga hi kona munhu a onhako makabye hi lexi xilo; hakuva Nungungulu hi muphoteli wa zontlhe lezo, kota lezi hi nga mu byela kale hi tiyisa ka nwina. [32]

⁷Hakuva Nungungulu a nga hi vitanelangi zivini, kanilezi i hi vitanele kubasisweni. [33]

⁸Loyi a alako lezo, a nga ali munhu, kanilezi i ala Nungungulu loyi a mu nyikako Moya wakwe wa ku Basa. [34]

⁹Xungetano ni ku ranza vamakabye a zi laveki lezaku nzi mu tsalela ha kona; hakuva nwina wutsumbu mu gonzisilwe hi Nungungulu a kuva mu ranzana, [35]

¹⁰hakuva hi zona lezi mu zi mahako ka vamakabye vontlhe va nga le Makedonia. Kanilezi ha mu khongotela, vamakabye, lezaku mu anza liranzweni lelo,

¹¹ni lezaku mu pinyamela ku hanya hi kurula, mu tira mitiro ya nwina, ni ku tira hi mandla ya nwina, kota lezi hi nga mu laya,

¹²lezaku muva ni mahanyela ma faneleko ka lava va nga lehandle, mu nga vumali nchumu.

¹³Vamakabye, a hi zi ranzi lezaku mu kohlwa xungetano ni lava va etlelako; mu nga xaniseki khwatsi hi vanwani lava va nga hiko na kutsumba.

¹⁴Hakuva loku hi kholwa lezaku Jesu i lofa a tlhela a vuka, hizalezo ni lava va etleleko, Nungungulu i ta va vuxa ha Jesu, a va wuyisa zinwe naye. [36]

¹⁵Hakuva ha mu tivisa lezi hi byelilweko hi Hosi, lezaku hina lava hi hanyako, lava ha ha seleko kuwuyeni ka Hosi, hi nga ta va rangela ha nchumu lava va etleleko. [37]

¹⁶Hakuva yona Hosi wutsumbu yi ta relela hi le tilweni hi huwa yi leletelako, ku zwala a gezu ga ngelosi ya hombe ni mpunzu wa Nungungulu; lava va fileko ka Kristu va ta vuka kuranga. [38]

¹⁷Zonake hina lava ha ha hanyako, lava hi seleko, hi ta amukelwa zinwe navo marefini, a ku ya khinga Hosi le ndengelengeni; lezo hi taku tsonzoma zinwe ni Hosi. [39]

¹⁸Hikwalaho tangalisanani hi leti timhaka.